16
1 ٻٜ نَنِّ کٜىٰسُوَلْ لَامْطࣷ نغَالْ، ٻٜ نجࣷڃِّنِ نغَلْ لٜيْ هُکُمْ مࣷ دَاوْدَ دَرْنَنِ نغَلْ أࣷونْ. ٻٜ نغَطِ سَدَکَاجِ بُلٜتٜىٰطِ إٜ سَدَکَاجِ دٜوْرَلْ يٜىٰسࣷ لَامْطࣷ. 2 ندٜ دَاوْدَ تِمِّنّࣷو وَطُدٜ سَدَکَاجِ بُلٜتٜىٰطِ إٜ سَدَکَاجِ دٜوْرَلْ ندٜىٰنْ، بَرْکِنِ جَمَارٜ ندٜىٰنْ إٜ إِنّدٜ جࣷومِرَاطࣷ. 3 ندٜىٰنْ أࣷ يٜطࣷندِرِ يِمْٻٜ تَوَاٻٜ وࣷرْٻٜ إٜ رٜوْٻٜ مࣷنࣷ ڢُو بُورُورٜ مُٻّٜرٜ إٜ بُورُورٜ وَطِرَاندٜ تَمࣷرࣷوجٜ إٜ وَطِرَاندٜ إِنَبࣷوجٜ. نࣷ لٜوِنْکࣷوٻٜ نجِمِرِ نجٜتِّ جࣷومِرَاطࣷ
4 دَاوْدَ وَطِ لٜوِنْکࣷوٻٜ وࣷٻّٜ نَ ندَرࣷو يٜىٰسࣷ کٜىٰسُوَلْ جࣷومِرَاطࣷ ڢَا نغࣷلَّنَ طُمْ. ٻٜىٰنْ أَرْدࣷتࣷو دُعَارٜ، نَ نجِمَ نَ نجٜتَّ نَ تٜدِّنَ جࣷومِرَاطࣷ، لَامْطࣷ إِسْرَاعِيلَ. 5 أَسَڢْ، أَرْدࣷتࣷنࣷو يِمࣷوٻٜ ٻٜىٰنْ. جَکَرِيَ رٜوْتِ طُمْ، تَوْتِ يٜعِيٜلْ إٜ سٜمِرَمࣷتْ إٜ يٜهِيٜلْ إٜ مَتِّتِيَ إٜ إٜلِيَبَ إٜ بٜنَيَ إٜ أࣷبٜدْ-إٜدࣷمْ. يٜعِيٜلْ نَ هࣷطَنّࣷو کࣷلِّ إٜ غٜىٰغِنٜىٰجِ. أَسَڢْ دُ نَ غࣷکّࣷندِرَ بٜطِ نجَمْندِ. 6 أَلْمَامِعٜنْ بٜنَيَ إٜ يَهَجِيٜلْ نَ ݠُوڢَنّࣷو لُوٜ يٜىٰسࣷ کٜىٰسُوَلْ أَمَانَ لَامْطࣷ وَکَّتِ ڢُو. 7 نيَلَاندٜ ندٜىٰنْ وࣷنِ ݠُطَّمْ دَاوْدَ هࣷکُّدٜ أَسَڢْ إٜ سَکِرَاٻٜ مُوطُمْ غࣷلّٜ يٜتُّدٜ جࣷومِرَاطࣷ.
جِمࣷلْ دَاوْدَ جٜتّࣷووࣷلْ لَامْطࣷ
(جَبُورَ 105:1-15)
8 نجٜتّٜىٰ جࣷومِرَاطࣷ، کࣷلّٜىٰ مَنّغُ إِنّدٜ مُوطُمْ؛
أَنّدِنٜىٰ لٜنيِ غࣷطِّ غࣷلّٜ مَوْطٜ طٜ أࣷ وَطِ.
9 نجِمَنٜىٰ أࣷ، ݠِيَنٜىٰ أࣷ مُنْکَرُوجِ!
مِشِّتٜىٰ کُجّٜ کَايْنِيطٜ طٜ أࣷ وَطِ طٜىٰنْ ڢُو!
10 مَنْتࣷرٜىٰ إِنّدٜ مَکّࣷ سٜنِيندٜ ندٜىٰنْ،
ڢِلࣷتࣷوٻٜ جࣷومِرَاطࣷ ڢُو مبٜلْنَ ٻٜرْطٜ مُٻّٜنْ.
11 ݠِلٜىٰ جࣷومِرَاطࣷ إٜ سٜمّبٜ مُوطُمْ،
تٜوْتٜىٰ وࣷندُدٜ إٜ مَکّࣷ وَکَّتِ ڢُو.
12 مِشِّتٜىٰ کُجّٜ کَايْنِيطٜ طٜ أࣷ وَطِ،
تَيْکٜىٰ مَاندٜىٰجِ إٜ سَرِيَاجِ مَکّࣷ،
13 أࣷنࣷنْ لٜنيࣷلْ إِسْرَاعِيلَ، مَشُّطࣷ مَکّࣷ،
أࣷنࣷنْ ٻِٻّٜ يَعْقُوبَ، سُٻَاٻٜ مَکّࣷ.
