نٜلَاٻٜ دَاوْدَ تࣷ کَانَنْکٜ هَنُنْ
(2 سَمُوِيلَ 10:1-5)
19
1 شَغَّلْ طُومْ، نَهَسْ، کَانَنْکٜ أَمࣷنِنْکࣷوٻٜ مَايِ دٜ ٻِيُمْ هَنُنْ لࣷومْتِ طُمْ لَامِي. 2 دَاوْدَ وِعِ: — مِ ندَارْدَنْ هَنُنْ ٻِي نَهَسْ هِنّٜيْ سَبࣷ بَمُّمْ ندَارْدِينࣷ کَمْ جَمْ.
أࣷ وَطِ نٜلَاٻٜ نجٜهِ نجࣷوْتࣷوِ طُمْ سَابٜ مَايْدٜ بَمُّمْ ندٜىٰنْ. يِمْٻٜ دَاوْدَ ٻٜىٰنْ نجࣷتِّي لٜيْدِ أَمࣷنِنْکࣷوٻٜ تࣷ هَنُنْ ڢَا نجࣷوْتَ طُمْ. 3 أَمَّا أَرْدِيٻٜ لَامُ أَمࣷنِنْکࣷوٻٜ مبِعِ هَنُنْ:
— يَلَّ أَطَ مِيلَ وࣷ تٜدِّندٜ بَابَ مَ دَاوْدَ هَاجَا دٜ نٜلِ يِمْٻٜ ٻٜىٰ نغَرَ جࣷوْتٜ نَا؟ وَنَا ڢَا ٻٜ کࣷرَ لٜيْدِ ندِي، ٻٜ أَنّدِتَ ندِ دٜ ٻٜ کࣷنَ ندِ نَا؟
4 ندٜىٰنْ هَنُنْ نَنّغِ نٜلَاٻٜ دَاوْدَ ٻٜىٰنْ ڢٜمّبِ طُمْعٜنْ، تَڃِ کَدُّلٜ مُٻّٜنْ ڢَا يࣷتِّي هَکُّندٜ ٻَلِّ دٜ يٜشِّنِ طُمْعٜنْ. 5 دَاوْدَ هَالَنَا کَبَارُ مَجُّمْ دٜ نٜلِ وࣷٻّٜ کَوْرࣷوَ ٻٜ سَبࣷ سٜمْتٜىٰندٜ نَ هُرُّنࣷو ٻٜ. کَانَنْکٜ وِعِ ٻٜ مبِعٜىٰ ٻٜ کٜدّࣷو يٜرِکࣷ ڢَا ندٜ بَيٜ مَٻّٜ ݠُطْتِ. شَغَّلْ طُومْ إِٻٜ مبَاوِ وَرْتُدٜ.
نࣷ دَاوْدَ هࣷنِرِ أَمࣷنِنْکࣷوٻٜ إٜ أَرَمِنْکࣷوٻٜ
(2 سَمُوِيلَ 10:6-19)
6 ندٜ أَمࣷنِنْکࣷوٻٜ ݠَامُنࣷو لَاتَکٜ ٻٜ دَاوْدَ هُتِي ڢُ، هَنُنْ إٜ يِمْٻٜ مُوطُمْ نٜلْدِ سِيرِيَنْکࣷوٻٜ مٜسࣷݠࣷتَمِ إٜ ٻٜ مَاکَ إٜ سࣷبَ کِلࣷوجِ شَرْدِ 30٬000 ڢَا ٻٜ کٜٻَ تࣷرْکࣷوجِ إٜ وَطّࣷتࣷوٻٜ ݠُشِّ تࣷ مُٻّٜنْ. 7 ٻٜ کٜٻِ تࣷرْکࣷوجِ 32٬000 تَوْتِ کَانَنْکٜ مَاکَ إٜ يِمْٻٜ مُوطُمْ. ٻٜىٰنْ ندَرْنِ کࣷطࣷرْطٜ مُٻّٜنْ يٜىٰسࣷ مٜدِبَ. أَمࣷنِنْکࣷوٻٜ دُ، مبُرْتِي غَلُّوجٜ مُٻّٜنْ نغَرِ کَوْرِتِ إٜ مَٻّٜ تࣷ وࣷلْدٜ تࣷونْ. 8 ندٜ دَاوْدَ نَنّࣷو طُمْ ڢُ، نٜلِ يࣷعَبْ إٜ کࣷنُنْکࣷوٻٜ ڢُو تࣷ مَٻّٜ. 9 أَمࣷنِنْکࣷوٻٜ ٻٜىٰنْ مبُرْتِي ندَرࣷوِي نَارُدٜ غَلُّورٜ ندٜىٰنْ نَ شٜغِلَنِي وࣷلْدٜ. کَانَنْکࣷوٻٜ وَرُنࣷوٻٜ ٻٜىٰنْ کٜدِّي لٜيْ لَدّٜ.
