Fii Jibineede Issaaqa
21
1 Allaahu on faabii Saarata, o waɗirani mo wano o daalirnoo non. 2 Saarata ƴetti reedu, jibinani Ibraahiima ɓiɗɗo gorko e nder nayeewu Ibraahiima. Ɗun waɗi e saa'i mo Alla wi'unoo mo on. 3 Ibraahiima inni on ɓiɗɗo gorko, mo Saarata jibinani mo, *Issaaqa. 4 Ibraahiima sunnini Issaaqa ka balɗe jeetati makko, o waɗiri ɗun wano Alla yamirnoo mo non. 5 Hari Ibraahiima ko mo duuɓi teemedere fewndo o daɲanaa Issaaqa mo makko. 6 Ontuma Saarata wi'i: «Allaahu on jalnii lan, kala nanuɗo ɗunɗoo jaliday e an.» 7 O wi'i kadi: «Ko hombo wi'aynoo Ibraahiima, Saarata muyninanay mo ɓiɓɓe? Kono-le mi heɓanii mo ɓiɗɗo e nder nayeewu makko.»Fii no Haajirata Raɗoraa
8 Ɓay boobo on njanɗii haa entaama, nden ɲande ben makko Ibraahiima waɗi caatal mawngal. 9 Onsay Saarata yi'i Ismaa'iila mo Haajirata Misirayankoojo on daɲannoo Ibraahiima on no jala. 10 Ontuma Saarata wi'i Ibraahiima: «Raɗo oo korɗo e ɓiɗɗo mun on, ko fii ɓiɗɗo oo korɗo ronidataa e Issaaqa mo an.»
11 Ngol kongol satti e Ibraahiima fota, ɓay Ismaa'iila kadi ko ɓiɗɗo makko. 12 Kono Allaahu on daalani Ibraahiima: «Wota fii oo korɗo maa e ɓiɗɗo mun sattu e maa. Nanan Saarata kala ko o wi'u maa, ko fii ko e Issaaqa jurriya maa on nodditirtee. 13 Mi waɗay e ɓiɗɗo korɗo maa on leɲol mawngol, ɓay on kadi ko o jurriya maa.»
14 Ibraahiima immii bimbi law, o ƴetti ɲaametee e sasa ndiyan, o jonni Haajirata, o fawi ɗun ka balbe makko, o raɗodi mo e ɓiɗɗo makko on. Ɓe yahi, ɓe woni e yiilagol ka wulaa Birsabaa.
15 Ɓay ndiyan ɗan ka sasa lannii, o wallini paykun kun ɗon e ley lekkun. 16 O pottitori paykun kun embere fampannde ndagawal, o jooɗii ɗon, ko fii hari himo wi'a: «Wota mi yi'u ka paykun kun maayata.» O fewtiri ka paykun kun woniri ton, o nangi e fesugol towna.
17 Allaahu on nani hawa paykun kun. Onsay Malaa'ikaajo Allaahu on noddi Haajirata iwrude ka kammu, wi'i mo: «Ko honɗun waɗu-maa Haajirata? Wota a hulu, ko fii Allaahu on nanii hawa paykun kun ka kun woni ɗon.» 18 Malaa'ikaajo on wi'i mo kadi: «Immo, ƴettoyaa paykun kun, jogoɗaa mo moƴƴa, ko fii mi waɗay leɲol mawngol e makko.»
19 Allaahu on holli mo ɗon woyndu ndiyan. O yahi, o hebbini sasa on ndiyan, o ari, o yarni paykun kun.
20 Allaahu on wondi e kun paykun, ɓay kun njanɗii, kun hoɗoyi ka wulaa, kun woni waaɲiroohun laaɲal. 21 Ko ka wulaa Paraana kun hoɗunoo. Onsay neene makkun resani kun debbo iwuɗo leydi Misira.
Fii Ahadi ndin Hakkunde Ibraahiima e Abii-Maaliki
22 Ko e on saa'i, Abii-Maaliki e Fiikuula, hooreejo konu makko ngun, ari, wi'i Ibraahiima: «Allaahu on no wondi e maa e kala ko wonɗaa waɗude. 23 Jooni woondiranan ɗoo Allaahu on wondema a janfoytaako lan, min e ɓiɓɓe an ɓen, haa naɓani jurriya an aroyoowo on. Kadi wano min mi moƴƴori e maa non, an kadi a moƴƴoray non e an, min e ndii leydi ndi koɗiɗaa e mun.»
24 Ibraahiima wi'i: «Awa mi woonday.»
25 Kono Ibraahiima feli Abii-Maaliki sabu woyndu ndiyan ndu kurkaaduuɓe Abii-Maaliki ɓen jattunoo mo ndun. 26 Kono Abii-Maaliki jaabii mo: «Min mi andaa ko hombo waɗi ɗun, a wowlanaali lan. Awa kadi haa hande mi nanaali fii ɗun.»
27 Onsay Ibraahiima ƴetti na'i e dammi, okki Abii-Maaliki, kamɓe ɗiɗo ɓe ƴettodi ahadi. 28 Onsay Ibraahiima waɗi baali biigi jeeɗiɗi feere. 29 Abii-Maaliki landii Ibraahiima: «Ko honɗun woni fii ɗii baali biigi jeeɗiɗi ɗi waɗuɗaa feere?»
30 Ibraahiima jaabii: «Ko yo a jaɓu ɗii biigi jeeɗiɗi, fii yo ɗun wonanan seedee wonde ko min jasi ndun woyndu.» 31 Ko ɗun waɗi si nden nokkuure wi'aa *Birsabaa, ko fii ko ɗon ɓen ɗiɗo woondindirannoo.
32 Ɓay ɓe gaynii ƴettodude ndin ahadi Birsabaa ɗon, Abii-Maaliki immii, kanko e Fiikuula, hooreejo konu makko ngun, ɓe yiltitii ka leydi Filistiyankeeɓe ɓen. 33 Onsay Ibraahiima tuti Birsabaa ɗon aslahi, o jantii ɗon innde Joomiraaɗo on, on Alla Poomayankeejo. 34 Ibraahiima koɗino ka leydi Filistiyankeeɓe ɓen ko neeɓi.