Fii Suudu Towindiraandu ndun Baabiila
11
1 Hari aduna on fow ko haala woota e konguɗi gooti wowlata. 2 E nder eggudu maɓɓe funnaange, ɓe ari e hollaande e nder leydi Sin'aara, ɓe hoɗi ɗon. 3 Ɓe yewtidi, ɓe wi'i: «Mahen, piyen tuufe, juɗen ɗe haa moƴƴa.» Ɓe huutori tuufe lonto kaaƴe e ndole lonto loope. 4 Ontuma ɓe wi'i: «Mahen moƴƴinanen hoore men saare, darnen suudu, waɗen koore towindiraaɗo haa ka kammu. Ɗaɓɓanen hoore men innde, fii wota en saakite e hoore leydi ndin fow.»5 Kono Joomiraaɗo on tippii fii ndaarugol nden saare e ndun suudu towindiraandu ndu Banii-Aadama moƴƴini. 6 Ontuma Joomiraaɗo on daali: «Ndaarii jamaa gooto wowlooɓe haala woota. E hino ko ɓe fuɗɗii waɗude kon, awa haray ɓe ronkataa waɗude kala ko ɓe eɓɓi. 7 Jooni non tippoɗen, jiiɓindiren haala maɓɓe kan ton, fii wota ɓe nantondir e haala.»
8 Ontuma Joomiraaɗo on saakiti ɓe ɗon e hoore leydi ndin fow, ɓe acciti darnugol nden saare. 9 Ko waɗi si nden nokkuure innaa Baabiila, ko fii ko ɗon Joomiraaɗo on jiiɓindirnoo haala yimɓe aduna on fow, o saakiti ɓe e hoore aduna on fow.
Fii Jurriya Saama on
10 E hino jurriya Saama on:
Ko ka Saama heɓi ɗon duuɓi teemedere, o daɲanaa Arfaksaada, ɗun ko duuɓi ɗiɗi ɓaawo waamere nden. 11 Ɓawto Arfaksaada jibineede, Saama wuuri duuɓi teemeɗɗe jowi, o daɲanaa ɓiɓɓe goo, worɓe e rewɓe.
12 Ko ka Arfaksaada heɓi ɗon duuɓi cappanɗe tati e jowi, o daɲanaa Saalaha. 13 Ɓawto Saalaha jibineede, Arfaksaada wuuri duuɓi teemeɗɗe nay e tati, o daɲanaa ɓiɓɓe goo, worɓe e rewɓe.
14 Ko ka Saalaha heɓi ɗon duuɓi cappanɗe tati, o daɲanaa Aabira. 15 Ɓawto Aabira jibineede, Saalaha wuuri duuɓi teemeɗɗe nay e tati, o daɲanaa ɓiɓɓe goo, worɓe e rewɓe.
16 Ko ka Aabira heɓi ɗon duuɓi cappanɗe tati e nay, o daɲanaa Faalaja. 17 Ɓawto Faalaja jibineede, Aabira wuuri duuɓi teemeɗɗe nay e cappanɗe tati, o daɲanaa ɓiɓɓe goo, worɓe e rewɓe.
18 Ko ka Faalaja heɓi ɗon duuɓi cappanɗe tati, o daɲanaa Ra'uwa. 19 Ɓawto Ra'uwa jibineede, Faalaja wuuri duuɓi teemeɗɗe ɗiɗi e jeenay, o daɲanaa ɓiɓɓe goo, worɓe e rewɓe.
20 Ko ka Ra'uwa heɓi ɗon duuɓi cappanɗe tati e ɗiɗi, o daɲanaa Seruuja. 21 Ɓawto Seruuja jibineede, Ra'uwa wuuri duuɓi teemeɗɗe ɗiɗi e jeeɗiɗi, o daɲanaa ɓiɓɓe goo, worɓe e rewɓe.
22 Ko ka Seruuja heɓi ɗon duuɓi cappanɗe tati, o daɲanaa Naahuura. 23 Ɓawto Naahuura jibineede, Seruuja wuuri duuɓi teemeɗɗe ɗiɗi, o daɲanaa ɓiɓɓe goo, worɓe e rewɓe.
24 Ko ka Naahuura heɓi ɗon duuɓi noogay e jeenay, o daɲanaa Taaraha. 25 Ɓawto Taaraha jibineede, Naahuura wuuri duuɓi teemedere e sappoo e jeenay, o daɲanaa ɓiɓɓe goo, worɓe e rewɓe.
26 Ka Taaraha heɓunoo duuɓi cappanɗe jeeɗiɗi ɗon, o daɲanaa Abraama e Naahuura e Haaraana.
Fii Jurriya Taaraha on
27 E hino jurriya Taaraha on:
Taaraha daɲanaa Abraama e Naahuura e Haaraana. Haaraana kadi daɲanaa Luutu.
28 Haaraana faatii ka o jibinaa ɗon fewndo ngurndan ben makko Taaraha, ɗun ko ndee saare Kaldiyankeeɓe wi'eteende Uuru. 29 Abraama e Naahuura resi rewɓe. Ɓeyngu Abraama no wi'ee Saaray, ɓeyngu Naahuura no wi'ee Milkatu mo Haaraana, ɗun ko ben Milkatu e Yiskatu. 30 Tawi Saaray wonaa jiidotooɗo, o alaa ɓiɗɗo.
31 Taaraha ƴetti Abraama ɓiɗɗo mun on e Luutu taaniraawo makko on, ɗun ko ɓiɗɗo Haaraana on, e Saaray esiraawo makko on, ɗun ko ɓeyngu Abraama ɓiɗɗo makko on. Ɓe yaltidi e nden saare Kaldiyankeeɓe wi'eteende Uuru, ɓe fokkiti e ndii leydi wi'eteendi Kanaana. Kono ɓay ɓe hewtii e ndee saare wi'eteende Haraana, ɓe hoɗi ɗon. 32 Ka Taaraha heɓunoo ɗon duuɓi teemeɗɗe ɗiɗi e jowi, o faatii e ndee saare wi'eteende Haraana.