14 وࣷ کَنْکࣷ وࣷنِ جࣷومِرَاطࣷ، لَامْطࣷ مٜىٰطٜنْ،
وࣷ کَنْکࣷ هِيتࣷتࣷو أَدُنَارُ ڢُو.
15 مِشِّتࣷطࣷنْ أَمَانَ مَکّࣷ أࣷونْ ڢَا أَبَدَ،
نجࣷغِتࣷطࣷنْ عَادِ مَکّࣷ ڢَا جَمَانُوجِ أُجُنٜرٜ.
16 تَا نجٜغِّتٜىٰ أَمَانَ مࣷ أࣷ هَٻِّدِ إٜ إِبْرَاهِيمَ،
تَا نجٜىٰبٜىٰ هُنَيٜىٰرٜ ندٜ أࣷ هُنَنِي إِسْحَاقَ.
17 أَمَانَ أࣷونْ لَاتَنَکٜ يَعْقُوبَ سَرِيَ،
أࣷ لَاتَنَکٜ إِسْرَاعِيلَ عَادِ تَبِتࣷورِ ڢَا أَبَدَ.
18 إِمࣷ وِعَ: مِ هࣷکّٜتٜ لٜيْدِ کَنَانَ،
ندِ لَاتࣷو ندࣷنغُ مࣷوطࣷنْ.
19 لِمࣷورٜ مࣷوطࣷنْ نَ ڢَمْطُنࣷو،
أࣷطࣷنْ لَاتِنࣷو نجَنَنࣷيْ، کࣷطُکࣷيْ لٜيْ لٜيْدِ ندِينْ تَنْ.
20 إِٻٜ نجِيلࣷنࣷو هَکُّندٜ لٜيْطٜ،
إِٻٜ نجَهَنّࣷو هَکُّندٜ لَامُوجِ إٜ لٜنيِ.
21 أَمَّا لَامْطࣷ أَشَّايْ ڢَيْ غࣷوتࣷ تࣷرَّ ٻٜ؛
أࣷ جُکَّکٜ کَانَنْکࣷوٻٜ سَابٜ مَٻّٜ.
22 أࣷ وِعِ: «تَا مٜىٰمٜىٰ سُٻَاٻٜ أَمْ،
تَا تࣷرّٜىٰ أَنَّبَاٻٜ أَمْ ٻٜىٰنْ.»
(جَبُورَ 96)
23 أࣷنࣷنْ يِمْٻٜ أَدُنَارُ ڢُو، نجِمٜىٰ نجٜتّࣷنْ جࣷومِرَاطࣷ.
کَالٜىٰ کَبَارُ کِسِندَمْ مَکّࣷ نيَنّدٜ ڢُو.
24 کَالٜىٰ هَالَ تٜدّٜىٰنغَلْ مَکّࣷ هَکُّندٜ لٜنيِ ڢُو،
ݠِلَّنࣷطࣷنْ يِمْٻٜ ڢُو کَبَارُ مَاندٜىٰجِ مَکّࣷ کَايْنِيطِ،
25 سَبࣷ جࣷومِرَاطࣷ وࣷ مَوْطࣷ سَنّٜ، ݠࣷتُطࣷ تٜدِّنٜىٰدٜ،
وࣷ أࣷ کُلْٻِنِيطࣷ ٻُرِ أَلَّاجِ کٜدِّيطِ ڢُو.
26 نغَمْ أَلَّاجِ لٜنيِ کٜدِّيطِ طِينْ ڢُو وࣷ ڢٜوْرٜىٰجِ،
أَمَّا وࣷ جࣷومِرَاطࣷ تَغِ کَمُّ.
27 وࣷ کَنْکࣷ جٜيِ مَنّغُ إٜ تٜدّٜىٰنغَلْ،
سٜمّبٜ إٜ سٜيࣷ ڢُو وࣷ تࣷ مَکّࣷ تَوٜتٜىٰ.
28 أࣷنࣷنْ لٜنيِ لٜيْطٜ ڢُو، نجٜتّٜىٰ جࣷومِرَاطࣷ،
مَنٜىٰ تٜدّٜىٰنغَلْ مَکّࣷ إٜ بَاوْطٜ مَکّࣷ!
29 تٜدِّنٜىٰ إِنّدٜ جࣷومِرَاطࣷ،
نغَرْدٜىٰ دࣷکّٜ مࣷوطࣷنْ يٜىٰسࣷ مَکّࣷ،
ندِکِّنࣷطࣷنْ يٜىٰسࣷ مَکّࣷ لٜيْ نࣷکُّورٜ مَکّࣷ سٜنِيندٜ ندٜىٰنْ.
30 أࣷنࣷنْ يِمْٻٜ أَدُنَارُ ڢُو، ندِوْنٜىٰ يٜىٰسࣷ مَکّࣷ.
أࣷ تَبِنْتِنِرِي أَدُنَارُ إٜ بَاوْطٜ مَکّࣷ، ندُ دِمّبَتَاکࣷ.
