Fii Ahadi ndi Joomiraaɗo on Ƴettani Abraama ndin
15
1 Ɓay feƴƴii e ɗun, Joomiraaɗo daalani Abraama e nder feɲɲinannde, wi'i: «Wota a hulu hay fus, ko min tigi woni hiwitorgo maa ngon, mbarjaari maa ndin no mawni fota.»2 Onsay Abraama jaabii: «Yaa an Alla Joomiraaɗo, ko honɗun okkataa mi, miɗo woniri nii e ɓaawo ɓiɗɗo? Ronoowo lan on ko Aliyaasaru jeyaaɗo Damaasi.» 3 Abraama wi'i kadi: «A okkoraali lan jurriya, awa ko kurkotooɗo ka galle an ronatammi.»
4 Ontuma Joomiraaɗo on daalani mo, wi'i: «Wonaa on mo sikkuɗaa ronay-maa, kono ko iwɗo e keeci maa tigi ronay-maa.» 5 Joomiraaɗo on yaltini mo ka yaasi, daalani mo: «Jooni tiggito ndaaraa kammu ngun, limaa koode ɗen si tawii hiɗa waawi limude ɗe.» Ontuma o daalani mo kadi: «Ko nii jurriya maa on ɗuuɗiroyta.»
6 Abraama gomɗini Alla, Allaahu on jogitorani mo ngal gomɗinal makko peewal.
7 O daalani mo kadi: «Ko min woni Joomiraaɗo on, on yaltinɗo ma ka saare Kaldiyankeeɓe wi'eteende Uuru, fii yeɗugol ma ndii leydi, haloraa.»
8 Onsay Abraama wi'i: «Yaa an Alla Joomiraaɗo, ko honno mi andirta wonde mi haloray ndii leydi?»
9 Joomiraaɗo on daalani mo: «Addanan ɲale tatiiwe e mbeewa mba duuɓi tati e ngaari baalii ndi duuɓi tati, e legetereeru e gabooru.»
10 Abraama addi ɗun fow, o hirsi, o fecci ɗi e hakkunde, o wallini pecce ɗen, o fewtindiri, o acci bolun hakkunde majje, kono colli ɗin kaɲun o feccaano ɗi. 11 Ontuma jigaaje ɗen jippanii tebbeeli ɗin, Abraama raɗii ɗe.
12 Ka mutal naange, ɗoyngol tiiɗungol yani e Abraama. No o ɗaanornoo, niwre tiiɗunde hulɓiniinde hibbii e makko. 13 Joomiraaɗo on daalani Abraama: «Andu fota wonde jurriya maa on wonoyay tuŋaranke e leydi ndi ɓe jeyaaka e mun, ɓe maccinɗinoo ton, ɓe njaggee e nder duuɓi teemeɗɗe nay. 14 Kono mi ɲaawoyay on jamaa mo ɓe maccinɗinanii. Ɓawto ɗun, ɓe yaltidoyay ɗon e jawle ɗuuɗuɗe. 15 Kono an, a tawtoyay maamaaɓe maa ɓen e nder ɓuttu, surreɗaa e nder nayeewu hittungu. 16 Jurriya maa on artoyay ɗoo ka jamaanu nayaɓu, ko fii bakkatuuji Amoriyankeeɓe ɓen timmaali taho.»
17 Ɓay naange ngen mutii, niɓɓitii, woloŋere wondunde e curki e pitilol yiite yaltiti, rewi hakkunde pecce teewu ɗen. 18 Ko nden ɲande Joomiraaɗo on ƴettani Abraama ahadi, o daalani mo, o wi'i: «Ko jurriya maa on mi yeɗi ndii leydi, gila e ngoo maayo Misira, haa hewtoyi ka maayo njano Furaatiwol, 19 ɗun ko ndii leydi ndi ɓee Kiinayankeeɓe e ɓee Keniisiyankeeɓe e ɓee Kadmoniyankeeɓe 20 e ɓee Hissiyankeeɓe e ɓee Feriiziyankeeɓe e ɓee Refayankeeɓe 21 e ɓee Amoriyankeeɓe e ɓee Kanaaniyankeeɓe e ɓee Girgaasiyankeeɓe e ɓee Yebuusiyankeeɓe woni e mun.»