نࣷ دَاوْدَ جَالࣷرِي لٜنيِ ݠِيلِيطِ إِسْرَاعِيلَ
(2 سَمُوِيلَ 8:1-14)
18
1 شَغَّلْ طُومْ دَاوْدَ جَالِي ڢِلِسْتِيَنْکࣷوٻٜ دٜ سٜمْتِنِ طُمْعٜنْ. أࣷ تٜىٰتِ ٻٜ غَلُّورٜ غَتْ إٜ دُرْدُطٜ مُوطُمْ. 2 أࣷ جَالِي مࣷعَبِنْکࣷوٻٜ. ٻٜ لَاتِي مَشُّٻٜ مَکّࣷ يࣷٻࣷوٻٜ أࣷ لَمْݠࣷ.
3 دَاوْدَ جَالِي هَدَدْ-إٜجٜرْ، کَانَنْکٜ سࣷبَ ڢَرࣷ هَمَتْ وَکَّتِ هَدَدْ-إٜجٜرْ أࣷونْ يَهُنࣷو مَايࣷ إٜڢْرَتْ ڢَا جࣷڃِّنࣷوَ لَامُ مُوطُمْ ندٜىٰنْ. 4 أࣷ تٜىٰتِ تࣷرْکࣷوجِ 1٬000 إٜ هࣷنࣷوٻٜ وَطِّيٻٜ ݠُشِّ 7٬000 إٜ يَهࣷوٻٜ إٜ کࣷيْطٜ 20٬000. أࣷ إِتَّنِ هࣷورٜ مَکّࣷ ݠُشِّ 100 أَمَّا کٜدِّيطِ طِينْ ڢُو أࣷ وَطِ شࣷدُّلِ مُٻّٜنْ تَڃَا.
5 سِيرِيَنْکࣷوٻٜ دَمَسْ نغَرِ مبَلِّتِ هَدَدْ-إٜجٜرْ، کَانَنْکٜ سࣷبَ أࣷونْ دٜ دَاوْدَ وَرِ سࣷرْدَاسِيٻٜ مُٻّٜنْ 22٬000. 6 دَاوْدَ جࣷڃِّنِ سࣷرْدَاسِيٻٜ مُوطُمْ لٜيْدِ سِيرِيَ لٜيْ غَلُّورٜ دَمَسْ. أࣷ دَوْرَنِ سِيرِيَنْکࣷوٻٜ ٻٜىٰنْ، إِمࣷ يࣷٻْنࣷو طُمْعٜنْ لَمْݠࣷ. جࣷومِرَاطࣷ نَ هࣷکَّنّࣷو أࣷ جَالࣷرْغَلْ نࣷکُّ ڢُو تࣷ أࣷ يَهَنّࣷو. 7 دَاوْدَ هࣷوڃِ بَوَاطٜ کَݝّٜ طٜ سࣷرْدَاسِيٻٜ هَدَدْ-إٜجٜرْ تِيغِنࣷو يَارِ أُرُسَلِيمَ. 8 أࣷ هࣷوڃِ نجَمْندِ مبࣷطٜىٰرِ طُوطُندِ لٜيْ وُرࣷ تِبَتْ إٜ نغࣷ کُنْ، غَلُّوجٜ هَدَدْ-إٜجٜرْ. وࣷ نجَمْندِ ندِينْ سُلٜيْمَانَ وَطِرِ تَاسَوَلْ مَنّغَلْ بِعٜتٜىٰنغَلْ مَايࣷ إٜ بِمّبٜىٰجٜ إٜ کُجّٜ غࣷلِّتِرْطٜ لٜيْ غَلّٜ سُودُ سٜنِيندُ.
9 تࣷهُ، کَانَنْکٜ هَمَتْ نَنِ دَاوْدَ جَالَکٜ کࣷنُنْکࣷوٻٜ کَانَنْکٜ هَدَدْ-إٜجٜرْ مࣷ سࣷبَ ٻٜىٰنْ ڢُو. 10 تَوِ کَنْکࣷ دُ إِمࣷ هَٻْدَنّࣷو إٜ هَدَدْ-إٜجٜرْ أࣷونْ. طُومْ سَابِي دٜ أࣷ نٜلِ ٻِيِيکࣷ هَدࣷرَمْ تࣷ کَانَنْکٜ دَاوْدَ ڢَا جࣷوْتَ طُمْ دٜ يٜتَّ طُمْ سَابٜ جَالَکٜ هَدَدْ-إٜجٜرْ. أࣷ نٜلْدِ دَاوْدَ کُجّٜ غَطِرَاطٜ کَݝّٜ إٜ شَرْدِ إٜ نجَمْندِ مبࣷطٜىٰرِ. 11 کَانَنْکٜ دَاوْدَ سٜنِنَنِ طٜ جࣷومِرَاطࣷ، کَنجٜ إٜ کُجّٜ کَݝّٜ إٜ شَرْدِ طٜ تٜىٰتُنࣷو إٜدࣷمِنْکࣷوٻٜ إٜ مࣷعَبِنْکࣷوٻٜ إٜ أَمࣷنِنْکࣷوٻٜ إٜ ڢِلِسْتِيَنْکࣷوٻٜ إٜ أَمَلٜکِنْکࣷوٻٜ طٜىٰنْ ڢُو.
12 أَبِسَيْ، ٻِي سٜرُيَ جَالِي إٜدࣷمِنْکࣷوٻٜ 18٬000 لٜيْ نَطّࣷلْ لَمْطَمْ. 13 أࣷ جࣷڃِّنِ سࣷرْدَاسِيٻٜ لٜيْ إٜدࣷمْ دٜ يِمْٻٜ لٜيْدِ ندِينْ ڢُو لَاتِي مَشُّٻٜ دَاوْدَ. جࣷومِرَاطࣷ نَ هࣷکَّنّࣷو دَاوْدَ جَالࣷرْغَلْ تࣷ يَهَتَ ڢُو.
إِنْطٜ مَوْٻٜ لَامُ دَاوْدَ
(2 سَمُوِيلَ 8:15-18)
14 دَاوْدَ لَامِي دࣷوْ إِسْرَاعِيلَ ڢُو. إِمࣷ هِيتࣷرࣷنࣷو يِمْٻٜ مَکّࣷ غࣷونغَ إٜ دَرْتَارٜ. 15 يࣷعَبْ، ٻِي سٜرُيَ وࣷنّࣷو مَوْطࣷ کࣷنُنْکࣷوٻٜ مَکّࣷ. يࣷوسَڢَتْ، ٻِي أَهِلُدْ وࣷنّࣷو کَيْبࣷووࣷ دٜوْتٜ کَبَارُوجِ لَامُ. 16 سَدࣷکْ، ٻِي أَهِتُبْ إٜ أَبِمٜلٜکْ ٻِي أَبِيَتَرْ لَاتِنࣷو أَلْمَامِعٜنْ. سَبْسَ وࣷنّࣷو بِنّدَنࣷووࣷ کَانَنْکٜ. 17 بٜنَيَ، ٻِي يٜهࣷيَدَ وࣷنّࣷو أَرْدِيطࣷ کٜرٜتِيَنْکࣷوٻٜ إٜ ݠٜلٜتِيَنْکࣷوٻٜ رٜىٰنࣷوٻٜ دَاوْدَ. ٻِٻّٜ دَاوْدَ لَاتِنࣷو هࣷورٜىٰٻٜ لٜيْ لَامُ مُوطُمْ.