— مِينْ مِطࣷ جࣷوطِي لٜيْ سُودُ نيِٻِرَاندُ لٜطّٜ سٜدّٜرٜ أَمَّا کٜىٰسُوَلْ أَمَانَ جࣷومِرَاطࣷ کَا نَ وࣷنِ لٜيْ هُکُمْ غَطِرَاطࣷ غُدٜ.

2 نَتَنْ جَابِي أࣷ وِعِ:

— وَطُ کࣷ ٻٜرْندٜ مَاطَ وِعِ مَ ڢُو سَبࣷ لَامْطࣷ نَ وࣷندِ إٜ مَاطَ.

3 لٜيْ جٜمَّ أࣷونْ کࣷنّغࣷلْ لَامْطࣷ وَرِ إٜ نَتَنْ دٜ وِعِ طُمْ:

— 4 نجَهَ تࣷ مَشُّطࣷ أَمْ دَاوْدَ مبِعَا طُمْ إِنَنْ کࣷ جࣷومِرَاطࣷ وِعِ: «وَنَا عَانْ نيِٻَنْتَ کَمْ سُودُ طࣷ نجࣷوطࣷتࣷومِ. 5 سَبࣷ مِ جࣷوطَاکِ لٜيْ سُودُ غِلَّ نيَنّدٜ مبُرْتِنّࣷومِ إِسْرَاعِيلَ لٜيْدِ مِسِرَ ڢَا وَرْدٜ هَنّدٜنْ، أَمَّا وࣷ لٜيْ هُکُمْ نجࣷوطِيمِ تࣷ إٜغّࣷتࣷنْ إٜ تࣷ کࣷطࣷتࣷنْ ڢُو. 6 نࣷکُّوجٜ طٜ نجَادُمِ إٜ يِمْٻٜ إِسْرَاعِيلَ ڢُو، يَلَّ مِ ڃَمِ أَرْدِيٻٜ، سَرࣷتࣷوٻٜ ٻٜ نغَطُمِ لَاتࣷو دُرࣷوٻٜ أࣷنْ ٻٜىٰنْ مبِيمِ طُمْعٜنْ: ‹کࣷ سَابِي دٜ أࣷنْ نيِٻِرَنَايْ کَمْ سُودُ إٜ لٜطّٜ سٜدّٜرٜ نَا؟› »

