Fii Mayde Saarata e no o Surriraa
23
1 Duuɓi Saarata ɗin fow hawri duuɓi teemedere e noogay e jeeɗiɗi, ko ngurndan makko ɗan fow non. 2 Ko e ndee saare wi'eteende Qiriyat-Arba'a o faatii, ɗun ko Habruuna e nder ndii leydi Kanaana. Ibraahiima yahi heynii Saarata, fesi mo.3 Ontuma Ibraahiima immii takko furee on, o yahi, o wi'oyi Hissiyankeeɓe ɓen: 4 «Ko mi koɗo e tuŋarankeejo hakkunde mon. Wallee lan mi heɓa berɗe halal ka mon ɗoo fii yo mi heɓu ka mi surra ɓeyngu an.»
5 Hissiyankeeɓe ɓen jaabii Ibraahiima, ɓe wi'i: 6 «Heɗitee men, yo koohoojo amen. Ko on ɓe Allaahu on waɗi mawɓe e hakkunde amen. Suɓee ka ɓurani on woo e hakkunde berɗeeji amen ɗin ka surron mayɗo mon on. Hay gooto e amen salantaako on berɗe mun ka surron mayɗo mon on.»
7 Onsay Ibraahiima immii, jiccanii yimɓe ndin leydi, ɗun ko Hissiyankeeɓe ɓen, 8 o wi'i ɓe: «Si on jaɓii, yo mi wattin mayɗo an on ka leydi mon ɗoo, haray mi torike on, toranee lan Ifruuna mo Suhaara 9 yo o hendinan ndee fammeere makko Makfilati wonde ka sera ngesa makko, o yeeyammi nde coggu timmungu e tawnde mon fii yo nden wonanan berɗe halal.»
10 Tawi Ifruuna no jooɗodi e Hissiyankeeɓe. Onsay kanko Ifruuna Hissiyankeejo on o jaabii Ibraahiima e tawnde ɓen Hissiyankeeɓe, wondude e kala wonnooɓe naatude ka saare makko, o wi'i: 11 «Oo'o, heɗee lan yo koohoojo an, mi okkii on ngesa mban. Mi okkidii on mba e fammeere wonde ɗon nden. Mi okkii on ɗun e tawnde yimɓe an ɓen fow. Surree ɗon mayɗo mon on.»
12 Ibraahiima jiccii kadi yeeso ɓen yimɓe ndin leydi, 13 o jaabii Ifruuna e tawnde yimɓe leydi ndin, o wi'i: «Min kadi heɗito lan, accu jaɓaa mi jonne coggu ngesa mban, fii no mi surrira ɗon mayɗo an on.»
14 Ifruuna jaabitii Ibraahiima, o wi'i mo: 15 «Heɗee lan, yo koohoojo an: hara leydi jaroori tammaaji teemeɗɗe nay kaalisi, ɗun ko honɗun hakkunde men? Surree tun mayɗo mon on.»
16 Ibraahiima jaɓi ko Ifruuna wi'i kon. Onsay o yoɓi mo ngun coggu ngu o hottinoo e tawnde ɓen Hissiyankeeɓe, ɗun ko tammaaji teemeɗɗe nay kaalisi ɗi njulaaɓe ɓen huutoraynoo ɗin. 17 Ko nii mban ngesa Ifruuna wonba Makfilati, ɗun ko yeeso Mamra, wondude e nden fammeere wonde e nder mabba e kala leɗɗe wonɗe ka nder ngesa, 18 wontirani Ibraahiima halal. Ɗun waɗi e tawnde ɓen Hissiyankeeɓe, wondude e kala wonnooɓe naatude ka saare makko.