Fii Resaneede Issaaqa
24
1 Tawi Ibraahiima wonii nayeejo fota, duuɓi makko ɗin toowii, hari kadi Joomiraaɗo on waɗiino barki e makko e ɗi fow. 2 Ibraahiima wi'i mbatulaajo mun mawɗo on ka galle, on mo o halfini jawle makko ɗen fow: «Sornu jungo maa ngon ka ley busal an ɗoo. 3 Mi woondinire Joomiraaɗo on, on Alla Jom leydi e kammu, wondema a ƴamantaa oo ɓiɗɗo an ɓee jiwɓe Kanaaniyankeeɓe ɓe mi hoɗi hakkunde mun, 4 kono a yahay ka leydi amen, ka musidal an, ƴettanoyaa ton Issaaqa ɓiɗɗo an on ɓeyngu.»5 Mbatulaajo on jaabii mo: «Kono si tawoyii non on jiwo jaɓoyaali men arda gaa, haray yo mi naɓoy ɓiɗɗo mon on ka leydi ka iwuɗon ton?»
6 Ibraahiima wi'i: «Rento e naɓugol ɓiɗɗo an on ton! 7 Joomiraaɗo on, on Alla Jom kammu ngun, on yaltinɗo lan ka suudu ben an e ka leydi musidal an, on daalannooɗo lan, woondanimmi, wondema o okkay ndii leydi jurriya an on. Ko on tigi ardinoyta malaa'ikaajo mun on yeeso maa fii no suɓoranoɗaa ton ɓiɗɗo an on ɓeyngu. 8 Si jiwo on jaɓoyaali ardon, haray woondoore nde mi woondin-maa nden fawaaki ma. Kono wota a nattu tun ɓiɗɗo an on ton.» 9 Onsay mbatulaajo on sorni jungo mun ngon ka ley busal Ibraahiima jom makko, o woondani mo fii ɗun.
10 Onsay on mbatulaajo ƴetti ngelooɗi sappo e nder ngelooɗi jom mun ɗin, o fokkiti, o naɓori kala noone jawle ɗe jom makko marnoo. O immii, o yahi *Araama-Naharayni, o hewti ka saare Naahuura. 11 O jiccini ngelooɗi ɗin ka ɓaawo saare, e binde woyndu ndiyan, ɗun hawri telen kiikiiɗe fewndo rewɓe ɓen arata ƴoogugol.
12 Onsay o wi'i: «Ko an yo Joomiraaɗo, an Alla jom an Ibraahiima, mi torike ma, hawrindinan hande, hollaa Ibraahiima jom an giggol sella-findewol. 13 E hino lan ka mi darii e binde nduu ɓundu ndiyan, fewndo ka ɓee jiwɓe ndee saare arata ƴoogugol ɗon. 14 Yo jiwo mo mi wi'i yo liiƴanan loonde mun nden mi yara woo, on jaabii lan: ‹Yaru, mi yarnante kadi ngelooɗi maa ɗin›, yo tawu ko on suɓaniɗaa Issaaqa oo jiyaaɗo maa. Ko nii mi andirta wonde a hollii jom an giggol sella-findewol.»
15 Hay o gaynaali yewtude ɗun, hawri Rifqatu yaltitii, no wakkii loonde. Tawi on ko jiwo Batuu'iila, mo Milkatu ɓeyngu Naahuura ben gooto Ibraahiima on. 16 Tawi on ko curbaajo labaaɗo fota, mo andaali gorko. O jippii ka ɓundu, o ƴoogi, o ƴawi.
17 Onsay on mbatulaajo dogi, fotti e makko, wi'i mo: «Mi torike ma, okkoran ndiyan seeɗa ka loonde maa, mi yara.»
18 Jiwo on jaabii: «Yaree yo koohoojo an.» O hittini liiƴangol mo loonde nden, o okkori mo o yari. 19 Ɓay jiwo on okkorii mo o yarii, jiwo on wi'i mo: «Mi ƴooganay ngelooɗi mon ɗin kadi, ɗi yara haa ɗi ɗonɗita.» 20 O wayli heddiiɗan ɗan ɗon e nder kunnawal, o dogi, o ƴoogoyi kadi ko yonata ngelooɗi ɗin fow. 21 Onsay gorko on ndaari jiwo on, o deƴƴiti fii andugol si tawii Joomiraaɗo on okkii mo kutu e laawol makko ngol.
22 Ɓay ngelooɗi ɗin gaynii yarude, gorko on ƴetti kurundahun kun garam jowi kaŋŋe e mulle ɗiɗi kaŋŋe ɗe garam teemedere, o jonni mo ko o waɗa ka juuɗe makko. 23 Onsay o wi'i jiwo on: «Mi torike ma, yeeto lan, an ko mo a hombo? Hara men heɓay ka ben maa ton ka men waala?»
