Fii Yaadu Issaaqa ndun Garaara
26
1 Heege waɗuno e leydi Kanaana ndin kadi, hara wonaa ngee heege waɗunoonge fewndo jamaanu Ibraahiima. Issaaqa yahi ka Abii-Maaliki lanɗo Filistiyankeeɓe ɓen leydi Garaara. 2 Joomiraaɗo on feeɲani mo, daalani mo: «Wota a yahu Misira, luttu e ndii leydi ndi mi hollay-maa. 3 Koɗo e ndii leydi ɗoo, haray mi wonday e maa, awa kadi mi waɗay barki e maa, ɓay ko an e jurriya maa on mi okkoyta ɗee leyɗe ɗoo fow. Mi tabintinoya kadi woondoore nde mi woondannoo ben maa Ibraahiima nden. 4 Mi yaɲɲiray jurriya maa on wa koode ɗen ka kammu, mi okka ɓe kadi ɗee leyɗe fow. Leƴƴi aduna on fow barkinte sabu jurriya maa on, 5 sabu ko Ibraahiima ɗoftinoo kongol an ngol kon, o jaɓi ko mi farli mo kon e yamirooje an ɗen e waajuuji an ɗin e sariyaaji an ɗin.»6 Onsay Issaaqa hoɗi Garaara. 7 Ɓay worɓe nden nokkuure landike mo fii ɓeyngu makko, o wi'i ɓe: «On ko bandiraawo an», ko fii hari himo huli wi'ugol: «Oo ko ɓeyngu an», fii wota worɓe nden nokkuure waru mo sabu Rifqatu, ɓay hari on ko labaaɗo.
8 Ɓay non kanko Issaaqa o neeɓii koɗaade ton, ɲande goo tawi Abii-Maaliki, oo lanɗo Filistiyankeeɓe ɓen, no yurnora e dambukun, tun o haynii Issaaqa no mowla Rifqatu ɓeyngu mun. 9 Onsay Abii-Maaliki noddi mo wi'i: «Eyoo, jaka ko sonna maa nii! Ko honɗun non wi'anɗaa men ko bandiraawo maa?»
Issaaqa jaabii mo: «Ko mi wi'ani ɗun ko kulol wareede sabu makko.»
10 Abii-Maaliki wi'i: «Ko honɗun waɗanɗaa men ɗun? Seeɗa nii goɗɗo e jamaa on waalida e sonna maa, harayno a wonii sabu bonnere amen.»
11 Ontuma Abii-Maaliki yamiri jamaa on fow, o wi'i: «Kala fawuɗo jungo e oo gorko maa sonnaajo makko on, ontigi donkinirte mayde.»
12 Issaaqa remi e ndin leydi, o soɲiti e nden hitaande sowanɗe teemedere ko o sankunoo kon, ko fii Joomiraaɗo on waɗii barki e makko. 13 O alɗi, ngun ngalu makko ɓeydii ɓeydaadee haa o wonti tiiɗuɗo e ngalu. 14 Himo joginoo gureele na'i e dammi e jiyaaɓe ɗuuɗuɓe, ɗun fow woni sabu ko Filistiyankeeɓe ɓen nawliri mo. 15 Kala boyli ɗi jiyaaɓe ben makko ɓen jasunoo e fewndo ngurndan ben makko Ibraahiima, Filistiyankeeɓe ɓen uddiri ɗi leydi.
16 Ontuma Abii-Maaliki wi'i Issaaqa: «Yaltu ka amen, ko fii a ɓurii men doole.»
17 Onsay Issaaqa yahi ka aynde Garaara, o hoɗi ɗon. 18 Kanko Issaaqa o jasitii boyli ndiyan jasanooɗi fewndo ben makko Ibraahiima ɗin, ɗin ɗi Filistiyankeeɓe ɓen uddunoo ɓaawo faatagol Ibraahiima. O innitiri ɗin boyli inɗe ɗe ben makko innunoo ɗi ɗen.
19 Kurkotooɓe Issaaqa ɓen jasi ka aynde ɗon kadi, ɓe hawri ɗon e ɗatal ndiyan laaɓuɗan. 20 Kono ngaynaakooɓe Garaara ɓen yeddondiri e ngaynaakooɓe Issaaqa ɓen, hiɓe wi'a: «Ko menen jeyi ɗan ndiyan.» Ko ɗun waɗi si o inni ndun woyndu *Esek, ko fii ɓe yeddondirno e makko.
21 Kurkotooɓe Issaaqa ɓen jasi kadi woyndu goo, ɓe yeddondiri fii mayru ɗon kadi. O inni ndun ɗon *Sitiina. 22 O immii e nden nokkuure, o yahi, o jasoyi woyndu goo. Ndun ɗon non yeddondiral waɗaali fii mayru. O inni ndun *Rahuubuuta, ko fii o wi'uno: «Jooni Joomiraaɗo on yeɗii men nokkuure yaajunde, awa men ɓantoto e ndii leydi».
23 O iwi ɗon, o yahi Birsabaa. 24 Joomiraaɗo on feeɲani mo e on jemma, o daali: «Ko min woni Alla Ibraahiima ben maa. Wota a hulu ko fii miɗo wondi e maa, mi barkinte, mi yaɲɲay jurriya maa on sabu Ibraahiima kurkaadu an ndun.» 25 Issaaqa darni ɗon layyorde, o jantii innde Joomiraaɗo on. O darni suudu makko bagi e nden nokkuure. Onsay kurkotooɓe makko ɓen jasi ɗon woyndu.
26 Abii-Maaliki iwi Garaara, ari ka makko, wondude e oo giɗo makko wi'eteeɗo Ahuusata, e Fiikuula hooreejo konu makko ngun. 27 Onsay Issaaqa wi'i ɓe: «E ko honɗun addi on ka an, ɓay on aɲuno lan, raɗiɗon mi ka mon?»
28 Ɓen jaabii: «Men ndaarii, men tawii Joomiraaɗo on no wondi e maa. Ko ɗun waɗi si men wi'i: ‹Woondoore wonii hakkunde men, hakkunde amen e maa. Awa ƴettoden ahadi 29 wondema a waɗataa men hay fus ko boni, ɓay menen men tampinaano ma, ko moƴƴere tun men waɗanno-maa, men acci yahuɗaa e dow ɓuttu, an oo mo Joomiraaɗo on waɗi barki e mun fewndo ɗoo.› »
30 Onsay Issaaqa waɗani ɓe caatal, ɓe nafii, ɓe yari. 31 Ontuma ɓe immii bimbi law, ɓe woondindirani. Issaaqa watti ɓe e laawol, ɓe hooti e dow ɓuttu.
32 Nden ɲande tigi kurkotooɓe Issaaqa ɓen ari humpiti mo fii woyndu ndu ɓe jasi ndun, ɓe wi'i mo: «Men heɓii ndiyan!». 33 Issaaqa inni ndun woyndu *Sabaa, ko ɗun waɗi si nden saare no innee haa jooni *Birsabaa.