7 ندٜلّٜ کَالْدَا إٜ دَاوْدَ مَشُّطࣷ أَمْ أࣷونْ مبِعَا طُمْ: «إِنَنْ کࣷ جࣷومِرَاطࣷ جࣷمْ بَاوْطٜ وِعِ: وࣷ مِينْ وَرِ هࣷوڃِ مَ لٜيْ دُرْدُدٜ، أَطَ وࣷنّࣷو غَطَ شࣷغَّلْ بَالِ، ڢَا مِ وَطٜ أَرْدِيطࣷ يِمْٻٜ أَمْ إِسْرَاعِيلَنْکࣷوٻٜ. 8 تࣷ نجَاطَا ڢُو، مِ وࣷندِي إٜ مَاطَ، مِ رِيوِي وَيْٻٜ يٜىٰسࣷ مَاطَ. مِ مَوْنِنَنْ إِنّدٜ مَاطَ هࣷنࣷ نࣷ يِمْٻٜ إِنّدٜ أَنّدٜىٰٻٜ مَوْٻٜ أَنّدَاٻٜ لٜيْ أَدُنَارُ نࣷونْ. 9 مِ هࣷکَّنْ إِسْرَاعِيلَ، لٜنيࣷلْ أَمْ نغࣷولْ نࣷکُّورٜ. مِ جࣷڃِّنَنْ ٻٜ، ٻٜ کٜدّࣷو تࣷونْ ڢَا لَاتࣷو جࣷونّدٜ مَٻّٜ، ڢَاعٜ دِمّبَتَا ٻٜ، بࣷنْٻٜ دُ کَلْکَتَا ٻٜ هࣷنࣷ أَرَنٜ نࣷونْ کَتِنْ. 10 غِلَّ نيَنّدٜ نجࣷڃِّنّࣷومِ أَرْدِيٻٜ إِسْرَاعِيلَنْکࣷوٻٜ، يِمْٻٜ أَمْ ٻٜىٰنْ ندٜىٰنْ، شٜمْتِنْمِ وَيْٻٜ مَ ڢُو. وࣷوطِ دُ، وࣷ ندٜىٰنْ کࣷلُّمِ مَ وࣷ مِينْ جࣷومِرَاطࣷ تَبِنْتِنْتَ سُودُ مَاطَ. 11 ندٜ نيَلَاطٜ مَاطَ کِٻّࣷوِ دٜ کَوْرِتࣷيْطَا إٜ مَامِرَاٻٜ مَاطَ ندٜىٰنْ، مِ وَطَنْ غࣷوتࣷ إٜ ٻِٻّٜ مَاطَ، ڃُورُطࣷ إٜ مَاطَ لࣷومْتٜ دٜ مِ تَبِنْتِنَ لَامُ مُوطُمْ. 12 وࣷ أࣷونْ نيِٻَنْتَ کَمْ سُودُ دٜ مِينْ دُ مِ تَبِنْتِنَ لَامُ مُوطُمْ ڢَا أَبَدَ. 13 مِ لَاتَنْتࣷ أࣷ بَابِيوࣷ، کَنْکࣷ دُ، أࣷ لَاتَنࣷو کَمْ ٻِطّࣷ غࣷرْکࣷ. مِ إِتَّتَا هِنّٜيْ أَمْ دࣷوْ مَکّࣷ هࣷنࣷ نࣷ إِتِّرْنࣷومِ طُمْ دࣷوْ مࣷ لࣷومْتُطَا أࣷونْ نࣷونْ. 14 مِ وَطَنْ لَامُ مَکّࣷ تَبِتَ لٜيْ سُودُ أَمْ إٜ لٜيْ لَامُ أَمْ. لَامُ مَکّࣷ تَبِتَنْ ڢَا أَبَدَ.»

15 نَتَنْ هَالَنِ دَاوْدَ هَالَ کَانْ إٜ کࣷ جࣷومِرَاطࣷ هࣷلِّ طُمْ ڢُو.

16 کَانَنْکٜ دَاوْدَ يٜهِ جࣷوطࣷوِي يٜىٰسࣷ جࣷومِرَاطࣷ دٜ وِعِ:

