Fii no Aadama e Hawaa Yaltiniraa ka Tutateeri Adni
3
1 Tawi ko mboddi ndin ɓuri ƴoyre e hakkunde kulle buruure ɗe Alla Joomiraaɗo on tagi ɗen fow. Ndi wi'i debbo on: «Hara ɗun ko haqiiqa, wonde Allaahu on daalii wota on ɲaamu ɓiɓɓe leɗɗe wonɗe ka tutateeri gaa ɗen fow?»2 Debbo on jaabii mboddi ndin: «Meɗen gasa ɲaamude ɓiɓɓe leɗɗe ndii tutateeri, 3 kono fii ɓiɓɓe ngal leggal wongal ka hakkunde tutateeri, Allaahu on daaluno: ‹Wota on ɲaamu ngal, hinaa fere meemon ngal. Si hinaa ɗun on maayay.› »
4 Onsay mboddi ndin wi'i debbo on: «Pellet! On maayataa! 5 Ko ɓay Allaahu on no andi ɲande ɲaamuɗon ɓiɓɓe maggal woo, gite mon ɗen udditoto, wa'on wa Alla, andon ko moƴƴi e ko boni.»
6 Debbo on ndaari tawi ɓiɓɓe ngal leggal no moƴƴi fii ɲaamugol, no foti e ndarɗe, awa kadi no wooɗi fii okkugol hakkil. O tetti, o ɲaami, o okkori moodi makko mo o wondunoo e mun on, on kadi ɲaami. 7 Ontuma gite mo bee e maɓɓe udditii, ɓe andi wonde ɓe surraaki. Onsay ɓe tokkindiri kaaki ƴibbe, ɓe surritori.
8 Onsay ɓe nani Alla Joomiraaɗo on no jinda ka nder tutateeri fewndo ka ɓuuɓol wifata, ɓe suuɗii Alla Joomiraaɗo on ka hakkunde leɗɗe tutateeri. 9 Kono Alla Joomiraaɗo on noddi gorko on, wi'i mo: «E ko honto wonɗaa?»
10 On jaabii: «Mi nanu tun hito maa ka nder tutateeri, mi huli ko fii hari mi surraaki, mi suuɗii.»
11 Allaahu on daali: «E ko hombo yeeti-maa a surraaki, hara a ɲaamii ɓiɓɓe leggal ngal mi toŋan-maa ngal?»
12 Gorko on jaabii: «Ko oo debbo mo ɓannitanɗaa mi okkorimmi ɓiɓɓe ngal leggal, mi ɲaami.»
13 Onsay Alla Joomiraaɗo on daalani debbo on: «Ko honɗun waɗanɗaa ɗun?»
Debbo on jaabii: «Ko mboddi ndin ɗaynimmi haa mi ɲaami.»
14 Ontuma Alla Joomiraaɗo on daalani mboddi ndin: «Ɓay a waɗii ɗun, a huɗaama e hakkunde kala daabeeji e hakkunde kala kulle buruure. A luttay daasaade e leydi, ɲaamaa mbullaari fannamaa hiɗa wuuri. 15 Mi waddindirte e oo debbo, mi waddindira jurriya maa e jurriya makko. Jurriya makko on fuse hoore, an kadi soppaa mo e teddudi.»
16 O daalani debbo on: «Mi ɓeyday muuseendi ŋata maa on tuma jibintaa. Ko e hoore muuseendi jibintaa ɓiɓɓe. Faale fii gorko maa on wonay e maa, awa kadi ko kanko laamoto-maa.»
17 O daalani Aadama: «Ɓay non a heɗike debbo maa on, a ɲaamii ɓiɓɓe ngal leggal ngal mi toŋan-maa, mi huɗii leydi ndin sabu maa. Ko e dow yangi yaltinirtaa e mayri ko ɲaamaa, fannamaa hiɗa wuuri. 18 Leydi ndin fuɗinante bulle e kebbe. A ɲaamay ko fuɗi e buruure. 19 A ɓiiray lakkere ka tiinde maa si ɲaamaa haa ruttoɗaa e ndii leydi ndi yaltuɗaa e mun, ko fii ko a mbullaari, a yiltoto wontaa mbullaari.»
20 Gorko on inni debbo mun on innde, o inni mo Hawaa, ko fii ko kanko woni neene yimɓe ɓen fow. 21 Alla Joomiraaɗo on waɗani Aadama e Hawaa conci guri, o ɓorni ɓe.
22 Alla Joomiraaɗo on daali: «Awa e hino, aaden wa'ii wa goɗɗo e men, andugol ko moƴƴi e ko boni. Jooni haɗen mo fawugol jungo e hoore ngal leggal ngurndan, sakko o ɲaama ngal, o wuura haa poomaa.» 23 Joomiraaɗo on yaltini on aaden ka tutateeri Adni, fii yo o golloy e leydi ndi o ittaa e mun ndin. 24 Ɓay o raɗike on aaden, o joɗɗini *serubiinaaji ka funnaange tutateeri, e kaafa yiltondirayka, wuttayka ɗenɗe yiite, ko ayna laawol leggal ngurndan ngal, hara hay gooto hewtaali ɗon.