Fii Mayde Ibraahiima
25
1 Ibraahiima resuno debbo goo kadi wi'eteeɗo Qatuuratu. 2 On jibinani mo Zimraanu e Yuqsaanu e Madaani e Midiyaani e Yisbaaqa e Suhaa. 3 Ko Yuqsaanu kadi daɲanaa Sabaa e Dedaanu. Ɓiɓɓe Dedaanu ɓen ko Asuuriyanke'en e Latuusiyanke'en e Le'uumiyanke'en. 4 Ɓiɓɓe Midiyaani ɓen ko Ayfaa e Ifru e Hanuuka e Abiida e Aldaata. Awa ko ɓee ɗoo fow woni ɓiɓɓe Qatuuratu ɓen.5 Ibraahiima ƴetti ko o jeynoo kon fow, o okki Issaaqa. 6 E fewndo ngurndan makko kanko Ibraahiima, o yeɗuno ɓiɓɓe taaraaɓe makko ɓen geɓe, o pottini ɓe takko Issaaqa ɓiɗɗo makko on, o nawri ɓe e leydi hikkorndi funnaange.
7 Ngurndan Ibraahiima ɗan fow hawri duuɓi teemedere e cappanɗe jeeɗiɗi e jowi. 8 Ibraahiima foofi foofaango mun sakkitoro ngon, o faatii e hoore nayeewu hittungu, e nder yeɗeede ngurndan e balɗe, o tawtoyi maamaaɓe makko ɓen. 9 Issaaqa e Ismaa'iila ɓiɓɓe makko ɓen wattinoyi mo e ndee fammeere Makfilati, wonde e mbaa ngesa Ifruuna mo Suhaara Hissiyankeejo on, ɗun ko yeeso Mamra. 10 Ko mban ngesa Ibraahiima soodunoo e juuɗe ɓee Hissiyankeeɓe. Ko ɗon kanko Ibraahiima o belnidaa e ɓeyngu makko Saarata. 11 Ɓawto mayde Ibraahiima, Allaahu on waɗi barki e Issaaqa ɓiɗɗo makko on, on hoɗunooɗo takko nduu Woyndu Lahay-Ru'ii.
Fii Jurriya Ismaa'iila on
12 E hino jurriya Ismaa'iila ɓiɗɗo Ibraahiima mo Haajirata Misirayankoojo on daɲannoo Ibraahiima on, ɗun ko on korɗo Saarata. 13 E hino inɗe ɓiɓɓe Ismaa'iila ɓen wano ɓe heccindiriri non: afo Ismaa'iila on ko Nabaayuuta, hikki ɗon Qidaaru e Adab'iila e Mibsaama 14 e Mismaa'u e Duuma e Massa 15 e Hadaada e Tiima e Yatuura e Naafisa e Qidaama. 16 Ko ɓee ɗoo woni ɓiɓɓe Ismaa'iila ɓen, gila ka daakaaji maɓɓe haa naɓani ka koɗooli maɓɓe. Ko ɓee rimɓe sappoo e ɗiɗo ɗoo wonnoo e hoore jamaaji maɓɓe ɗin.
17 Ngurndan Ismaa'iila ɗan fow hawri duuɓi teemedere e cappanɗe tati e jeeɗiɗi. O foofi foofaango makko sakkitoro ngon, o faatii, o tawtoyi maamaaɓe makko ɓen. 18 Ɓen Ismaa'iilayankeeɓe no hoɗunoo gila Hawiila haa naɓani Suura, ɗun ko ka funnaange Misira telen yaarugol Asuura. Ɓe woni feereeɓe e telen-ma siɓɓe maɓɓe ɓen fow.
Fii Taariika Issaaqa e Jurriya mun on
19 E hino taariika Issaaqa ɓiɗɗo Ibraahiima on. Ibraahiima ɗaɲi Issaaqa. 20 Fewndo Issaaqa heɓi duuɓi cappanɗe nay, o resi Rifqatu, oo jiwo Batuu'iila Araamiyankeejo iwɗo Fadaani-Araama. Tawi Rifqatu on ko bandiraawo Labaanu.
21 Issaaqa torii Joomiraaɗo on fii ɓeyngu mun, ko fii hari on jiidaaki. Joomiraaɗo on jaabini tornde makko nden, ɓeyngu makko Rifqatu ƴetti reedu. 22 Ɓen ɓiɓɓe woni e guuwindirgol ka nder reedu neene maɓɓe. Onsay o wi'i: «Ko honɗun woni lan heɓude?» O yahi, o landoyii Joomiraaɗo on.
23 Onsay Joomiraaɗo on daalani mo:
«Leƴƴi ɗiɗi no ka nder reedu maa,
ɗin jamaaji ɗiɗi iwayɗi e maa seedoyay.
Jamaa goo ɓuroya oya doole,
awa kadi ko mawɗo on kurkanoytoo tosooko on.»
24 Ɓay saa'i jibingol makko hewtii, tawi ko funeeɓe o saawi. 25 Tawi adaaɗo jibineede on ko boɗeejo, hari ɓandu makko ndun ko leeɓindu, ɓe inni on ɗon *Iisu. 26 Ɓawto ɗun, miɲan makko jibinaa. Tawi himo jogitii Iisu ka teddudi. Ko ɗun woni sabu ɓe innude mo *Yaaquuba. Hari Issaaqa ko mo duuɓi cappanɗe jeegoo fewndo o daɲanaa ɓen.
27 Ɓay ɓen fayɓe njanɗii, Iisu woni waaɲoowo, aaden buruure. Yaaquuba kaɲun woni aaden deeƴuɗo, daakiiɗo ka hoɗo. 28 Issaaqa kaɲun yiɗi Iisu, ɓay hari teewu mbaroodi no welaynoo mo. Rifqatu kan yiɗi Yaaquuba.
29 Ɲande goo tawi Yaaquuba no defude maafe. Iisu ari, no iwri ka buruure no weelaa fota. 30 Onsay Iisu wi'i Yaaquuba: «Tinno jonnaa mi oo maafe boɗeejo ɗoo mi ɲaama, ko fii miɗo weelaa fota.» (Ko ɗun waɗi si Iisu jammaa Aduuma.)
31 Yaaquuba jaabii mo: «Yeeyan taho afoyaagal maa ngal.»
32 Iisu jaabitii mo: «E hino miɗo e daande mayde, ko honɗun ngal afoyaagal nafatammi?»