Fii no Abraama Dandiri Luutu
14
1 Fewndo ɓee lamɓe ɗoo, ɗun ko Amraafala lanɗo Sin'aara on, e Ariyuuka lanɗo Alasaara on, e Kadar-Lawmaara lanɗo Iilaama on, e Tiddaala lanɗo Guyiima on, 2 ɓee ɗoo fow hawtituno, haɓidi e ɓee lamɓe ɗoo, ɗun ko Beera lanɗo Saduuma on, e Birsaa lanɗo Amuura on, e Sin'aaba lanɗo Aduma on, e Simibaara lanɗo Sabuyiima on, wondude e oo lanɗo Beela (ɗon no wi'ee kadi Su'aara). 3 Ɓee sakkitaaɓe linteede ɗoo kadi hawtiti, jonnindiri juuɗe ka hollaande Siddiima, ɗun ko ka Weendu Ndiyan Lanɗan woni ɗon jooni. 4 E nder duuɓi sappoo e ɗiɗi, tawi hiɓe e ley koyɗe Kadar-Lawmaara. Kono ka hitaande sappoo e tataɓere, ɓe murti.5 Ka hitaande sappoo e nayaɓere, Kadar-Lawmaara e lamɓe ɓe o wondunoo ɓen haɓiduno e Refayankeeɓe ɓen e ndee nokkuure wi'eteende Astaruuta-Qarnayiima, ɓe fooli ɓe. Ɓe fooli kadi Zuuziyankeeɓe ɓen e ndee nokkuure wi'eteende Haama, ɓe fooli Iimiyankeeɓe ɓen kadi e ndee nokkuure wi'eteende Sawa-Qiriyatayiima. 6 Ɓe fooli kadi Horiyankeeɓe ɓen ka pelle maɓɓe Sa'iira, haa hewtoyi Al-Paraana ka moggo wulaa. 7 Ontuma ɓe yiltitii. E nder ko ɓe yiltotoo kon, ɓay ɓe hewtii Ayna-Misfaata (ɗon no wi'ee kadi Kadeesi), ɓe haɓidi ɗon e Amalekiyankeeɓe ɓen, ɓe foolidi ɓe e leydi maɓɓe ndin fow, wondude e ɓee Amoriyankeeɓe hoɗuɓe Hasasuuna-Tamaara.
8 Onsay lanɗo Saduuma on e lanɗo Amuura on e lanɗo Aduma on e lanɗo Sabuyiima on e lanɗo Beela on (ɗon no wi'ee kadi Su'aara), ɓee fow mottondiri, yahi e ndee hollaande Siddiima, ɓe hebulanii haɓidugol 9 e Kadar-Lawmaara lanɗo Iilaama on, e Tiddaala lanɗo Guyiima on, e Amraafala lanɗo Sin'aara on, e Ariyuuka lanɗo Alasaara on. Ɗun woni ka lamɓe nayo e lamɓe njowo dartondirani. 10 Tawi nden hollaande Siddiima no heewunoo boyli ndole. Lanɗo Saduuma on e lanɗo Amuura on dogidi e koneeli mun ɗin, woɓɓe e maɓɓe yani ka boyli, luttuɓe ɓen dogiri ka pelle. 11 Fooluɓe ɓen ƴetti jawle e ɲaameteeji ko woni Saduuma e Amuura kon fow, ɓe yahi. 12 Ɓe ƴettori kadi Luutu, ɓiɗɗo ben-gooto Abraama on, kanko e jawle makko ɗen fow, ɓe yaadi e mun, ɓay hari ko Saduuma o hoɗi.
13 Goɗɗo goo fuutii, ari humpiti ɗun Abraama, oo Aabirayankeejo. Tawi on no hoɗi takko ɗee leɗɗe mawɗe oo Amoriyankeejo wi'eteeɗo Mamra, kotiraawo Eskuula e Aanira, tawi ɓen ko ƴettoduɓe e Abraama ahadi weldigal. 14 No Abraama humpitornoo wondema musiɗɗo makko on nangaama, o ƴetti yimɓe teemeɗɗe tato e sappoo e njeetato, eltiiɓe fii hare, heɓaaɓe ka galle makko, o raɗii ɓe haa Daana. 15 O senditi konu makko ngun jemma, ɓe yani e maɓɓe. Kanko e konu makko ngun ɓe fooli ɓe, ɓe raɗii haa Huuba, ɗon no hikkorani Damaasi ka sengo nano. 16 O artiri jawle ɗen fow, o artiri kadi Luutu, musiɗɗo makko on, e jawle mun ɗen, e rewɓe ɓen e yimɓe nanganooɓe ɓen fow.
Fii Maaliki-Siddiiqu
17 Fewndo ko Abraama artata, ɓay o fooloyii Kadar-Lawmaara e lamɓe ɓe on wondunoo ɓen, lanɗo Saduuma on ari fotti e makko e ndee hollaande wi'eteende Sawa, nden no wi'ee kadi Hollaande Lanɗo. 18 Maaliki-Siddiiqu lanɗo Salaam on ardi e ɲaameteeji e njaramji. Tawi on ko yottinoowo sadaka ka Alla, Jom Ɓural on. 19 On du'anii Abraama, o wi'i: «Yo Alla Jom Ɓural on, on taguɗo leydi e kammu, waɗu barki e maa. 20 Mantoore wonanii Alla Jom Ɓural on, on wattuɗo ayɓe maa ɓen e jungo maa.»
Onsay Abraama jonni mo sappaɓun e kala ko o heɓoyi.
21 Lanɗo Saduuma on torii Abraama, o wi'i: «Jonnitan yimɓe an ɓen, an ƴettaa jawle ɗen.»
22 Abraama jaabii lanɗo Saduuma on, wi'i: «Mi woondirii Alla Jom Ɓural on, on taguɗo leydi e kammu, 23 mi ƴettataa hay fus e ko jeyɗaa kon, hay gaarawol maa ɓokkun haɓɓirkun paɗal, fii wota a wi'oy: ‹Ko min alɗini Abraama.› 24 Min, fus alanaa lan ton, si hinaa ko yimɓe an ɓen ɲaami kon, e geɓal ɓee yimɓe ɓe mi yaadunoo e mun, ɗun ko Aanira e Eskuula e Mamra, ɓee-le, yo ɓe hendo geɓal maɓɓe ngal.»