Gila e Aadama haa e Nuuhu
5
1 E hino taariika iwdi Aadama ndin:Fewndo Allaahu on tagi aaden, o waɗi mo wa sugu makko kanko Alla. 2 O tagi ɓe gorko e debbo, o waɗi barki e maɓɓe. Ɲande o tagi ɓe, o inni ɓe aaden.
3 Ko ka Aadama heɓi ɗon duuɓi teemedere e cappanɗe tati, o daɲanaa boobo gorko sugu makko e nando makko, o inni on Siita. 4 Ɓawto Siita jibineede, Aadama wuuri duuɓi teemeɗɗe jeetati, o daɲanaa ɓiɓɓe goo, worɓe e rewɓe. 5 Ngurndan Aadama ɗan fow hawri duuɓi teemeɗɗe jeenay e cappanɗe tati, onsay o faatii.
6 Ko ka Siita heɓi ɗon duuɓi teemedere e jowi, o daɲanaa ɓiɗɗo gorko, on no wi'ee Anuusa. 7 Ɓawto Anuusa jibineede, Siita wuuri duuɓi teemeɗɗe jeetati e jeeɗiɗi, o daɲanaa ɓiɓɓe goo, worɓe e rewɓe. 8 Ngurndan Siita ɗan fow hawri duuɓi teemeɗɗe jeenay e sappoo e ɗiɗi, onsay o faatii.
9 Ko ka Anuusa heɓi ɗon duuɓi cappanɗe jeenay, o daɲanaa ɓiɗɗo gorko, on no wi'ee Kiinaana. 10 Ɓawto Kiinaana jibineede, Anuusa wuuri duuɓi teemeɗɗe jeetati e sappoo e jowi, o daɲanaa ɓiɓɓe goo, worɓe e rewɓe. 11 Ngurndan Anuusa ɗan fow hawri duuɓi teemeɗɗe jeenay e jowi, onsay o faatii.
12 Ko ka Kiinaana heɓi ɗon duuɓi cappanɗe jeeɗiɗi, o daɲanaa ɓiɗɗo gorko, on no wi'ee Mahalaliila. 13 Ɓawto Mahalaliila jibineede, Kiinaana wuuri duuɓi teemeɗɗe jeetati e cappanɗe nay, o daɲanaa ɓiɓɓe goo, worɓe e rewɓe. 14 Ngurndan Kiinaana ɗan fow hawri duuɓi teemeɗɗe jeenay e sappo, onsay o faatii.
15 Ko ka Mahalaliila heɓi ɗon duuɓi cappanɗe jeegoo e jowi, o daɲanaa ɓiɗɗo gorko, on no wi'ee Yaarada. 16 Ɓawto Yaarada jibineede, Mahalaliila wuuri duuɓi teemeɗɗe jeetati e cappanɗe tati, o daɲanaa ɓiɓɓe goo, worɓe e rewɓe. 17 Ngurndan Mahalaliila ɗan fow hawri duuɓi teemeɗɗe jeetati e cappanɗe jeenay e jowi, onsay o faatii.
18 Ko ka Yaarada heɓi ɗon duuɓi teemedere e cappanɗe jeegoo e ɗiɗi, o daɲanaa ɓiɗɗo gorko, on no wi'ee Hanuuka. 19 Ɓawto Hanuuka jibineede, Yaarada wuuri duuɓi teemeɗɗe jeetati, o daɲanaa ɓiɓɓe goo, worɓe e rewɓe. 20 Ngurndan Yaarada ɗan fow hawri duuɓi teemeɗɗe jeenay e cappanɗe jeegoo e ɗiɗi, onsay o faatii.
21 Ko ka Hanuuka heɓi ɗon duuɓi cappanɗe jeegoo e jowi, o daɲanaa ɓiɗɗo gorko, on no wi'ee Matuusaalaha. 22 Ɓawto Matuusaalaha jibineede, Hanuuka wuuri duuɓi teemeɗɗe tati e hoore himo jokkinoo e Alla. 23 Ngurndan Hanuuka ɗan fow hawri duuɓi teemeɗɗe tati e cappanɗe jeegoo e jowi. 24 Hanuuka jokkii e Alla, ontuma o muti, ko fii Allaahu on ƴentinno mo.
25 Ko ka Matuusaalaha heɓi ɗon duuɓi teemedere e cappanɗe jeetati e jeeɗiɗi, o daɲanaa ɓiɗɗo gorko, on no wi'ee Laamaka. 26 Ɓawto Laamaka jibineede, Matuusaalaha wuuri duuɓi teemeɗɗe jeeɗiɗi e cappanɗe jeetati e ɗiɗi, o daɲanaa ɓiɓɓe goo, worɓe e rewɓe. 27 Ngurndan Matuusaalaha ɗan fow hawri duuɓi teemeɗɗe jeenay e cappanɗe jeegoo e jeenay, onsay o faatii.
28 Ko ka Laamaka heɓi ɗon duuɓi teemedere e cappanɗe jeetati e ɗiɗi, o daɲanaa ɓiɗɗo gorko. 29 O inni on Nuuhu, himo wi'a, «Oo ɗoo addanay en newaare e nder ɗee golle men e kii yangi demal juuɗe men ndii leydi ndi Joomiraaɗo on huɗi.» 30 Ɓawto Nuuhu jibineede, Laamaka wuuri duuɓi teemeɗɗe jowi e cappanɗe jeenay e jowi, o daɲanaa ɓiɓɓe goo, worɓe e rewɓe. 31 Ngurndan Laamaka ɗan fow hawri duuɓi teemeɗɗe jeeɗiɗi e cappanɗe jeeɗiɗi e jeeɗiɗi, onsay o faatii.
32 Ka Nuuhu heɓunoo duuɓi teemeɗɗe jowi ɗon, o daɲanaa Saama e Haama e Yaafasa.