Fii no Abraama Toɗɗoraa Barkinoreede
12
1 Joomiraaɗo on daalani Abraama: «Yaltu ka leydi maa e ka bolondaa maa e ka galle ben maa, yahaa haa e leydi ndi mi holloyte. 2 Mi waɗay leɲol mawngol e maa, mi barkine, mi mawninay innde maa nden, awa kadi a wonay barki. 3 Mi waɗay barki e kala du'aniiɗo ma, mi huɗay kala hoynuɗo ma, awa kadi bolondaaji aduna on fow barkinte sabu maa.»4 Abraama yahi wano Joomiraaɗo on daalirani mo non, o yaadi e Luutu. Wa fewndo ka Abraama yaltata Haraana, hari ko mo duuɓi cappanɗe jeeɗiɗi e jowi. 5 Abraama ƴetti ɓeyngu mun Saaray, e Luutu, ɗun ko ɓiɗɗo miɲan makko on, e jawle maɓɓe ɗen fow wondude e jiyaaɓe ko ɓe heɓi e leydi Haraana kon, ɓe sutanii Kanaana. Ɓe yahi, ɓe hewtoyi leydi Kanaana.
6 Abraama rewi e nder leydi ndin haa ɓe hewti Sakiima ka leggal mawngal wonungal Muura ngal woni ɗon. Wa fewndo onsay hari Kanaaniyankeeɓe ɓen no e ndin leydi. 7 Joomiraaɗo on feeɲani Abraama ɗon, o daalani mo: «Mi yeɗay jurriya maa on ndii leydi.» Onsay Abraama darnani ɗon on Joomiraaɗo feeɲanɗo mo layyorde.
8 Ontuma o eggi ɗon, o yaari e ɗee pelle hikkorɗe funnaange Bayti'iila. O darni suudu makko bagi ndun hakkunde Bayti'iila e Ayyu, Bayti'iila wontirani mo hirnaange, Ayyu wontirani mo funnaange. O waɗani ɗon kadi Joomiraaɗo on layyorde, o jantii innde Joomiraaɗo on. 9 Abraama sotti e nden nokkuure, o sutanii Negeeba, himo waɗa yaha daakoo.
Fii Koɗu Abraama ngun Leydi Misira
10 Ontuma heege waɗi e ndin leydi. Onsay Abraama yahi koɗoyii Misira, ɓay hari heege ngen tiiɗii e leydi ndin. 11 Ɓay ɓe ɓadike Misira, onsay o wi'i ɓeyngu makko Saaray: «Awa jooni non, miɗo andi ko a debbo labaaɗo. 12 No Misirayankooɓe ɓen yiiru-maa ɓe wi'ay ko a ɓeyngu an. Onsay ɓe waray lan, an ɓe acca wuuraa. 13 Kono a wi'ay ɓe ko a bandiraawo an fii yo moƴƴanan sabu maa, wonkii an kin daɗa immorde e maa.»
14 Ɓay Abraama naatii Misira, Misirayankooɓe ɓen ndaari tawi debbo on ko tiiɗa-ŋariijo. 15 Ɓay yeesooɓe hikkiiɓe e Fir'awna ɓen yi'ii on debbo, ɓe yahi, ɓe mananoyi Fir'awna fii makko. Onsay ɓe addi on debbo ka galle Fir'awna. 16 Fir'awna teddini Abraama sabu ɓeyngu makko, Abraama heɓi na'i e dammi e mbabbi deyi e gori, wondude e jiyaaɓe worɓe e rewɓe, e ngelooɗi.
17 Kono Joomiraaɗo on liɓi ɲabbeeli tiiɗuɗi e Fir'awna, haa e ɓeynguure makko nden, sabu Saaray ɓeyngu Abraama. 18 Onsay Fir'awna noddi Abraama, wi'i mo: «E ko honɗun waɗuɗaa mi, ko honɗun haɗi yeetoɗaa mi oo ko sonnaajo maa? 19 Ko fii honɗun wi'anɗaa mi oo ko bandiraawo maa, haa mi ƴetti mo? Jooni non e hino sonnaajo maa on, ƴettu mo, yahaa!» 20 Fir'awna yamiri suufaaɓe mun ɓen, ɓen watti Abraama e laawol, kanko e ɓeyngu makko e kala ko o jeyi.