Fii Mulugol Saduuma e Amuura
19
1 Malaa'ikaaɓe ɓen ɗiɗo hewtiri Saduuma kiikiiɗe, tawi Luutu no jooɗii ka naatirgal saare. No Luutu haynornoo ɓe, o immii, o yahi jaɓɓagol ɓe, no o fottirnoo e maɓɓe, o sujjani ɓe. 2 Onsay o wi'i ɓe: «Koohooɓe an, mi torike on, naatiree ka an min oo jiyaaɗo mon, mi okkora on ko semboron, waalon, bimbi law dawon feƴƴude.»Ɓe jaabii mo: «Oo'o, men waalay ka fottirde jamaa.»
3 Kono Luutu jeeji ɓe haa ɓe jaɓi, ɓe naatiri ka suudu makko. O waɗani ɓe caatal, o juɗani ɓe bireedi ɗe aldaa e lewen, ɓe nafii.
4 Hari hay ɓe waalaaki si worɓe iwri nokkeeli ɗin fow e nder saare Saduuma nden, gila e sukaaɓe haa e mawɓe, ɓe fow ɓe huuɓi suudu Luutu ndun. 5 Ɓe noddi Luutu, ɓe wi'i mo: «Ko honto ɓee worɓe naatirɓe ka maa e oo jemma ɗoo woni? Yaltinan men ɓe, men jina ɓe.»
6 Onsay Luutu yalti fii yewtidugol e ɓen yimɓe, o ombori baafal ngal ɓaawo makko, 7 o wi'i ɓe: «Ko onon yo musiɓɓe, mi torike on, wota on waɗu oo bone! 8 Jooni mi torike on, ɓay miɗo mari jiwɓe ɗiɗo ɓe andaa gorko, accee mi yaltinana on ɓe, waɗon ɓe ko faalaɗon woo. Fii tun wota on waɗu ɓee worɓe, arɓe fattii haa ka furgere suudu an ɗoo, ko boni.»
9 Ɓe jaabii: «Potto ɗon!» Ɓe wi'i kadi: «Ndaarii oo tuŋarankeejo no ari ɗoo, no waɗitii ɲaawoowo e hoore men. Awa jooni men waɗete ɓuri bone mo men faalaa waɗude ɓeya on!» Onsay ɓe dooli Luutu, ɓe ɓadii baafal ngal fii bonnugol ngal.
10 Ontuma ɓen malaa'ikaaɓe ɗiɗo fonti juuɗe, nangi Luutu, naadi ka nder suudu, ombi baafal ngal. 11 Ontuma ɓe wumini kala wonnooɓe ka dambugal suudu, gila e suka haa e mawɗo, tawi han kadi ɓe waawataa yiitude baafal ngal.
12 Ɓen malaa'ikaaɓe ɗiɗo wi'i Luutu: «Hara hiɗa mari ɗoo siɓɓe goo kadi, maa hiɗa mari esiraaɓe goo, maa ɓiɓɓe rewɓe e ɓiɓɓe worɓe goo, maa ɓe jeyduɗaa goo kadi ka saare ɗoo? Awa yaltin ɓe e nder ndee nokkuure, 13 ko fii men mulay ndee nokkuure. Ko wonaa wulliteede e hoore ɓee yimɓe ka Joomiraaɗo on kon tiiɗii haa Joomiraaɗo on nulii men fii mulugol ndee nokkuure.»
14 Luutu yalti hollitoygol ɗun esiraaɓe mun ƴamanɓe mo jiwɓe makko ɓen, o wi'i ɓe: «Immee, yalton e ndee saare, ko fii Joomiraaɗo on mulay nde woni.» Kono, wa'ani esiraaɓe makko ɓen wa si ko e samakala o woni.
15 Ka peeral fajiri, malaa'ikaaɓe ɓen hawjini Luutu, wi'i mo: «Immo, ƴettaa ɓeyngu maa e jiwɓe maa ɗiɗo ɓe wonduɗaa ɗoo ɓen, yalton e ndee nokkuure, fii wota on mule tuma saare nden donkintee.»
16 Ɓay o nangii nennagol, malaa'ikaaɓe ɓen jogii jungo makko ngon, kanko e ɓeyngu makko e jiwɓe makko ɓen ɗiɗo, sabu yurmeende Joomiraaɗo on e hoore makko, ɓe yaltini ɓe haa ka ɓaawo saare, ɓe acci ɓe ɗon. 17 Ɓay ɓe naɓii ɓe ka ɓaawo saare, goɗɗo e ɓen malaa'ikaaɓe wi'i: «Dogee, dandon wonkiiji mon ɗin, hara on yeƴƴitaaki, on daraaki hay nokku e nder ndee hollaande, yaaron ka pelle fii wota on mule!»
