2
1 Ko non kammuuli ɗin e leydi ndin, e ɗuuɗannde tagoore e nder majji gaynitoraa. 2 Ɲalaande jeeɗiɗaɓere nden taw Allaahu on gaynii golle ɗe o wonnoo huuwude ɗen, ka ɲalaande jeeɗiɗaɓere o fowtii kala golle ɗe o waɗi. 3 Allaahu on waɗi barki e nden ɲalaande jeeɗiɗaɓere, o waɗi nde hormorteende, ko fii ko e mayre Allaahu on fowtii kala golle ɗe o waɗi fii tagugol.Fii Aadama e Hawaa
4 E hino ɗoo taariika kammu ngun e leydi ndin fewndo ɗun taganoo. Fewndo Alla Joomiraaɗo on tagaynoo leydi ndin e kammu ngun 5 hari lekkun hay gootun alaa e leydi ndin, kuɗun hay gootun fuɗaa. Ko waɗi ɗun ko tawde hari Alla Joomiraaɗo on accitaali ndiyan saaƴoojan e aduna on, hari kadi aaden tagaaka ko rema leydi ndin. 6 Kono hari ndiyan no tubba ka leydi, no ɓuɓɓina ndelo leydi ndin fow. 7 Alla Joomiraaɗo on tagiri aaden mbullaari leydi, o foofi foofaango ngurndan ka kine makko, ontuma aaden on heɓi ngurndan, o wuuri.
8 Ontuma Alla Joomiraaɗo on waɗi tutateeri e nokkuure no wi'ee Adni, hikkorde funnaange, o honni ɗon on aaden mo o tagi. 9 Alla Joomiraaɗo on fuɗini nooneeji leɗɗe fow fotuɗe mbaadi e moƴƴuɗe fii neema. Tawi leggal ngurndan e leggal andinayngal ko moƴƴi e ko boni no darii ka hakkunde tutateeri.
10 Tawi maayo no tubbi ka Adni ɗon no yarna tutateeri ndin. Ngon maayo no senditii waɗi canɗi nay. 11 Caangol aranol ngol ko Fiisuuniwol. Ko ngol taƴiti leydi Hawiila ndin fow, kaŋŋe no e ndin leydi, 12 kaŋŋe laaɓuɗe poy, e enɗan leɗɗe urnayɗan e kaaƴe hittuɗe no wi'ee aljaz'i. 13 Caangol ɗimmol ngol ko Jiihuuniwol, ko ngol taƴiti leydi Kuusu ndin. 14 Caangol tammol ngol ko Hiddaaqiluwol wi'etee, ngol no hammiri ka funnaange leydi Asuura ndin. Caangol nayaɓol ngol ko Furaatiwol.
15 Alla Joomiraaɗo on ƴetti aaden mo o tagi on, o honni mo ka tutateeri Adni ɗon fii yo on remu ɗon, ayna. 16 Alla Joomiraaɗo on yamiri aaden on: «Hiɗa newnanaa ɲaamugol kala ɓiɓɓe leɗɗe wonɗe e ndii tutateeri, 17 si hinaa ɓiɓɓe leggal andinayngal ko moƴƴi e ko boni kon, ko fii ɲande ɲaamuɗaa ngal woo, a maayay nden ɲande.»
18 Alla Joomiraaɗo on daali: «Haanaa ka oo aaden wona bajjo. Mi taganay mo ballo, hawranɗo mo.» 19 Alla Joomiraaɗo on tagiri leydi kala kulle buruure e colli wiirayɗi ka weeyo, o ɓanniti ɗun fow takko on aaden fii ndaarugol no on innirta ɗen fow. Kala ko o inni kullun wuurukun, ko ɗun woni innde makkun. 20 On aaden inni kala daabeeji, kala colli wiirooji, e kala kulle buruure, kono hari aaden on heɓaali ballo, hawranɗo mo.
21 Onsay Allaahu on liɓi ŋorre tiiɗunde e on aaden, on ɗaanii. O ƴetti ƴi'al gootal ka cabbi birɗe on aaden, o lontiniri ka ngal wonnoo ɗon ɓandu. 22 Alla Joomiraaɗo on ƴetti ngal ƴi'al ngal o itti e on aaden, o watti ngal debbo, o addani mo Aadama. 23 Ontuma non gorko on wi'i:
«E hino non ƴi'e ƴi'e an,
e ɓandu ɓandu an.
Oo ko debbo wi'etee,
ko fii ko e gorko o ittaa.»