Fii Maande Ahadi ndin
17
1 Fewndo ko Abraama heɓi duuɓi cappanɗe jeenay e jeenay, Joomiraaɗo on feeɲani mo, daalani mo: «Ko min woni Alla Jom Bawgal on. Nawru ngurndan maa ɗan no feewiri yeeso an. 2 Mi hunnay ahadi ndi mi waɗunoo hakkunde an e maa ndin, mi yaɲɲete yaɲɲudee.»3 Onsay Abraama sujjani mo. Allaahu on daalani mo, wi'i: 4 «E hino ahadi ndi mi waɗunoo hakkunde an e maa ndin: A wonay maamaajo leƴƴi ɗuuɗuɗi. 5 Hande kadi wonaa *Abraama inneteɗaa, kono ko *Ibraahiima inneteɗaa, ko fii mi waɗii ma maamaajo leƴƴi ɗuuɗuɗi. 6 Mi ɗuɗɗinay jiidi maa ndin fota, mi waɗay leƴƴi ɗuuɗuɗi e maa, awa kadi lamɓe iway e maa. 7 Mi waɗay ahadi hakkunde an e maa e jurriya maa aroyoowo ɓaawo maa on e nder jamaanuuji maɓɓe ɗin. Ndin ahadi ko poomayankeeri, mi wona Alla maa e Alla jurriya maa on si feƴƴii e maa. 8 Mi okkete an e jurriya maa aroyoowo ɓaawo maa on ndii leydi Kanaana ndi wonɗaa koɗo e mun fow, ndi wonana on halal haa poomaa, awa kadi mi wonay Alla maɓɓe.»
9 Allaahu on daalani Ibraahiima kadi: «An, a hunnay ahadi an ndin, an e jurriya maa aroyoowo ɓaawo maa on e nder jamaanuuji maɓɓe ɗin. 10 E hino maande ahadi ndi jogitotoɗon hakkunde an e mon e jurriya maa aroyoowo ɓaawo maa on: kala gorko e mon ko sunninteeɗo. 11 Hiɗon haanaa sunnineede. Ko ɗun wonata maande ahadi wondi hakkunde an e mon ndin. 12 Kala gorko jibinaaɗo e mon sunninte ɲande o heɓi balɗe jeetati, ɗun ko e nder jamaanuuji mon ɗin fow, woni ko kurkaaduujo heɓaaɗo ka galle maa, maa hara ko mo ittuɗaa kaalisi sooduɗaa e juuɗe janano mo jeyaaka e jurriya maa on. 13 Kala gorko kurkaaduujo heɓaaɗo ka galle maa, maa mo ittuɗaa kaalisi sooduɗaa, ko sunninteeɗo. Ko ndin ahadi an wonayndi ka ɓalli mon wonata ahadi poomayankeeri. 14 Kala gorko mo sunninaaka, mo nden ɓattatere alaa e ɓandu mun, haray hakkunde makko e yimɓe makko ɓen taƴii, ko fii haray o bonnii ahadi an ndin.»
15 Allaahu on daalani kadi Ibraahiima: «Ɓeyngu maa *Saaray, hande kadi wota a noddir mo Saaray. Kono ko *Saarata woni innde makko. 16 Mi waɗay barki e makko, mi okke ɓiɗɗo gorko immorde e makko. Mi waɗay barki e makko, o wona neene leƴƴi ɗin. Lamɓe jamaaji iway e makko.»
17 Onsay Ibraahiima sujji, jali, o wi'i ka ɓernde makko: «Hara mo duuɓi teemedere gasay heɓude ɓiɗɗo gorko, e hara Saarata, oo mo duuɓi cappanɗe jeenay gasay jiidaade?» 18 Onsay Ibraahiima torii Alla, wi'i: «Yaa an Alla, yo Ismaa'iila wuuru yeeso maa.»
19 Kono Allaahu on jaabii mo, wi'i: «Wonaa non, ɓeyngu maa Saarata jibinante boobo gorko, a innay on *Issaaqa. Mi waɗay ahadi an ndin e makko, ndi wonana jurriya makko aroyoowo ɓaawo makko on ahadi poomayankeeri. 20 Mi nanii fii ko Ismaa'iila kon, mi waɗay barki e makko, mi ɗuɗɗina jiidi makko ndin, mi yaɲɲay mo yaɲɲudee, o wonay baaba lamɓe sappoo e ɗiɗo, awa kadi mi waɗay leɲol mawngol e makko. 21 Kono ahadi an ndin, ko e Issaaqa mi waɗata ndi, oo mo Saarata jibinanoyay-maa ko arata e oo saa'i.» 22 Ɓay Allaahu on gaynii mo yewtude, o acci Ibraahiima ɗon, o ƴenti.
23 Onsay Ibraahiima ƴetti Ismaa'iila ɓiɗɗo mun on, e kala gorko kurkaduujo heɓaaɗo ka galle makko e ɓe o ittunoo kaalisi o soodi ɓen fow. O hawtindiri worɓe wonɓe ka galle makko ɓen fow, o sunnindini ɓe nden ɲande, wano Allaahu on daalirani mo non. 24 Ko fewndo Ibraahiima heɓi duuɓi cappanɗe jeenay e jeenay, o teddinaa. 25 Fewndo ko Ismaa'iila ɓiɗɗo makko on kadi sunninaa, hari ko mo o duuɓi sappoo e tati. 26 Ko nden ɲande tigi Ibraahiima e Ismaa'iila ɓiɗɗo mun on sunnindinaa, 27 wondude e kala gorko kurkaduujo heɓaaɗo ka galle makko kanko Ibraahiima, e ɓe o itti kaalisi, o soodi e juuɗe jananɓe, ɓe fow, ɓe sunnindinaa.