Fii Qaayiina e Haabiila
4
1 Aadama yiidi e Hawaa ɓeyngu mun, on ƴetti reedu, jibini *Qaayiina, o wi'i: «Mi jibinii boobo gorko e dow ballal Joomiraaɗo on.» 2 Watti e ɗun, o jibini Haabiila miɲan Qaayiina. Haabiila wonti aynoowo dammi, Qaayiina kaɲun nangi demal.3 Ɓay neeɓii, Qaayiina itti sadaka e ko o to'i kon, o yeɗi Joomiraaɗo on. 4 Haabiila kaɲun yeɗi Joomiraaɗo on tale ɓurɗe fayude ɗen ka dammi makko dikkuruuji. Joomiraaɗo on [jaɓi] ngal dokkal Haabiila, o weltori, 5 kono Joomiraaɗo on jaɓidaano Qaayiina e [sadaka] mun on. Qaayiina monii fota fii ɗun, yeeso makko ngon niɓɓiti.
6 Joomiraaɗo on landii Qaayiina: «E ko fii honɗun monaniɗaa, yeeso maa ngon niɓɓitiri nii? 7 Si tawii ko ko moƴƴi waɗuɗaa, a ɓantay hoore. Kono si tawii hinaa ko moƴƴi, haray junuubu no ƴoɓii ka dambugal maa, no hebulani-maa. Kono an foolu on junuubu.»
8 Ontuma Qaayiina noddi miɲan mun Haabiila, o wi'i mo: «Mahen yaaden ka buruure.» Ɓay ɓe hewtoyii ka buruure ton, Qaayiina yani e miɲan mun, o wari mo.
9 Joomiraaɗo on landii Qaayiina: «E ko honto miɲan maa Haabiila woni?»
O jaabii: «Mi andaa, kaa hara ko min halfinaa aynugol miɲan an?»
10 Ontuma Allaahu on daali: «Ko honɗun waɗanɗaa ɗun? Ƴiiƴan miɲan maa ɗan no wullude e an. Hawa majjan no iwtiranammi ka leydi. 11 Jooni mi huɗii ma, mi raɗike ma e ndii leydi ontundi hunduko mun, yari ɗan ƴiiƴan miɲan maa e juuɗe maa. 12 Si a remii, leydi ndin moƴƴintaa toore maa nden hande kadi, a wonay jindoowo wembiiɗo ka aduna.»
13 Qaayiina wi'i Joomiraaɗo on: «Ndii njoddi ɗee kuuɗe an no teddanimmi. 14 Hande a raɗike lan e ndii leydi. Mi wonay suuɗotooɗo ma, mi wona jindoowo wembiiɗo e oo aduna. Kala hendiiɗo lan waray lan.»
15 Joomiraaɗo on daalani mo: «Hinaa non! Kala warɗo Qaayiina yottorte ɗun laabi jeeɗiɗi.» Ontuma Joomiraaɗo on waɗi maande e Qaayiina fii kala yi'uɗo mo wota waru mo. 16 Ontuma Qaayiina pottitii takko Joomiraaɗo on, o yahi, o hoɗoyi e ndii leydi wi'eteendi Nuudu, ka funnaange Adni.
Fii Jurriya Qaayiina on
17 Qaayiina yiidi e ɓeyngu mun, ɓe jiidii ɓiɗɗo gorko, ɓe inni mo Hanuuka. Ko fewndo onsay o sinci saare, o innitiri nden saare on ɓiɗɗo makko wi'eteeɗo Hanuuka. 18 Hanuuka daɲanaa Iraadu, Iraadu daɲanaa Mahuuyaa'iila, Mahuuyaa'iila daɲanaa Matuusaa'iila, Matuusaa'iila daɲanaa Laamaka.
19 Laamaka ƴetti rewɓe ɗiɗo, arano on no wi'ee Aadatu, ɗimmo on no wi'ee Sillatu. 20 Aadatu jibinani mo Yaabaala, ko on woni maamaajo ɓen daakotonooɓe e cuuroy bagi no ayna gureele. 21 Miɲan makko ko Yuubaala innetee, ko on woni maamaajo kala ɲamakalaaɓe, hoɗooɓe hoddu e wuttooɓe ceri. 22 Sillatu kaɲun jibini Tuubaala-Qaayiina, on tafaynooɗo kala aalaaji njandi maa sila. Bandiraawo Tuubaala-Qaayiina on no wi'ee Naamatu.
23 Laamaka noddi rewɓe mun ɓen, o wi'i ɓe: «Ko an, yo Aadatu e Sillatu, jentee lan. Yo onon rewɓe Laamaka, heɗitee konguɗi an ɗin. Mi warii sagataa barminɗo lan, on suka gaaɲuɗo lan. 24 Si warugol Qaayiina ko wonkiiji jeeɗiɗi yoɓirtee, haray ko wonkiiji cappanɗe jeeɗiɗi e jeeɗiɗi warɗo Laamaka yoɓata.»