Ubu Ni sansinir tali lanit ratan i nomor ilima nafraik ni tvuri a
1 Ubu Ni sansinir tali lanit ratan i nomor ilima nafraik ni tvuri a,
na usi'ik nara isa nleka roak tali lanit ma nsuta lanit ini.
Nara yai ntaha kusi i rala roak verin ia ma nvadil tivat matmatan i bilaman urun a.
2 Nara yai nvadil tivat matmatan yai ni nulan a,
ba uman i ndata yai amafal ma wean i tasnuri va'i ra.
Uman dawan yai nkoval lilit lahir lanit ivavan ini,
ovu nteri vali lera a ma dedan watan.
3 Kabina ra rtali uman dawan yai ralan a rma lanit ivavan ini.
Ubu nala ngrebat verin kabina avyai,
boma rsikatan vali,
wean katkatan ra.
4 Ia nfalak verin ira ne,
“Deka myot-visal afa irubun ra,
ngrova ra ovu aa ra.
Na'uk myotu wawa'uk i dawan na'a watan tamata ovi wol rira Ubu Ni faneak* a na'a rearira ra.”
5 Ubu ntorung ma kabina avyai rotu ma tamata avyai rfarnuang wawa'uk,
ti naran vulan ilima,
na'uk wol rotu ma rmata.
Wawa'uk i rfarnuang tevek kabina avyai,
wean lahir wawa'uk i tfarnuang na'ut i katkatan a nkatan.
6 Tali vulan ilima yai,
na tamata avyai veka rdava matmatan a,
na'uk wol rdav-nala.
Ira vali inar ma rmata,
tevek wawa'uk yai,
na'uk wol rmat-nala.
7 Kabina avyai felarira ra wean kuda ovi rasusan roak ira mane rti rotu rihi.
Na'a ulurira ratan ra,
na afa isa wean kalulu masa i raja ra ba'i raklulu,
ovu waharira ra wean tamata.
8 Rira vut ra wean vata rira vut ra,
ovu nifarira ra dawan ovu ramneran ma wean singa nifan ra.
9 Rteri buburira ra ovu ravit i wean tma'an.
Manirira ra ngoar ma wean kuda dur ovi rlia kareta ra ma rafla mane rti rotu rihi.
10 Kikurira ra ramneran ma wean katkatan kikurira ra,
ovu rira bisa a nangrebat.
Rira ngrebat nana'a kikurira ra,
ma rotu ma tamata ra rfarnuang wawa'uk i sian urun a,
ti naran vulan ilima.
11 Ira rira raja isa,
nfareta ira.
Raja yai,
sansinir* i ntali tivat matmatan i bilaman urun ia yai.
Ia naran irua lahir;
na'a vai Ibrani naran a Abadon,
na'a vai Yunani naran a Apolion.
Naran irua yai ihirira ne,
afa ovi rot-visal afaka watan.
12 Sian urun i lahir hi ula lalean a nkena lan roak lanit ivavan a,
nbosal roak.
Fiang ini sian urun i lahir,
irua veka rma vali.*
Ubu Ni Sansinir tali lanit ratan i nomor inean nafraik ni tvuri a
13 Ubu Ni sansinir tali lanit ratan i nomor inean nafraik ni tvuri a,
na urenar vai isa ntali wan i rotu tali masa ni susun ifa'at a.
Wan yai ba'i rasnuri aa ovi voarira ra lolin verin Ubu,
na'a wahan ralan a.
14 Vai yai nfalak verin Ubu Ni sansinir yai ne,
“Fwatalik Ubu Ni sansinir ifa'at tali lanit ratan i rkeak ira na'a oar dawan Efrat!”
15 Ba Ubu Ni sansinir i nomor inean yai nfatalik Ubu Ni sansinir ifa'at yai,
ma veka rti ma rfedan sepertiga tamata ovi rna'a lanit ivavan ini.
Ubu nfadoku roak ma Ni sansinir avyai rfedan tamata ra,
na'ut amar,
vulan,
ovu ta'un ovi nfadoku ma rotu a.
16 Ti ma wol urea roak sansinir ifa'at yai,
na urenar vai isa nfalak ne,
“Suldadu juta ratut irua rdata rira kuda ra ma rma ma rasdovu ira.”
17 Nata wean i umifi,
na'uk wol utub-lufa ma urea vali ne,
tamata ovi rdata kuda avyai,
roru ravit tma'an ma al rteri buburira ra.
Ravit avyai rira warna valvulin,
biru wean tahat i na'a aletan,
ovu wean vatu unil ovi ryadat urun a naran belerang.
Kuda avyai ulurira ra wean singa,
ovu yafu,
yafuman ovu vatu belerang rtali vavarira ra rma murin.*
18 Sepertiga tali tamata ovi rna'a lanit ivavan ini rmata munuk.
Ira rfarnuang rira wawa'uk ma rmata,
tevek yafu,
yafuman,
ovu vatu belerang rkena ira.
19 Kuda avyai rira ngrebat tali sumarira ra ovu kikurira ra ma rvisal-rvasil tamata ra.
Kikurira ra wean nifa ma ulurira ra rvisal-rvasil tamata ra.
20 Na'uk tamata ovi wol rmata tali sian dawan avyai,
ira wol rahil obin ma rtalik tali rira salasilan ovi rotu ra.
Ira wol rtalik ma rsangatur ma raraning nait sian ra ovu walut ovi rotu ovu limarira,
tali masa,
perak,
tembaga,
vatu,
ovu aa.
Walut avyai wol rsirea,
wol rafrenar,
ovu vali wol rbana ovu wol rfaduak lahir.
21 Ira rafena ma rahil ma rtalik tali rira sifedan ra.
Ira rafena vali ma rtalik tali rira afa ovi rtaha ra te rira afnitu ra,
ovu vali rafena ma rahil ma deka rsifa tia ma watan ovu tamata ovi wol awarira verin ira.
Rafena vali ma rahil tali rira barborin ra.