— يَا لَامْطࣷ، جࣷومَمْ، مِينْ وࣷ مِ مࣷيْ؟ سُودُ أَمْ وࣷ طُمٜ دٜ کٜٻُمِ نجࣷتِّنْطَا کَمْ ڢَا طࣷو؟ 17 أَمَّا طُمْ ڢُو وࣷ سٜىٰطَ إٜ غِتٜ مَاطَ، يَا لَامْطࣷ! أَ هَالِي دࣷوْ کࣷ نغَطَنࣷيْتَا سُودُ أَمْ لٜيْ کࣷ وَرࣷيْتَ. أَ ندَارْدِي کَمْ هࣷنࣷ نٜطّࣷ تٜدُّطࣷ، لَامْطࣷ جࣷومِرَاطࣷ. 18 طُمٜ مبَاوُمِ وِعُدٜ مَ کَتِنْ دࣷوْ تٜدّٜىٰنغَلْ نغَلْ کࣷکُّطَا کَمْ نغَالْ؟ أَطَ أَنّدِ مَشُّطࣷ مَاطَ. 19 يَا جࣷومِرَاطࣷ، وࣷ سَابٜ أَمْ، مِينْ مَشُّطࣷ مَاطَ، إٜ ڢࣷدّٜ مُويْطٜ مَاطَ دٜ نغَطُطَا کُجّٜ مَوْطٜ طٜىٰ ڢَا کࣷلَّ مَنّغُ مَاطَ. 20 جࣷومِرَاطࣷ، هࣷنࣷ مَاطَ وَلَا، وࣷوطِ دُ ڢࣷدّٜ کࣷ نࣷݠِّ أَمِنْ نَنِ طُومْ، لَامْطࣷ غࣷطّࣷ وَلَا سِ وَنَا عَانْ. 21 يَلَّ نَ وࣷودِ لٜنيࣷلْ لٜيْ أَدُنَارُ هࣷنࣷ نغࣷلْ إِسْرَاعِيلَ، يِمْٻٜ مَ ٻٜىٰنْ، نغࣷلْ أَلَّ غࣷمَّ يٜهِ رِمْطِنࣷوِ ڢَا وَطَ طُمْعٜنْ يِمْٻٜ مُوطُمْ نَا؟ أَ مَوْنِنِرِي إِنّدٜ مَاطَ إٜ وَطُغࣷلْ کُجّٜ مَوْطٜ کَايْنِيطٜ. أَ رِيوِي لٜنيِ يٜىٰسࣷ لٜنيࣷلْ مَاطَ نغࣷلْ مبُرْتِنْطَا لٜيْدِ مِسِرَ نغࣷولْ. 22 أَ سُٻَکٜ إِسْرَاعِيلَنْکࣷوٻٜ لَاتࣷو لٜنيࣷلْ مَاطَ ڢَا أَبَدَ. وࣷوطِ دُ، عَانْ، جࣷومِرَاطࣷ، أَ لَاتَکٜ لَامْطࣷ مَٻّٜ. 23 جࣷونِنْ کَا، جࣷومِرَاطࣷ، تَبِنْتِنْ کࣷنّغࣷلْ نغࣷلْ کࣷکُّطَا دࣷوْ أَمْ، مِينْ مَشُّطࣷ مَاطَ إٜ دࣷوْ سُودُ أَمْ نغࣷولْ. وَطُ کࣷ مبِيطَا طُومْ لَاتࣷو. 24 وَطُ کࣷنّغࣷلْ نغࣷولْ تَبِتَ ڢَا إِنّدٜ مَاطَ هٜٻَ تٜدّٜىٰنغَلْ ڢَا أَبَدَ وࣷوطِ دُ نَنٜىٰ کࣷ جࣷومِرَاطࣷ جࣷمْ بَاوْطٜ، وࣷ کَمْ وࣷنِ لَامْطࣷ إِسْرَاعِيلَ. وَطُ ڃُوْدِ مَشُّطࣷ مَاطَ دَاوْدَ تَبِتَ يٜىٰسࣷ مَاطَ ڢَا أَبَدَ. 25 سَبࣷ وࣷ عَانْ، لَامْطࣷ أَمْ، وِعِ کَمْ أَ تَبِنْتِنَنْ سُودُ أَمْ. وࣷ سَابٜ طُومْ دٜ کٜٻُمِ شُوسَلْ وَرُدٜ وَطَ دُعَارٜ يٜىٰسࣷ مَاطَ. 26 جࣷونِنْ، جࣷومِرَاطࣷ، وࣷ عَانْ وࣷنِ لَامْطࣷ وࣷوطِ دُ وࣷ عَانْ هࣷلِّ کَمْ مِينْ مَشُّطࣷ مَاطَ مࣷڃّٜرٜ ندٜىٰ. 27 أَ جَٻِي بَرْکِندٜ سُودُ أَمْ ڢَا ندُ تَبِتَ يٜىٰسࣷ مَاطَ ڢَا أَبَدَ. سَبࣷ وࣷ عَانْ جࣷومِرَاطࣷ بَرْکِنِ، وࣷوطِ دُ، کࣷ بَرْکِنْطَا ڢُو هٜدّࣷتࣷ وࣷ کࣷ بَرْکِنَا ڢَا أَبَدَ.