إِيدِ يَارُغࣷلْ کٜىٰسُوَلْ أَمَانَ لٜيْ أُرُسَلِيمَ
15
1 دَاوْدَ نيِٻَنِ هࣷورٜمْ شُوطِ لٜيْ غَلُّورٜ دَاوْدَ. أࣷ مࣷڃِّنَنِ کٜىٰسُوَلْ لَامْطࣷ نࣷکُّورٜ دٜ أࣷ وَطَنِ طُمْ هُکُمْ. 2 ندٜىٰنْ أࣷ وِعِ: — وࣷ لٜوِنْکࣷوٻٜ تَنْ نجٜيِ رࣷنّدَادٜ کٜىٰسُوَلْ جࣷومِرَاطࣷ سَبࣷ وࣷ کَمْعٜنْ جࣷومِرَاطࣷ هَلْڢِنّࣷو رࣷنّدَادٜ نغَلْ إٜ غࣷلَّندٜ طُمْ ڢَا أَبَدَ.
3 دَاوْدَ هَوْرࣷندِنِ جَمَارٜ إِسْرَاعِيلَ ڢُو لٜيْ أُرُسَلِيمَ ڢَا جࣷڃِّنَ کٜىٰسُوَلْ جࣷومِرَاطࣷ لٜيْ نࣷکُّورٜ ندٜ مࣷڃِّنَنِ طُمْ ندٜىٰنْ. 4 أࣷ هَوْرࣷندِنِ ٻِٻّٜ هَـٰرُونَ إٜ لٜوِنْکࣷوٻٜ.
5 ٻِٻّٜ کٜهَتْ: أُرِيٜلْ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 120.
6 ٻِٻّٜ مٜرَرِ: أَسَيَ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 220.
7 ٻِٻّٜ غٜرْسࣷمْ: جࣷوِيلَ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 130.
8 ٻِٻّٜ إٜلِسَڢَنْ: سٜمَيَ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 200.
9 ٻِٻّٜ هٜبٜرࣷنْ: إٜلِيٜلْ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 80.
10 ٻِٻّٜ أُجِّيٜلْ: أَمِنَدَابُ وࣷنِ أَرْدِيطࣷ مُٻّٜنْ تَوْتِ سَکِرَاٻٜ مُوطُمْ 112.
11 دَاوْدَ نࣷدِّ أَلْمَامِعٜنْ سَدࣷکْ إٜ أَبِيَتَرْ إٜ لٜوِنْکࣷوٻٜ أُرِيٜلْ إٜ أَسَيَ إٜ جࣷوِيلَ إٜ سٜمَيَ إٜ إٜلِيٜلْ إٜ أَمِنَدَابُ. 12 أࣷ وِعِ ٻٜ:
— وࣷ أࣷنْ مَوْٻٜ شُوطِ لٜوِنْکࣷوٻٜ. شٜنِنٜىٰ کࣷعٜ مࣷوطࣷنْ أࣷنࣷنْ إٜ سَکِرَاٻٜ مࣷنْ ڢُو دٜ ٻَنْتࣷنْ کٜىٰسُوَلْ جࣷومِرَاطࣷ، لَامْطࣷ إِسْرَاعِيلَ نغَالْ، نجَارࣷنْ نغَلْ لٜيْ نࣷکُّورٜ ندٜ مࣷڃِّنَنْمِ نغَلْ ندٜىٰنْ. 13 أَرَنٜ أࣷنْ تَوَاکَنࣷ ندٜ جࣷومِرَاطࣷ، لَامْطࣷ مٜىٰطٜنْ ڢِيرُنࣷو مِنْ جُکُّنغࣷ سَبࣷ مِنْ ڃَمَيْنࣷ مُويْطٜ مُوطُمْ ڢࣷدّٜ نࣷ يَمِرْنࣷو نࣷونْ.
14 ندٜىٰنْ أَلْمَامِعٜنْ إٜ لٜوِنْکࣷوٻٜ شٜنِنِ کࣷعٜ مُٻّٜنْ ڢَا نجَارَ کٜىٰسُوَلْ جࣷومِرَاطࣷ، لَامْطࣷ إِسْرَاعِيلَ نغَالْ. 15 لٜوِنْکࣷوٻٜ مبَکّࣷرِي کٜىٰسُوَلْ لَامْطࣷ نغَالْ دࣷوْ بَلَاجٜ مُٻّٜنْ إٜ شَبِّ ڢࣷدّٜ نࣷ جࣷومِرَاطࣷ يَمِرْنࣷو إٜ هُنّدُکࣷ مُوسَى نࣷونْ.