31 ندٜلّٜ کࣷ وࣷنِ دࣷوْ کَمُّ ڢُو سٜيࣷو،
کࣷ وࣷنِ إٜ لٜيْدِ دُ، وࣷندَ إٜ وٜلْوٜلࣷ،
لٜنيِ أَدُنَارُ ڢُو تَنّيࣷرَا جࣷومِرَاطࣷ وࣷنِ لَامِيطࣷ!
32 مَايࣷ إِيدِدَ إٜ کࣷ وࣷنِ إٜ مُوطُمْ ڢُو،
لَدّٜ دُ إٜ کࣷ وࣷنِ إٜ مُوطُمْ ڢُو مبٜلْوٜلْتَ!
33 لٜطّٜ شُکُّرِ کࣷلَّ سٜيࣷ مُٻّٜنْ يٜىٰسࣷ جࣷومِرَاطࣷ،
سَبࣷ إِمࣷ وَرَ ڢَا أࣷ هِيتࣷو دُونِيَارُ.
(جَبُورَ 106:1، 47-48)
34 نجٜتّٜىٰ جࣷومِرَاطࣷ، سَبࣷ وࣷ مࣷڃُّطࣷ،
هِنّٜيْ مَکّࣷ تِمَّتَا ڢَا أَبَدَ!
35 مبِعٜىٰ: هِسِنْ مِنْ، عَانْ لَامْطࣷ کِسِنࣷووࣷ أَمِنْ،
هَوْرࣷندِنْ مِنْ دٜ ندَنَّا مِنْ إٜ جُوطٜ لٜنيِ غࣷطِّ
ڢَا مِنْ نجٜتَّ إِنّدٜ مَاطَ سٜنِيندٜ ندٜىٰنْ،
دٜ يٜتُّدٜ مَ لَاتࣷو تٜدّٜىٰنغَلْ أَمِنْ.
36 بَرْکٜ وࣷودَنَ جࣷومِرَاطࣷ، لَامْطࣷ إِسْرَاعِيلَ ڢَا أَبَدَ أَبَدِنْ.
ندٜىٰنْ يِمْٻٜ ڢُو نجَابِي مبِعِ: «عَامِينَ». ٻٜ تٜدِّنِ جࣷومِرَاطࣷ.
37 دَاوْدَ دَرْنِ أَسَڢْ إٜ سَکِرَاٻٜ مُوطُمْ يٜىٰسࣷ کٜىٰسُوَلْ أَمَانَ جࣷومِرَاطࣷ نغَالْ ڢَا کٜدّࣷو نَ نغࣷلَّنَ لَامْطࣷ وَکَّتِ ڢُو ڢࣷدّٜ نࣷ يَمِرَا نيَنّدٜ ڢُو نࣷونْ. 38 دࣷومࣷوٻٜ دَمّبُطٜ دُ، وࣷ أࣷبٜدْ-إٜدࣷمْ، ٻِي يٜدُتُنْ إٜ هࣷسَ إٜ سَکِرَاٻٜ مُوطُمْ 68. 39 دَاوْدَ يࣷݠِّ أَلْمَامِ سَدࣷکْ إٜ أَلْمَامِعٜنْ وࣷٻّٜ سَکِرَاٻٜ مُوطُمْ يٜىٰسࣷ جࣷومِرَاطࣷ لٜيْ نࣷکُّورٜ سَکِّرْدٜ وࣷنّدٜ وُرࣷ غِبِيࣷنْ 40 ڢَا شَکَّنَ جࣷومِرَاطࣷ سَدَکَاجِ بُلٜتٜىٰطِ سُبَکَ إٜ ڢُتُرࣷ ڢُو دࣷوْ سَکِّرْدٜ سَدَکَاجِ بُلٜتٜىٰطِ. ٻٜ نغَطَ دُ هُوندٜ ڢُو کࣷ وِنّدَا لٜيْ تَوْرٜىٰتَ مࣷ جࣷومِرَاطࣷ هࣷکِّ إِسْرَاعِيلَ أࣷونْ. 41 تَوْتِ هٜمَنْ إٜ يٜدُتُنْ إٜ هٜدِّيٻٜ سُٻَنࣷوٻٜ دٜ إِنْطٜ مُٻّٜنْ مبِنّدَا ڢَا کٜىٰدَ إٜ يٜتُّدٜ جࣷومِرَاطࣷ، سَبࣷ هِنّٜيْ مُوطُمْ تِمَّتَا ڢَا أَبَدَ. 42 هٜمَنْ إٜ يٜدُتُنْ نَ ݠُوڢَنّࣷو لُوٜ، نَ نغࣷکّࣷندِرَ بٜطِ نجَمْندِ ڢَا طࣷوْتَ يِمَنࣷوٻٜ لَامْطࣷ ٻٜىٰنْ. ٻِٻّٜ يٜدُتُنْ نَ ندࣷومَنّࣷو دَمّبُغَلْ.
43 يِمْٻٜ ڢُو کࣷوتِ غَلّٜ مُٻّٜنْ. دَاوْدَ دُ هࣷوتِ ڢَا بَرْکِنࣷوَ سُودُ مُوطُمْ.