24 Jiwo on jaabii mo: «Min, ko mi jiwo Batuu'iila, oo ɓiɗɗo gorko mo Milkatu jibinannoo Naahuura.» 25 O wi'i kadi: «Meɗen mari ɲagama e huɗo buy, e nokkuure ka waalee.»
26 Ontuma on gorko jiccii, sujjani Joomiraaɗo on, 27 o wi'i: «Yo mantoore wonan Joomiraaɗo on, on Alla Ibraahiima jom an, on mo selnaali ngol giggol mun sella-findewol e jom an. Joomiraaɗo on ardike lan haa e ɗee galle ɓee siɓɓe jom an.»
28 Onsay jiwo on dogi, o yahi ka suudu neene makko, o filloyii ko waɗi kon. 29 Tawi Rifqatu, on jiwo, no mari kotiraawo wi'eteeɗo Labaanu. Onsay Labaanu dogi fii yiidoygol e on gorko wonɗo ka ɓundu. 30 No o yiirunoo kun kurundahun e ɗen mulle ka juuɗe bandiraawo makko on, o nani kadi ko Rifqatu bandiraawo makko on wi'i kon wonde: «Oo gorko wi'irii lan nii», onsay o ari, o tawi on gorko no darii ka takko ngelooɗi mun e binde ndun ɓundu. 31 Labaanu wi'i mo: «Aree, yo onon ɓe Joomiraaɗo on waɗi barki e mun! Ko fii honɗun wonanɗon ka yaasi gaa? Mi woncitanii on suudu ndun e nokkuure fii ngelooɗi ɗin.»
32 Onsay on gorko naati ka suudu. Dolle ɗe ngelooɗi ɗin rondinanoo ɗen jippinaa, ɗi addanaa ɲagama e huɗo. Ɓe addani gorko on e ɓe o wondi ɓen ndiyan ko ɓe sembora. 33 Ɓe ɓannani mo ko o ɲaama. Kono o wi'i: «Mi ɲaamataa ɗoo e mi wowlude fii ko addimmi kon.» Onsay Labaanu wi'i: «Awa, maakee.»
34 O wi'i: «Min ko mi mbatulaajo Ibraahiima. 35 Joomiraaɗo on waɗii barki e jom an fota, o wontii aaden tedduɗo. Joomiraaɗo on yeɗii mo na'i e dammi, kaalisi e kaŋŋe, kurkotooɓe worɓe e rewɓe, ngelooɗi e mbabbi. 36 Hari Saarata sonnaajo jom an on nawyii fota si o jibinani jom an Ibraahiima ɓiɗɗo gorko. Awa ko on ɓiɗɗo woni ko o okki kala ko o jeyi. 37 Awa kadi jom an Ibraahiima woondinanno wota mi ƴettan ɓiɗɗo makko on ɓee jiwɓe Kanaaniyankeeɓe ɓe o woni ka leydi mun, 38 kono yo mi yahu ka galle ben makko, hara ko ka musidal makko tigi, mi ƴettanoya ɓiɗɗo makko on ɓeyngu.
39 «Onsay mi landii jom an Ibraahiima: ‹Si tawoyii non jiwo on jaɓoyaali men arda?›
40 «Jom an jaabitii, wi'i: ‹On Joomiraaɗo an, mo mi wuuri yeeso mun, ardinay malaa'ikaajo makko on yeeso maa fii no heɓiraa kutu e laawol maa ngol. Onsay a ƴettanay ɓiɗɗo an on ɓeyngu ka musidal an, hara ko ka galle ben an tigi. 41 Si a hewtoyii ka musidal an, haray woondoore nde mi woondin-maa nden fawaaki ma. Hay si ɓe salanike ma jiwo on, haray woondoore nde mi woondin-maa nden fawaaki ma.›
42 «Ko mi hewti hande ka ɓundu, mi wi'i Joomiraaɗo on: ‹Ko an yo Joomiraaɗo, Alla Ibraahiima jom an, si tawii hiɗa woniri okkugol lan kutu e ngol laawol an ɗoo, 43 haray miɗo darii ka binde ɓundu ndiyan ɗoo, yo jiwo aruɗo ɗoo ƴoogugol mo mi wi'i yo okkoran ndiyan seeɗa ka loonde mun, mi yara woo, 44 on jaabii lan: ‹Yaree, mi ƴooganay ngelooɗi mon ɗin kadi›, yo tawu ko on Joomiraaɗo on suɓanii ɓiɗɗo jom an on.›
45 «Hay mi gaynaali wowlude ɗun ka ɓernde an, hawri Rifqatu yaltitii, no wakkii loonde, o jippii ka ɓundu, o ƴoogi. Onsay mi wi'i mo: ‹Mi torike ma, okkoran mi yara.› 46 O hittini liiƴugol loonde nden, o wi'i: ‹Yaree, mi yarnay ngelooɗi mon ɗin kadi.› Mi yari, o yarni ngelooɗi ɗin kadi. 47 Onsay mi landii mo non ko mo o hombo. O wi'immi ko o jiwo Batuu'iila, mo Milkatu jibinannoo Naahuura on. Ontuma mi waɗani mo kurundahun kun ka kinal makko, e mulle ɗen ka juuɗe makko. 48 Onsay mi jiccii, mi sujjani Joomiraaɗo on, mi manti Joomiraaɗo on, on Alla Ibraahiima jom an, ardiiɗo lan, fewnimmi e laawol goongawol fii yo mi ƴettan ɓiɗɗo jom an on ɓeyngu, ɗun-le ko taaniraawo ben gooto jom an on. 49 Jooni non, si tawii on waɗanay jom an giggol sella-findewol, andinee lan. Si ko liddu mun kadi andinon mi, mi anda si mi yaaray nano maa ɲaamo.»
