Fii no Jibineede Issaaqa Hiitoraa
18
1 Joomiraaɗo on feeɲani kadi Ibraahiima e takko ɗee leɗɗe mawɗe Mamra, tawi himo jooɗii ka dambugal suudu makko bagi ɲalorma ka fewndo nguleendi. 2 Onsay o ɓanti gite, o haynii worɓe tato no darii yeeso makko. No o haynornoo ɓe, o immii ka dambugal suudu makko, o wubbi fii jaɓɓagol ɓe, o jiccanii ɓe ka leydi, 3 o wi'i: «Jom an, si hiɗa yeɗimmi sulfu, mi torike ma, wota a feƴƴu oo jiyaaɗo maa. 4 Yo ndiyan seeɗa addane on ko semboɗon, onsay fowtoɗon ka ley leggal. 5 Yo mi addanoy on huntere bireedi fii ko sattinoroɗon si feƴƴon, ko fii ko ɗun rewni on ka oo jiyaaɗo mon.»Onsay ɓe jaabii mo: «Awa warru wano wiiruɗaa non.»
6 Ontuma Ibraahiima yahi tinna, tawoyi Saarata ka suudu, o wi'i mo: «Etu tinna sariyaare tati condi farin, piyaa ɗun, moƴƴinaa bireedi.» 7 Kanko Ibraahiima o dogi kadi, o yaari ka wuro, o ƴettoyi ton ɲale laatiinge fayunge, o jonni nge jiyaaɗo makko goo, on moƴƴini nge heɲa. 8 O ƴetti kadi kosan e ɓira keccan, wondude e teewu ɲale defaaɗo on, o ɓannani ɓe. Fewndo ko ɓe ɲaamata, hari himo darii takko maɓɓe ka ley leggal.
9 Onsay ɓe landii mo: «Ko honto ɓeyngu maa Saarata woni?»
O jaabii ɓe: «Himo ka nder suudu bagi ɗoo.»
10 Goɗɗo e maɓɓe wi'i: «Pellet mi yiltitoyto ka maa ɗoo ko arata e oo saa'i, onsay ɓeyngu maa Saarata heɓay ɓiɗɗo gorko.»
Fewndo o wowlata ɗun, tawi Saarata no jentii ɓe ka dambugal suudu mun ɓaawo maɓɓe. 11 Fewndo on saa'i hari Ibraahiima e Saarata nawyii fota, duuɓi maɓɓe ɗin toowii haa hay Saarata acciino yi'ude farilla. 12 Kanko Saarata o jali e ɓernde, himo wi'a: «Hara min, oo jiidiraawo nayeejo, mi heɓay faale? E hino jom an kadi nawyii.»
13 Onsay Joomiraaɗo on daalani Ibraahiima: «E ko fii honɗun Saarata jalani, himo wi'a: ‹Hara ko goonga mi heɓay ɓiɗɗo, min oo nayeejo?› » 14 Joomiraaɗo on daali kadi: «Hara no woodi ko sattanimmi? Ko arata e oo saa'i toɗɗaaɗo, mi yiltitoto ka maa ɗoo, onsay Saarata heɓay boobo gorko.»
15 Ɓay Saarata hulii, o yeddi, o wi'i: «Mi jalaali.»
Kono Joomiraaɗo on daali: «Oo'o, a jalii.»
Fii no Ibraahiima Fattorani Saduuma
16 Ɓay ɓen worɓe fokkitii, ɓe fewtiri Saduuma. Onsay Ibraahiima ɗowti ɓe fii waynondirgol e maɓɓe. 17 Joomiraaɗo on daali: «Hara mi suuɗay Ibraahiima ko mi waɗata kon? 18 Pellet Ibraahiima wonay leɲol mawngol jogiingol doole, awa kadi leƴƴi aduna on fow barkinte sabu makko. 19 Ko ɓay mi suɓorii mo fii yo o yamir ɓiɓɓe makko ɓen e ɓeynguure makko aroyoore ɓaawo makko nden jokkugol laawol an ngol e nder huutorgol peewal e nunɗal, fii no mi laatinirana Ibraahiima ko mi daalannoo mo kon.»
20 Onsay Joomiraaɗo on daali: «Ko wonaa wulliteede e hoore Saduuma e Amuura kon ɗuuɗii, awa kadi junuubu maɓɓe on no tiiɗi fota. 21 Jooni, yo mi jippo, mi ndaara si tawii ɓe waɗii ko wullitaa e an kon fow. Si hinaa non kadi, mi anda.»
22 Ɓen worɓe iwi ɗon, ɓe yaari Saduuma. Kono Ibraahiima kaɲun lutti daraade ɗon yeeso Joomiraaɗo on. 23 Onsay Ibraahiima ɓadii Joomiraaɗo on, wi'i mo: «E hara a halkiday feewuɓe ɓen e bonɓe ɓen? 24 No gasa hara feewuɓe cappanɗe njowo no e nden saare. Taw si a halkay nde, a gasataa nde muɲɲaade sabu ɓen cappanɗe njowo feewuɓe wonɓe e mayre? 25 Yo waɗugol sifa ɗun woɗɗito ma: waridugol feewuɓe e bonɓe. Si hinaa ɗun haray feewuɓe ɓen wa'ii wa bonɓe. Yo ɗun woɗɗito ma! E hara haananaa Ɲaawoowo Aduna on fow ɲaawirgol no feewiri?»
26 Joomiraaɗo on daali: «Si mi tawoyii feewuɓe cappanɗe njowo ka saare Saduuma, mi muɲɲoto nde fow sabu maɓɓe.»
27 Onsay Ibraahiima jaabii, wi'i: «Awa jooni, mi suusii yewtidugol e Jom an, min ndii mbullaari e ndoondi. 28 No gasa hara njowo no ŋakki e ɓen cappanɗe njowo feewuɓe. Taw si a muliray saare nden fii ɓen njowo ŋakkuɓe?»
Joomiraaɗo on jaabii: «Si mi tawii ton cappanɗe nayo e njowo feewuɓe, mi mulataa saare nden.»
29 Ibraahiima wi'i kadi: «No gasa hara ko cappanɗe nayo pet tawoytaa ton?»
Joomiraaɗo on daali: «Mi waɗoytaa hay fus sabu ɓen cappanɗe nayo.»
30 Ibraahiima wi'i kadi: «Jom an, mi torike ma, wota a tikku si mi wowlii kadi. No gasa hara ko cappanɗe tato tawoytaa ton?»
Joomiraaɗo on jaabii: «Mi waɗoytaa hay fus si ko cappanɗe tato mi tawoyi.»
31 Ibraahiima wi'i kadi: «Awa jooni, mi suusii yewtidude e Jom an, no gasa hara ko noogayo tawoytaa ton?»
Joomiraaɗo on daali: «Mi mulataa nde sabu ɓen noogayo.»
32 Ibraahiima wi'i kadi: «Awa jooni, wota Jom an tikku si mi wowlii nde wootere kadi. No gasa hara ko feewuɓe sappo tawoytaa ton.»
Joomiraaɗo on jaabii kadi: «Mi mulataa nde sabu ɓen sappo.»
33 Ɓay Joomiraaɗo on gaynii yewtidude e Ibraahiima, o yahi. Ibraahiima kadi yiltitii ka mun.