Yohanes nrea Ubu Ni sansinir tali lanit ratan i ntaha buku lalulung
1 Nata urea Ubu Ni sansinir liak isa i nangrebat urun a,
ntali lanit ratan nsuta.
Mutan isa nkuma Ubu Ni sansinir yai,
ovu lermida nvevar lilit ulun a.
Ia wahan a nyadat ma wean lera,
ovu ean a wean liri ovi rfangrebat rahan ra.
Liri avyai ryadat ma wean yafu.
2 Ia ntaha velar watan buku lalulung i ko'u a na'a liman a.
Ia ndiri ma ean mela nta tahat,
na ean balit a nta vali lanun a.
3 Ia nafwak ma vain a dawan,
wean singa vain a.
Ia nafwak munuk,
na dodung ifitu rvalat ia ovu vairira dawan.
4 Ti ma dodung nvalat nala fafitu,
na mane utulis afa ovi nfalak ra,
na'uk urenar vai isa ntali lanit ratan nma ma nfalak ne,
“Deka fwalyawang afa ovi dodung avyai rfalak ra.
Deka mtulis afa avyai!”
5 Ba usi'ik Ubu Ni Sansinir i ndiri tahat ovu lanun,
ma nsikat liman mela nrata lanit.
6-7 Ubu notu lanit ovu lanit ivavan a,
tahat ovu afa ovi rna'a ralan a,
ovu Ia nva'at kakiwal.
Ba Ubu Ni sansinir yai nala Ubu i sa'i dawan naran a ma al nafwaba ma nfalak ne,
“Ubu wol nanaban roak,
ba notu lahir afa ovi nfadoku roak a!
Na'ut i Ubu Ni sansinir i nomor ifitu nafraik ni tvuri a,
na Ubu veka notu lahir afa fanfonak ovi tamata ra wol rka'a,
wean i nfalak lan roak verin nabi ovi rfamalik Ni vaivatul ra.”*
8 Vai i urenar tali lanit ratan yai nfalak vali verin ya'a ne,
“Muti ma mala buku lalulung i natvelar na'a Ubu Ni sansinir i ndiri tahat ovu lanun yai liman ralan a.”
9 Ba uti ma utuan Ubu Ni sansinir yai ma era tali ia,
ma nala buku lalulung yai verin ya'a.
Ia nfalak verin ya'a ne,
“Mala ma muan buku lalulung yai.
Na'a vavam ralan a,
na laran a manminak ma wean wenan vahan,
* na'uk veka notu ma fwarnuang,
na evum ralan a kfera.”
10 Nata al roak buku lalulung yai tali Ubu Ni sansinir yai liman a,
ma uan.
Na'a vavang ralan a,
laran a wean wenan vahan.
Na'uk ti ma utelas,
na ufarnuang evung ralan a kfera.
11 Ba nfangnanang ya'a ma nfalak ne,
“Oa musti fwamalik ewal afa ovi Ubu nfadoku roak verin tamata ovi rtali bangsa rivun,
ovu rtali negara rivun,
ovu raja rivun,
ovu vali rtali vai rivun ovi rna'a lanit vavan a.”