50 Labaanu e Batuu'iila jaabii, wi'i: «Ɗunɗoo ko immorde e Alla, men waawataa ma wi'ude bonii maa moƴƴii. 51 E hino ɗoo Rifqatu yeeso maa, ƴettu mo, naɓaa, yo o wonu sonnaajo geɗal jom maa wano Joomiraaɗo on hoddiri non.»
52 Ɓay on mbatulaajo Ibraahiima nanii ɗin konguɗi maɓɓe, o sujjani Joomiraaɗo on ka leydi. 53 Ontuma on mbatulaajo yaltini cuɗaariiji, kaalisi e kaŋŋe e conci, o jonni Rifqatu. O waɗani kadi kotiraawo jiwo on e neene maɓɓe ko kelɗi. 54 Ɓay feƴƴii e ɗun, kanko mbatulaajo on e ɓe o wondunoo ɓen, ɓe ɲaami, ɓe yari, ɓe waali ɗon.
Ɓay ɓe immike bimbi, mbatulaajo on wi'i: «Newnanee lan non jooni, mi yiltitoo ka jom an.»
55 Kono kotiraawo jiwo on e neene maɓɓe wi'i: «Accu men wonda e jiwo on ɗoo taho, hay si ko balɗe sappo, ontuma on yahay.»
56 Onsay mbatulaajo on jaabii ɓe: «Ɓay Joomiraaɗo on okkii lan kutu e laawol an ngol, mi torike on, wota on tongan ɗoo. Newnanee lan tun mi yiltitoo ka jom an.»
57 Onsay ɓe jaabii mo: «Awa nodden jiwo on, landoɗen mo kanko kadi.» 58 Ɓe noddi Rifqatu, ɓe wi'i mo: «Hiɗa yiɗi yaadugol e oo gorko?»
O jaabii: «Mi yahay.»
59 Ontuma ɓe watti Rifqatu bandiraawo maɓɓe on e laawol, o yaadi e debbo dankinooɗo mo on wondude e mbatulaajo Ibraahiima on e worɓe ɓe o wondunoo ɓen. 60 Onsay ɓe du'anii Rifqatu, ɓe wi'i: «Ko an yo bandiraawo amen, yo a wontu guluuje guluuje, yo jurriya maa on halor koɗooli ayɓe mun ɓen.»
61 Ontuma Rifqatu immodi e jiwɓe wondiɓɓe mun ɓen, ɓe ƴawi ka ngelooɗi, ɓe jokki gorko on. Ontuma on mbatulaajo yaadi e Rifqatu.
62 Ɗun hawrondiri Issaaqa eggii ka o wonnoo ɗon e takko nduu woyndu wi'eteendu Woyndu Lahay-Ru'ii, tawi himo daakoyii e ndii leydi Negeeba. 63 Kiikiiɗeere goo, tawi Issaaqa no yalti fontugol koyɗe ka buruure, tun o ɓanti gite, o haynii ngelooɗi no ara. 64 Onsay Rifqatu kadi ɓanti gite, haynii Issaaqa. O jippii ka hoore ngelooba. 65 O wi'i mbatulaajo on: «Ko hombo woni oo gorko mo wonɗen fottude e mun, no iwra ka buruure too?»
Onsay mbatulaajo on jaabii mo: «Ko koohoojo an on nii!» Ontuma Rifqatu ƴetti tiggaare mun nden, o tiggii.