Fii Koɗu Ibraahiima ngun Negeeba
20
1 Ibraahiima eggi ka wonnoo ɗon kadi, hammiri e ndii leydi Negeeba. O hoɗoyi hakkunde Kadeesi e Suura, o koɗoyii kadi Garaara. 2 Ko ɗon Ibraahiima wi'i wonde ɓeyngu mun Saarata ko bandiraawo mun. Ontuma Abii-Maaliki lanɗo Garaara on nulani Saarata, o ƴetti mo.3 Ɲande goo jemma, Allaahu on daalani Abii-Maaliki e nder koyɗol, wi'i mo: «A maayii, sabu oo debbo mo ƴettuɗaa, ko fii oo debbo ko ƴettaaɗo.»
4 Wa nden ɲande, hari Abii-Maaliki yiidaali e on debbo, o wi'i: «Enee, Jom an, hara a mulay leɲol hay si ko feewungol? 5 Hinaa Ibraahiima tigi wi'ii lan wondema oo debbo ko bandiraawo makko, kanko debbo on kadi o wi'immi ko o kotoo makko. Awa ko ɓernde laaɓunde e juuɗe laaɓuɗe mi warri ɗun.»
6 Allaahu on daalani mo kadi e nder ngol koyɗol, wi'i mo: «Miɗo andi ko e hoore ɓernde laaɓunde waɗirɗaa ɗun, ko min haɗu-maa waɗugol oo junuubu yeeso an. Ko ɗun waɗi si mi newnanaali ma meemugol on debbo. 7 Jooni non nattu oo debbo ka moodi makko, ko fii on ko annabaajo, on toranto ma fii no wuuriraa. Kono fotu andude si a nattaali mo, pellet a maayay, an e ko jeyɗaa kon fow.»
8 Abii-Maaliki immii bimbi law, o nodditi mbatulaaɓe makko ɓen fow, o fillitanii ɓe fii ɗun fow. Onsay ɓen mbatulaaɓe makko huli fota. 9 Ontuma Abii-Maaliki noddi Ibraahiima, landii mo: «Ko honɗun waɗuɗaa men nii? E ko honɗun mi bonnu-maa haa defuɗaa mi, min e laamateeri an ndin, waɗugol oo bakkatu njano? A waɗinii lan ko haanaaka waɗeede.» 10 Abii-Maaliki wi'i kadi Ibraahiima: «Ko honɗun sikkunoɗaa si warruɗaa nii?»
11 Ibraahiima jaabii mo: «Hari miɗo sikka kulol Alla woo alaa e ndee nokkuure, awa kadi ɓe waray lan sabu ɓeyngu an. 12 Awa kadi, ko o bandiraawo an tigi, ɓay ko men ben-gootooɓe, hinaa non men neene-gootooɓe, e hoore ɗun kadi o wontii ɓeyngu an.» 13 O wi'i kadi: «Nde Allaahu on yaltinnoo lan ka galle ben an, o waɗimmi seteejo, mi wi'i ɓeyngu an: ‹E hino sulfu mo waɗantaa mi on, kala ka yaaruɗen, yo a wi'u ko mi kotoo maa.› »
14 Onsay Abii-Maaliki ƴetti na'i e dammi, e kurkaduuɓe rewɓe e worɓe, o watti e juuɗe Ibraahiima, o jonniti mo kadi ɓeyngu makko Saarata. 15 Abii-Maaliki wi'i mo kadi: «E hino leydi an ndin yeeso maa, hoɗir ka faaliraɗaa woo.»
16 Kanko Abii-Maaliki o wi'i Saarata: «E hino mi jonnii kotoo maa tammaaji wuluure kaalisi, fii yo ɗun wonan ɓe wonduɗaa ɓen fow seedee wondema a felnaaki e yeeso yimɓe ɓen fow.»