Fii Lannoode Waamere nden
8
1 Ko fewndo onsay, Allaahu on anditi Nuuhu e mummunteeji e daabeeji ɗi o wondunoo ɗin fow ka laana. O immini hendu e leydi ndin, ndiyan ɗan fuɗɗii ɗuytaade. 2 Ɓulli maaje ndiyan ley-leyjan ɗan uddii, ɗan acci ɓullitaade. Dambuɗe kammuuli ɗin kadi uddii, ndiyan ɗan acci saaƴude. 3 Ndiyan ɗan ɓeeɓiri seeɗa seeɗa ka hoore leydi. E nder balɗe teemedere e cappanɗe jowi tawi ndiyan ɗan ɗuytike. 4 Ɲande sappoo e jeeɗiɗi lewru jeeɗiɗaɓuru ndun, laana kan darii e ɗee pelle wi'eteeɗe Araarata. 5 Di'e ɗen ɗuytori non seeɗa seeɗa haa ka lewru sappaɓuru. Ɲande go'o lewru sappaɓuru ndun, ko'e pelle ɗen yi'ii.6 Balɗe cappanɗe nay ɓawto ɗun, Nuuhu udditi damun tosokun kuna o waɗannoo laana kan kun, 7 o acciti kaya-kayaaru. Ndu waɗi ɗon yaha yiltoo haa nde ndiyan ɗan ɓeeɓunoo. 8 O acciti kadi gabooru, ndaarugol si ndiyan ɗan ɓeeɓii ka hoore leydi. 9 Kono ndu heɓaali ka ndu jooɗoo. Onsay ndu arti ka laana, ndu tawti mo, ɓay hari ndiyan ɗan no dewi e hoore leydi ndin fow. Onsay o fonti jungo, o nangi ndu, o naaditi ka nder laana.
10 O sabbii kadi balɗe jeeɗiɗi ɓawto ɗun, o acciti fahin gabooru ndun. 11 Ɓay ndu yahii, ndu artoyde woo kiikiiɗe, tawi hindu maɗɗii kaakol zaytuuni keccol. Ko ɗun andini Nuuhu wondema ndiyan ɗan ɓeeɓii ka hoore leydi. 12 O sabbitii fahin balɗe jeeɗiɗi kadi. Onsay o acciti ndun gabooru. Ndu yahi, ndu artitaali ndu tawti mo hande kadi.
13 Ɲande go'o lewru aranuru hitaande nden, ka Nuuhu heɓaynoo ɗon duuɓi teemeɗɗe jeegoo e go'o, hawrondiri e ɓeeɓugol ndiyan ɗan ka hoore leydi. Onsay Nuuhu itti ɲiwre laana kan, o tawi leydi ndin yoorii. 14 Ɲande noogay e jeeɗiɗi lewru ɗimmuru ndun, tawi leydi ndin lannii yoorude.
15 Onsay Allaahu on daalani Nuuhu, wi'i: 16 «Yaltu ka laana, an e ɓeyngu maa e ɓiɓɓe maa ɓen wondude e rewɓe ɓiɓɓe maa ɓen. 17 Yaltinoraa noone mummunteeji ɗi wonduɗaa e mun ɗin fow, gila e colli ɗin haa e daabeeji ɗin e kala ko daasotoo ka hoore leydi, fii no ɗi layira, ɗi rima, ɗi ɗuuɗa ka hoore leydi.»
18 Nuuhu yalti, yaltidi e ɓiɓɓe mun ɓen e ɓeyngu mun e rewɓe ɓiɓɓe mun ɓen. 19 Wano non kadi, mummunteeji ɗin fow e kala ko daasotoo, wondude e colli ɗin fow e kala ko jindata ka hoore leydi, kun kala e kun jeydi, yaltidi ka laana.
20 Nuuhu moƴƴinani Joomiraaɗo on layyorde, o ƴetti goɗɗi e mummunteeji dagiiɗi ɗin fow e colli dagiiɗi ɗin fow, o waɗani ɗon Joomiraaɗo on sadakaaji sunneteeɗi. 21 Ngol urngol welngol uuri Joomiraaɗo on. O wi'itii ka ɓernde makko: «Hande kadi mi huɗitataa leydi ndin sabu neɗɗanke, ɓay anniyee ɓernde neɗɗanke ko ko boni gila e cukankaaku makko. Hande kadi mi halkataa kala ko wuuri, wano mi warrunoo nii. 22 Yeru aduna on lannaali, setto e dabbunde, jaangol e nguleendi, ndungu e ceeɗu, jemma e ɲalorma lannataa.»