Fii Sunna Ibraahiima on
22
1 Ɓawto ɗun, Allaahu on ndarndii Ibraahiima, o daalani mo: «Ibraahiima!».Ibraahiima jaabii: «Naamu! E hino lan.»
2 Allaahu on daalani mo: «Ƴettu ɓiɗɗo maa bajjo on, on mo yiɗuɗaa, ɗun ko Issaaqa, yahaa e ndii leydi Moriyaa, ittoyaa mo ɗon sadaka sunneteeɗo e hoore wongo e pelle ɗe mi holloyay maa ɗen.»
3 Ibraahiima immii bimbi law, o fecci leɗɗe fii sunna on, o haɓɓi mbabba makko mban, o ƴetti Issaaqa ɓiɗɗo makko on e kurkaaduuɓe makko ɗiɗo, o immii, o yahi e nden nokkuure nde Allaahu on daalani mo fii mun. 4 Ka ɓe heɓunoo ɗon balɗe tati yaadu, Ibraahiima ɓanti gite, o haynii nden nokkuure ka woɗɗitii. 5 Onsay Ibraahiima wi'i kurkaaduuɓe makko ɓen: «Luttidee ɗoo e mbabba mban haa min e kun paykun men yaha too, men rewoya Alla. Ontuma men arta, men tawta on ɗoo.»
6 Ibraahiima ƴetti leɗɗe sunna ɗen, o rondi ɗe Issaaqa ɓiɗɗo makko on, kanko o ƴetti laɓi kin e yiite ngen. Ɓe yaadi kamɓe ɗiɗo. 7 Onsay Issaaqa wi'i ben mun Ibraahiima: «Baaba en!»
Ibraahiima jaabii: «Naamu boobo an.»
Issaaqa wi'i: «E hino yiite ngen e leɗɗe ɗen, kono ko honto non baalii sunna ngin woni?»
8 Ibraahiima jaabii: «Boobo an, Allaahu on tigi ndaaray fii ngin baalii sunna.» Ɓe jokki yaadu maɓɓe.
9 Ɓay ɓe hewtii e nden nokkuure nde Allaahu on daalannoo mo fii mun, Ibraahiima moƴƴini ɗon layyorde, o fawi ɗon falimaaje ɗen. O haɓɓi Issaaqa ɓiɗɗo makko on, o wallini ka hoore falimaaje. 10 Onsay Ibraahiima fonti jungo, ƴetti laɓi kin fii layyagol Issaaqa ɓiɗɗo makko on. 11 Ɗon kisan, Malaa'ikaajo Joomiraaɗo on noddi mo kanko Ibraahiima iwrude ka kammu, o wi'i: «Ibraahiima! Ibraahiima!»
O jaabii: «Naamu! E hino lan!»
12 Onsay malaa'ikaajo on wi'i mo: «Wota a fawu paykun kun jungo, wota a waɗu kun hay huunde. Ko fii jooni mi andii ko a huloowo Alla, ɓay a salanaaki lan ɓiɗɗo maa bajjo on.»
13 Ibraahiima ɓanti gite, haynii ngaari baalii ɓaawo mun ndi galaaɗi mun fallii e pitahun. Onsay Ibraahiima yahi, addoyi ndin ngaari baalii, o hetti ngin sunna lonto ɓiɗɗo makko on. 14 Ibraahiima inni nden nokkuure: Faabo Joomiraaɗo on. Ko ɗun waɗi si no wi'ee haa hande: «Faabo heɓoto ka fello Joomiraaɗo on.»
15 Malaa'ikaajo Joomiraaɗo on noddi Ibraahiima kadi iwrude ka kammu, 16 wi'i mo: «Mi woondirii hoore an, ko Joomiraaɗo on daali ɗun, ɓay a waɗii ɗun, a salanaaki lan ɓiɗɗo maa gorko bajjo on, 17 mi waɗay barki e maa fota, mi yaɲɲay jurriya maa on yaɲɲudee, ɓe wa'a wa koode ɗen ka kammu e wa njaareendi ndin ka sera baharu. Jurriya maa on haloray ca'e ayɓe mun ɓen. 18 Ɓay a ɗoftike kongol an ngol, leƴƴi aduna on fow barkinte sabu jurriya maa on.»
19 Onsay Ibraahiima e Issaaqa yiltitii, tawtoyi kurkaaduuɓe mun ɓen, ɓe yiltodi Birsabaa. Ibraahiima hoɗi ɗon.
Fii Ɓiɓɓe Naahuura ɓen
20 Ɓawto ɗun, Ibraahiima humpitii wonde Milkatu, ɓeyngu Naahuura ben gooto makko on, jibinii ɓiɓɓe worɓe. 21 Ɓen ɓiɓɓe ko Uusaa, ko on woni afo on, e Buusaa miɲan makko, e Qamuu'iila, ko on woni ben Araama, 22 e Kaasada e Hazuwa e Fildaasa e Yidlaafa e Batuu'iila. 23 Batuu'iila daɲanaa Rifqatu. Ko ɓee ɓiɓɓe worɓe njeetato ɗoo Milkatu jibinani Naahuura, on ben gooto Ibraahiima. 24 Hari Naahuura no mari *taaraajo goo, on no wi'ee Ra'uumatu, on kadi jibinani mo ɓee ɗoo, ɗun ko Taabaha e Gaahama e Taahasa e Ma'aka.