Fii Haajirata e Jibineede Ismaa'iila
16
1 Wa fewndo onsay hari Saaray ɓeyngu Abraama jiidanaaki mo. Tawi Saaray no mari korɗo Misirayankoojo wi'eteeɗo Haajirata. 2 Onsay Saaray wi'i Abraama: «Ɓay Joomiraaɗo on yeɗaali lan jiidi, jooni, yiidee e korɗo an on, no gasa ka onɗon heɓanammi ɓiɗɗo.» Abraama jaɓi ko Saaray wowlani mo kon. 3 Onsay Saaray ƴetti on korɗo mun Misirayankoojo wi'eteeɗo Haajirata, o okki mo moodi makko fii ɓeyngu. Ɗun hawrondiri Abraama wonii e ndin leydi Kanaana duuɓi sappo.4 Onsay Abraama yiidi e Haajirata, on ƴetti reedu. Ɓay Haajirata andii sowike, o itti bote e Saaray jeyɗo mo on. 5 Onsay Saaray wi'i Abraama: «Yo oo monee mo mi heɓi yantu e maa. Ko fii ko min tigi jonnu-maa oo korɗo an. Ɓay jooni o tawii o reedii, o ittii bote e an. Yo Joomiraaɗo on ɲaawu hakkunde men.»
6 Abraama jaabii ɓeyngu mun Saaray, o wi'i mo: «Korɗo maa on no e jungo maa, waɗu mo ko faalaɗaa woo.» Onsay Saaray njaggi mo haa on dogi mo.
7 Malaa'ikaajo Joomiraaɗo on tawi mo e takko ɓundu ndiyan ka wulaa, ɗun ko nduu ɓundu wondu ka laawol Suura, 8 o wi'i: «Ko an yo Haajirata, korɗo Saaray, ko honto iwruɗaa e ko honto yahataa?»
O jaabii mo: «Ko Saaray jeyɗo lan on mi woni dogude.»
9 Malaa'ikaajo Joomiraaɗo on wi'i mo: «Yiltito ka jeyɗo ma on, yankinanoɗaa mo.» 10 Malaa'ikaajo Joomiraaɗo on wi'i mo kadi: «Mi yaɲɲay jurriya maa on yaɲɲudee, ɓe ɗuuɗay haa ɓe ɗuuɗana limoore.»
11 Malaa'ikaajo Joomiraaɗo on wi'i mo fahin: «Awa ko a sowiiɗo, a jibinoyay boobo gorko, a innoyay on *Ismaa'iila, ko fii Joomiraaɗo on nanii hito maa e nder tampere maa nden. 12 On ɓiɗɗo maa wa'ay wa mbabba buruure, o haɓay fow, fow haɓay mo, o wona feereejo e telen-ma siɓɓe makko ɓen fow.»
13 Haajirata jammi on Joomiraaɗo yewtunooɗo mo, «Alla Ru'ii», e maanaa «Alla rentuɗo», ko fii o wi'uno: «Taw si ko ɗoo mi yi'i rentuɗo lan on?» 14 Ko sabu ɗun waɗi si ndun woyndu wondu hakkunde Kadeesi e Baarada wi'aa *Woyndu Lahay-Ru'ii.