Fii Ahadi ndi Allaahu on Ƴettannoo Nuuhu ndin
9
1 Allaahu on waɗi barki e Nuuhu e ɓiɓɓe mun ɓen, o daalani ɓe: «Heɓee ɓiɓɓe, ɗuuɗon, hebbinon aduna on. 2 Kala kulle ka hoore leydi ɗoo e kala colli weeyo e kala ko daasotoo ka hoore leydi wondude e liƴƴi ɗin fow ka ndiyan, hulay on kulol tiiɗungol. Ɗin fow wattaama e juuɗe mon. 3 On okkaama kala ko wuuri, ko memminotoo, fii ko ɲaamon. Wano mi okkirnoo on non kala ko fuɗi, mi okkii on fow. 4 Kono wota on ɲaamu teewu wondungu e ngurndan mun, ɗun ko ƴiiƴan mun ɗan. 5 Pellet mi ƴantay ƴiiƴan mon ɗan fii ngurndan mon ɗan: mi ƴanta ɗan e juuɗe kala ko wuuri ko itti wonkii, mi ƴanta ɗan e juuɗe kala neɗɗo ittuɗo wonkii. Ko e juuɗe kala neɗɗo ittuɗo wonkii ɗimmo mun, mi ƴantata ɗan. 6 On mo hibbi ƴiiƴan neɗɗanke, kanko kadi ko neɗɗanke hibbata ƴiiƴan makko ɗan, ko fii Alla waɗii neɗɗanke wa nando makko. 7 Onon non, heɓee ɓiɓɓe, ɗuuɗon, layon e aduna on, ɗuuɗon e nder makko.»8 Allaahu daalidani Nuuhu e ɓiɓɓe mun ɓen, wi'i: 9 «Min, mi ƴettoday e mon ahadi an ndin, onon e jurriya mon aroyoowo ɓaawo mon on, 10 wondude e kala ko mari wonkii, ko wondi e mon: colli ɗin woo, daabeeji ɗin woo, e kala mummunteeji aduna ɗi wonduɗon e mun, ɗun ko gila e ko yaltiduɗon e mun ka laana kon fow haa e kala mummunte wonɗo ka aduna. 11 Mi ƴettanii on ahadi an ndin. Hande kadi, kala ko tagaa mulirtaake ndiyan waamere, awa kadi waamere waɗitataa hande kadi ko mula aduna on.»
12 Allaahu on daali: «E hino maande ahadi ndi mi waɗi ndin hakkunde an e mon e kala ko wondi e wonkii ko wonduɗon e mun haa e jamaanuuji aroyayɗi ɗin fow: 13 Mi yowii yaroowol an ndiyan ngol ka duule fii ko wona maande ahadi hakkunde an e aduna on. 14 Nde mi waɗi duule ɗen ka weeyo woo, yaroowol ndiyan ngol yalti ka duule, 15 mi anditay ahadi an ndi mi waɗi ndin hakkunde an e mon e kala ko tagaa ko wondi e wonkii, ɗun ndiyan ɗan wontataa hande kadi waamere sakko ɗan mula kala ko tagaa. 16 Tuma yaroowol ndiyan ngol yaltiti ka duule woo, mi yi'i ngol, mi anditay ahadi an poomayankeeri ndi mi waɗi hakkunde an e kala ko tagaa ko wondi e wonkii ka aduna.»
17 Allaahu on daalani Nuuhu: «Ko ɗunɗoo woni maande ahadi ndi mi waɗi hakkunde an e kala ko tagaa ko woni ka hoore leydi.»
Fii Jurriya Nuuhu on
18 Ɓiɓɓe Nuuhu, wonnooɓe ka laana ɓen, ko Saama e Haama e Yaafasa. (Ko Haama woni ben Kanaana.) 19 Ko ɓee tato woni ɓiɓɓe Nuuhu ɓen, ko jurriya maɓɓe on saakitii e aduna on fow.
20 Nuuhu fuɗɗii remude, o tuti wiiɲu. 21 O yari njaram wiiɲu haa o mandili, o wirtii ka nder suudu makko. 22 Ɓay Haama, ben Kanaana, yi'ii ko ben mun wirtii kon, o yeetii ɗun ben-gootooɓe makko wonnooɓe ka yaasi ɓen ɗiɗo. 23 Onsay Saama e Yaafasa ƴetti suddaare, ɓe waɗi nde ka balbe maɓɓe, ɓe yaari ɓawre-ɓawre haa ɓe waanoyi nde ben maɓɓe. Laatii ɓe yi'aali ko ben maɓɓe wirtii kon, ɓay hari hiɓe hucci.
24 Ɓay Nuuhu finii battane ɗoyngol njaram makko ɗan, o humpitii ko toolaajo makko on waɗi mo kon. 25 O wi'i: «Yo kuddi wonan Kanaana! Yo o wonan ben-gootooɓe makko ɓen maccuɗo maccuɓe.»
26 O wi'i kadi: «Yo mantoore wonan Joomiraaɗo on, on Alla Saama! Yo Kanaana wonu maccuɗo Saama. 27 Yo Allaahu on yaɲɲu fii Yaafasa, yo o hoɗu e nder galleeji Saama, yo Kanaana wonu maccuɗo makko.»