Domba Yanan a nkamsat segel nomor ifitu
1 Ti ma Domba Yanan yai nkamsat segel nomor ifitu yai,
na wol afa isa vali ngoan a na'a lanit ratan a,
ka'a bi menit vututelu.*
2 Nata usi'ik Ubu Ni sansinir ifitu tali lanit ratan rdiri Ubu wahan ralan a.
Ia nala tvuri,
sasan lokat ira.
3 Ubu Ni sansinir liak isa nma vali ma ti ndir-ebang wan i rasnuri afa ovi voan lolin verin Ubu.
Ia ntaha ngusi isa i rotu tali masa.
Rala ma rivun afa ovi rasnuri ma umarira voar lolin,
ma nfadoku ma neluk ni persembahan verin Ubu.
Ia nala afa avyai ovu tamata ovi rorang Yesus rira falurut ra,
ma rfadoku na'a wan i rasnuri afa ovi voar lolin avyai.
Ira rotu wan yai tali masa ma rfadoku na'a wan i Ubu ndoku ma nfareta ngoran a.
4 Rasnuri afa ovi voar lolin avyai,
ma uman a nafkoval ma nrata ratan ovu tamata ovi rorang Yesus rira falurut ra.
Afa avyai rtali sansinir yai liman ralan a ma nrata lahir Ubu wahan ralan a.
5 Nata sansinir yai nala yafaran ovi rna'a wan i rasnuri afa ovi voar lolin na'a yai,
ma nfadoku na'a ngusi,
beti nvatuk yafaran yai nsuta lanit ivavan ini.
Ba dodung a ngoan ma wean nangfefar,
ovu fitik a nyelar lilit lahir,
ovu vali ruru dawan na'a lanit ivavan ini.
Ubu Ni sansinir ra tali lanit ratan rafraik tvuri
6 Ba ti ma afa avyai roak,
na Ubu Ni sansinir ifitu tali lanit ratan ovi rtaha tvuri ifitu yai rasusan roak mane rafraik tvuri ra.
7 Ubu Ni sansinir tali lanit ratan i nbana ula ia nafraik lan ni tvuri a,
na rvatuk lahir da'ut es ovu yafu,
nsileti ovu lara nsuta lanit ivavan a.
Ba sepertiga lanit ivavan a nlevur,
ovu aa ra rlevur vali ma wean inyai.
Ngrova ovi rva'at ra munuk lahir rlevur vali.*
8 Sansinir i nomor irua nafraik ni tvuri a,
na afa isa wean vuar dawan,
ovu nonga lalawatan ma rasba vatuk nsuta tahat.
Ba sepertiga tahat a lara watan,
9 ovu afwatan ovi rna'a tahat ralan,
sepertiga rmata vali,
ovu vali kabal ovi rna'a tahat ratan a,
sepertiga rama'ar munuk.
10 Sansinir i nomor itelu nafraik vali ni tvuri a,
ba nara dawan isa nleka tali lanit ratan nsuta,
ma ongan a wean obor.
Nara yai nleka nsuta ma nkena lahir sepertiga oar ra ovu wear matan ra.
11 Nara yai naran Apsintus,
ihin a ne,
kfera.
Ba sepertiga tali wear ra munuk kfera,
ovu tamata ra rmata ma dawan,
tevek renu wear i kfera roak yai.
12 Sansinir i nomor ifa'at yai nafraik ni tvuri a,
ma wean i tamata rfar-visal lera,
vulan ovu nara ra.
Ba sepertiga tali lera,
vulan ovu nara ra wol vanar.
Amar na,
lera vanan sepertiga watan.
Ovan,
na vulan ovu nara ra vanarira sepertiga vali.
13 Nata usi'ik ovu urenar lahir kyabila'a isa noru ma karatat urun ia,
ma nafwak ma vain dawan urun ia ne,
“Sian urun,
sian urun,
sian urun i lahir tamata ovi mnya'a lanit ivavan ini,
tevek sansinir itelu veka rafraik vali rira tvuri ra.”