Fii no Abraama e Luutu Seediri
13
1 Ontuma Abraama yalti Misira, o sutanii Negeeba, kanko e ɓeyngu makko e Luutu, wondude e kala ko o jeyi. 2 Hari Abraama no alɗirnoo fota gureele e kaalisi e kaŋŋe. 3 O waɗi yaha daakoo gila Negeeba haa Bayti'iila, e ndee nokkuure nde o adinoo darnude suudu makko bagi ndun e mun, hakkunde Bayti'iila e Ayyu, 4 ɗun ko ka o adinoo waɗande Joomiraaɗo on layyorde ɗon. Kanko Abraama o jantii ɗon innde Joomiraaɗo on.5 Luutu yaadunooɗo e Abraama on kadi no mari na'i e dammi e cuuɗi bagi. 6 Tawi nokkuure nden faaɗanii ɓe ka ɓe wonda nokkun gootun, ko fii hari jawle maɓɓe ɗen ɗuuɗanii ɓe haa ko haɗata ɓe kamɓe ɗiɗo ɓe wonda. 7 Yeddondiral waɗi hakkunde ngaynaakooɓe Abraama ɓen e ngaynaakooɓe Luutu ɓen. Tawi fewndo on saa'i ko Kanaaniyankeeɓe ɓen e Feriiziyankeeɓe ɓen hoɗi e ndin leydi.
8 Abraama wi'i Luutu: «Wota yeddondiral wonu hakkunde men, maa hakkunde ngaynaakooɓe an ɓen e ngaynaakooɓe maa ɓen, ko fii ko en musiɓɓe. 9 Wonaa e hino ndii leydi ɗoo fow no waalii yeeso maa? Jooni senditoɗen: si a yaarii sengo nano, mi yaara ka ɲaamo, si a yaarii ka ɲaamo, mi yaara ka nano.»
10 Onsay Luutu ɓanti gite, o haynii hecciɗannde hollaande nden Yurdayniwol fow, tawi nden no wa'i wa tutateeri Joomiraaɗo on, maa wa leydi Misira ndin, telen *Su'aara, (ɗun ko ado Joomiraaɗo on halkude Saduuma e Amuura). 11 Luutu kaɲun suɓii nden hollaande Yurdayniwol fow, o yaari ka funnaange, ko nii mo kala e maɓɓe seediri e oya. 12 Abraama kaɲun hoɗi e ndin leydi Kanaana, Luutu kaɲun hoɗoyi e ɗee ca'e wonɗe e nden hollaande, o waɗoyi cuuɗi makko bagi ɗin telen Saduuma. 13 Tawi ɓen yimɓe Saduuma ko bonɓe, awa kadi ko heewuɓe junuubu yeeso Joomiraaɗo on.
14 Ɓay Abraama seedii e Luutu, Joomiraaɗo on daalani mo: «Ɓantu gite maa ɗen, ndaaraa gila ka wonɗaa ɗoo naɓani funnaange e hirnaange, nano e ɲaamo, 15 ko fii mi yeɗete ndii leydi ndi yi'uɗaa ɗoo fow, an e jurriya maa on haa poomaa. 16 Mi ɗuɗɗiniray jurriya maa on wa mbullaari ndin ka leydi, fii si goɗɗo no waawa limude mbullaari ndin ka leydi, haray jurriya maa on no limoo. 17 Immo, jindaa e ndii leydi, jundi mayri e yanji mayri, ko fii mi yeɗete ndi.»
18 Ontuma Abraama sottini cuuɗi mun bagi ɗin, o waɗoyi ɗi takko ɗee leɗɗe mawɗe Mamra, ɗun ko leydi Habruuna. O darnani ɗon Joomiraaɗo on layyorde.