18 Onsay Luutu wi'i ɓe: «Oo'o koohooɓe an, mi torike on. 19 Min, oo jiyaaɗo mon, mi heɓii sulfu mon, on waɗanii lan moƴƴere mawnde fii dandugol wonkii an kin. Kono min mi waawataa dogirde ka pelle, fii wota oo bone hewtito lan, mi maaya. 20 Awa e hino ɗoo koɗolun, ko kun ɓuri lan ɓadaade ka mi fattoyoo. Ɓay hikun fanɗiri nii, accee mi dogira ton, wonkii an kin daɗa.»
21 Malaa'ikaajo on jaabii mo: «Awa fii newnangol ma ko toriɗaa kon kadi, mi mulataa kun koɗolun kun wowluɗaa fii mun. 22 Awa dogu, yahaa tinna, ko fii mi waawataa waɗude hay fus ɗoo e a hewtoyde ton.» (Ko ɗun waɗi si kun koɗolun innaa *Su'aara.)
23 Ko Luutu hewtata Su'aara, hari naange ngen fuɗii. 24 Onsay Joomiraaɗo on saaƴini mbollan yiite e hoore Saduuma e Amuura, iwrude e Joomiraaɗo on ka kammu. 25 O lanci ɗen ca'e ɗiɗi, wondude e nden hollaande, e kala hoɗunooɓe e majje, e kala ko fuɗi ka leydi. 26 Kono ɓeyngu Luutu kaɲun yeƴƴitii, o wonti doosal hayre lanɗan.
27 Bimbi nden ɲande law, Ibraahiima dawi e ndee nokkuure nde o darinoo e mun yeeso Joomiraaɗo on. 28 O ndaariri telen Saduuma e Amuura, o ndaari hollaande nden fow, o haynii duggal no ƴawa ka leydi ton wa'ungal wa curki beembal yiite. 29 Wa fewndo ko Joomiraaɗo on mulata ɗen ca'e ɗiɗi ɗe Luutu hoɗunoo e mun, kanko Joomiraaɗo on o anditi fii Ibraahiima, onsay o suuti Luutu e hakkunde on kasaara.
Fii Luutu e Jiwɓe mun ɓen
30 Luutu yalti Su'aara, kanko e jiwɓe makko ɓen ɗiɗo. Ɓay hari himo huli hoɗugol Su'aara, o hoɗidoyi e jiwɓe makko ɓen ɗiɗo ka fello e nder fammeere. 31 Ontuma jiwo makko afo on wi'i miɲan mun: «E hino jooni ben men nawyii, awa kadi gorko woo alaa ɗoo ko wonda e men wano aduna on fow gerdata non. 32 Aru yarnen ben men njaram *wiiɲu, waaliden e maɓɓe fii no heɓiren jurriya iwrude e maɓɓe.» 33 Nden ɲande jemma, ɓe yarni ben maɓɓe njaram wiiɲu. Jiwo afo on ari waalidi e ben maɓɓe, kono ben maɓɓe andaali fewndo ɗun waɗi.
34 Bimbi nden ɲande afo on wi'i miɲan mun: «E oo jemma feƴƴuɗo ɗoo mi waaliduno e ben men. Hande kadi jemma en yarnay ɓe, an kadi waalidoyaa e maɓɓe fii no heɓiren jurriya iwrude e maɓɓe.» 35 E on jemma ɗon kadi, ɓe yarni ben maɓɓe njaram wiiɲu. Toolaajo on kadi naati, waalidi e ben maɓɓe. Ɗun kadi laatii ben maɓɓe andaali.
36 Jiwɓe Luutu ɓen ɗiɗoo non ƴetti reedu iwrude e ben maɓɓe. 37 Jiwo afo on jibini boobo gorko, o inni mo Mohaabu. Ko on woni maamaajo Mohaabiyankeeɓe ɓen, ɓen no woodi haa hande. 38 Jiwo tosooko on kadi jibini boobo gorko, o inni mo Ban-Ammi. Ko on woni maamaajo Ammoniyankeeɓe ɓen, ɓen no woodi haa hande.