Fii no Nuuhu Naatiri ka Laana
7
1 Joomiraaɗo on daalani Nuuhu: «Naatu ka laana, an e ɓeynguure maa nden fow, ko fii mi taw an ko a feewuɗo yeeso an e nder nguu jamaanu ɗoo. 2 Ƴettu e mummunteeji dagiiɗi ɗin, gori jeeɗiɗi e deyi jeeɗiɗi. Ƴettaa kadi ɗiɗi e mummunteeji ɗi dagaaki ɗin, gorun e deyun. 3 Ƴettaa kadi e colli ɗin, gori jeeɗiɗi e deyi jeeɗiɗi, fii yo ɓiɓɓe majji on wuuru ka hoore leydi. 4 Ko fii si balɗe jeeɗiɗi feƴƴii, mi saaƴinay ndiyan e nder balɗe cappanɗe nay, jemma e ɲalorma, ko mula kala ko mi tagi ka hoore leydi ɗoo.»5 Nuuhu waɗi kala ko Joomiraaɗo on yamiri mo kon.
6 Wa fewndo waamere nden waɗi ka hoore leydi, hari Nuuhu ko mo duuɓi teemeɗɗe jeegoo. 7 Nuuhu naati ka laana, wondude e ɓiɓɓe makko ɓen, e ɓeyngu makko, e rewɓe ɓiɓɓe makko ɓen, sabu ndiyan waamere nden. 8 Kala mummunteeji dagiiɗi e ɗi dagaaki, wondude e colli ɗin, e kala ko daasotoo ka hoore leydi, 9 ɗin ari tawi Nuuhu ka nder laana, ɗi naatiri ɗiɗi ɗiɗi ka bee gorun e deyun, wano Allaahu on yamirirnoo Nuuhu non. 10 Balɗe jeeɗiɗi ɓawto ɗun, waamere ndiyan nden waɗi e hoore leydi ndin.
11 E hitaande ka Nuuhu heɓaynoo ɗon duuɓi teemeɗɗe jeegoo, ɲande sappoo e jeeɗiɗi lewru ɗimmuru ndun, ko nden ɲande ɓulli maaje ndiyan ley-leyjan ɗan fow ɓullitii, dambuɗe kammu ngun udditii. 12 Ndiyan ɗan saaƴi ka hoore leydi balɗe cappanɗe nay, jemma e ɲalorma.
13 Ko e nden ɲalaande nde ndiyan ɗan fuɗɗinoo saaƴude tigi, Nuuhu e ɓiɓɓe mun ɓen, ɗun ko Saama e Haama e Yaafasa, wondude e ɓeyngu makko e rewɓe ɓiɓɓe makko ɓen tato naati ka laana, 14 wondude e mummunteeji ɗin fow, ka bee e noone mun: daabeeji ɗin fow, ɗi bee e noone mun, e kala ko daasotoo ka leydi, ka bee e noone mun, e colli ɗin fow, ka bee e noone mun, e kala ko wiirata, ko wondi e gabitti. 15 E nder kala ko tagaa, ko wondi e wonkii, ari e Nuuhu ka laana, ka bee ɗiɗoy ɗiɗoy, 16 koy ardi gorun e deyun, e nder kala ko tagaa naati ka laana wano Allaahu on yamirirnoo Nuuhu non. Ontuma Joomiraaɗo on ombi baafal laana kan e hoore makko.
17 E nder balɗe cappanɗe nay ndiyan ɗan no ɓeydaade ka hoore leydi, ɗan ɗuuɗi haa ɗan towni laana kan ka leydi, ka humbi. 18 Ɗan ɓeydii fota ka hoore leydi haa laana kan humbi ka hoore ndiyan. 19 Ndiyan ɗan ɓurti ɗuuɗude haa pelle njane ɗen fow ka ley kammu ɗoo muti. 20 Ndiyan ɗan mutini pelle ɗen haa ɗan feƴƴitori ɗe embere sogone sappoo e jowi.
21 Kala ko tagaa ko jindaynoo ka hoore leydi maayi, gila e colli ɗin, naɓi e daabeeji ɗin, haa e mummunteeji ɗin, e kala kulloy layaykoy e hoore leydi ndin, wondude e yimɓe ɓen fow. 22 Kala ko mari foofaango ngurndan ka kine mun ka hoore leydi maayi. 23 Allaahu on muli kala ko woni ka hoore leydi, gila e neɗɗanke, haa e daabeeji ɗin e ko daasotoo kon e colli ɗin ka weeyo. O mulidi ɗi fow ka hoore leydi ɗoo. Ko heddinoo woo ko Nuuhu e ko o wondunoo e mun ka laana kon. 24 Ndiyan ɗan mutini leydi ndin e nder balɗe teemedere e cappanɗe jowi.