10 يࣷعَبْ ندَارِ تَوِ سٜيْ هࣷنِرَ غَطَ إٜ يٜىٰسࣷ ڢُو. ندٜىٰنْ سُٻِي کࣷنُنْکࣷوٻٜ ٻُرْٻٜ هَرْوُدٜ دٜ أَرْدِي طُمْعٜنْ إٜ هࣷنُدٜ سِيرِيَنْکࣷوٻٜ ٻٜىٰنْ. 11 أࣷ هَلْڢِنِ سَکِيکٜ مَکّࣷ أَبِسَيْ کࣷنُنْکࣷوٻٜ هٜدِّيٻٜ دٜ ٻٜىٰنْ نجٜهِ کَٻْدࣷوِ إٜ أَمࣷنِنْکࣷوٻٜ. 12 أࣷ وِعِ طُمْ:
— سِ سِيرِيَنْکࣷوٻٜ ٻٜىٰنْ ٻُرِي کَمْ سٜمّبٜ ڢُ، نغَرَ مبَلَّا کَمْ. وࣷوطِ سِ أَمࣷنِنْکࣷوٻٜ ٻُرِ مَ سٜمّبٜ دُ، مِ وَرَنْ مِ وَلّٜ. 13 سٜمّبِنْطِنْ ٻٜرْندٜ مَاطَ، نغَطٜنْ نغࣷرْغُ، ندَرَنࣷطٜنْ يِمْٻٜ مٜىٰطٜنْ إٜ غَلُّوجٜ لَامْطࣷ مٜىٰطٜنْ. جࣷومِرَاطࣷ وَطَ مُويْطٜ مُوطُمْ.
14 يࣷعَبْ إٜ کࣷنُنْکࣷوٻٜ مُوطُمْ نجٜهِ هَٻْدࣷيْدٜ إٜ سِيرِيَنْکࣷوٻٜ. سِيرِيَنْکࣷوٻٜ ٻٜىٰنْ ندࣷغِّ يٜىٰسࣷ مَکّࣷ. 15 ندٜ أَمࣷنِنْکࣷوٻٜ ݠَامُنࣷو سِيرِيَنْکࣷوٻٜ ندࣷغِّي ڢُ، کَمْعٜنْ دُ ندࣷغِّ يٜىٰسࣷ أَبِسَيْ سَکِيکٜ يࣷعَبْ أࣷونْ، نَاتِ لٜيْ غَلُّورٜ ندٜىٰنْ. يࣷعَبْ دُ نَاتِ لٜيْ أُرُسَلِيمَ.
16 ندٜ سِيرِيَنْکࣷوٻٜ نجِعُنࣷو إِسْرَاعِيلَنْکࣷوٻٜ نجَالَکٜ طُمْعٜنْ ڢُ، نٜلَنِ يِمْٻٜ مُٻّٜنْ جࣷوطِيٻٜ ڢࣷنّغࣷ مَايࣷ إٜڢْرَتْ. سࣷڢَکْ وࣷنّࣷو مَوْطࣷ کࣷنُنْکࣷوٻٜ هَدَدْ-إٜجٜرْ ٻٜىٰنْ. 17 دَاوْدَ هَالَنَا طُمْ. کَمْ دُ، هَوْرࣷندِنِ کࣷنُنْکࣷوٻٜ إِسْرَاعِيلَ ڢُو. ٻٜ ݠٜڃِّ أُرْدُنْ، ٻٜ ݠࣷنّدِي سِيرِيَنْکࣷوٻٜ ٻٜىٰنْ ڢَا ٻٜ کَٻْدَ إٜ مُٻّٜنْ. دَاوْدَ سٜغِلَنِي وࣷلْدٜ ندٜىٰنْ. کَمْٻٜ دُ ٻٜ کَوْرِ إٜ مُٻّٜنْ. 18 سِيرِيَنْکࣷوٻٜ ندࣷغِّ يٜىٰسࣷ إِسْرَاعِيلَنْکࣷوٻٜ. دَاوْدَ هَلْکِ تࣷرْکࣷوجِ 7٬000 إٜ دࣷرْبࣷتࣷوٻٜ مُٻّٜنْ إٜ سࣷرْدَاسِيٻٜ يَهࣷوٻٜ إٜ کࣷيْطٜ 40٬000. أࣷ وَرِ سࣷڢَکْ، مَوْطࣷ کࣷنُنْکࣷوٻٜ ٻٜىٰنْ. 19 ندٜ يِمْٻٜ هَدَدْ-إٜجٜرْ ݠَامُنࣷو إِسْرَاعِيلَنْکࣷوٻٜ نجَالَکٜ طُمْعٜنْ ڢُ، مبٜلْتِرِ إٜ دَاوْدَ دٜ دَاوْدَ دَوْرَنِ ٻٜ. شَغَّلْ طُومْ، سِيرِيَنْکࣷوٻٜ نجَٻَايْ وَلِّتِندٜ أَمࣷنِنْکࣷوٻٜ کَتِنْ.