16 دَاوْدَ يَمِرِ مَوْٻٜ لٜوِنْکࣷوٻٜ نغَطَ سَکِرَاٻٜ مُٻّٜنْ يِمࣷوٻٜ نغَرْدَ إٜ مُنْکَرِيجِ مُٻّٜنْ، طُمْ وࣷنِ کࣷلِّ إٜ غٜىٰغِنٜىٰجِ إٜ بٜطِ جَمْطٜ غࣷکّࣷندِرْتٜىٰطِ. ٻٜ ݠٜىٰکࣷو ٻٜ نجِمَ ٻٜ کࣷلَّ سٜيࣷ مَٻّٜ. 17 لٜوِنْکࣷوٻٜ شُٻِي هٜمَنْ ٻِي جࣷوِيلَ إٜ سَکِرَاٻٜ مُوطُمْ: أَسَڢْ ٻِي بٜرٜکِيَ إٜ إٜتَنْ ٻِي کُسَيَ مࣷ سُودُ مٜرَرِ. 18 سَکِرَاٻٜ مَٻّٜ رٜوْتُٻٜ ڢَا مبَلِّتَ ٻٜ وࣷ: جَکَرِيَ إٜ بٜنْ إٜ يَهَجِيٜلْ إٜ سٜمِرَمࣷتْ إٜ يٜهِيٜلْ إٜ أُنِّ إٜ إٜلِيَبَ إٜ بٜنَيَ إٜ مَاسٜيَ إٜ مَتِّتِيَ إٜ إٜلِڢْلٜهُ إٜ مِکْنٜيَ إٜ أࣷبٜدْ-إٜدࣷمْ إٜ يٜعِيٜلْ دࣷومࣷوٻٜ دَمّبُطٜ. 19 هَکُّندٜ يِمࣷوٻٜ ٻٜىٰنْ وࣷ هٜمَنْ إٜ أَسَڢْ إٜ إٜتَنْ تِيغِنࣷو بٜطِ نجَمْندِ مبࣷطٜىٰرِ نَ کٜلّࣷندِرَ. 20 جَکَرِيَ إٜ أَجِيٜلْ إٜ سٜمِرَمࣷتْ إٜ يٜهِيٜلْ إٜ أُنِّ إٜ إٜلِيَبَ إٜ مَاسٜيَ إٜ بٜنَيَ نَ تِيغِنࣷو کࣷلِّ طِ دَاطٜ «أَلَمࣷتْ*». 21 مَتِّتِيَ إٜ إٜلِڢْلٜهُ إٜ مِکْنٜيَ إٜ أࣷبٜدْ-إٜدࣷمْ إٜ يٜعِيٜلْ إٜ أَجَجِيَ نَ تِيغِنࣷو کࣷلِّ طِ ٻࣷغِّ جٜىٰتَتِ ڢَا أَرْدࣷو جِمِ طِينْ. 22 کٜنَنِيَ، مَوْطࣷ لٜوِنْکࣷوٻٜ رࣷنّدࣷتࣷوٻٜ کٜىٰسُوَلْ شٜنِينغَلْ أࣷونْ ندَارَنَنّࣷو دࣷنّغَلْ نغَالْ سَبࣷ إِمࣷ وࣷودُنࣷو بَاوْطٜ مَجُّمْ. 23 بٜرٜکِيَ إٜ إٜلْکَنَ ندࣷومَنّࣷو کٜىٰسُوَلْ نغَالْ. 24 أَلْمَامِعٜنْ سٜبَنِيَ إٜ يࣷوسَڢَتْ إٜ نٜتَنٜلْ إٜ أَمَسِيَ إٜ جَکَرِيَ إٜ بٜنَيَ إٜ إٜلِيٜجٜرْ ݠُوڢَنّࣷو لُوٜ يٜىٰسࣷ کٜىٰسُوَلْ لَامْطࣷ نغَالْ. أࣷبٜدْ-إٜدࣷمْ إٜ يٜهِيَ ندࣷومَنّࣷو کٜىٰسُوَلْ نغَالْ.
(2 سَمُوِيلَ 6:12-23)
25 ندٜىٰنْ دَاوْدَ إٜ مَوْٻٜ إِسْرَاعِيلَ إٜ أَرْدِيٻٜ غٜٻٜ کࣷنُنْکࣷوٻٜ مَوْطٜ ڢُو کَوْرِتِ ندِلِّرِ سُودُ أࣷبٜدْ-إٜدࣷمْ ڢَا کࣷوڃࣷوَ کٜىٰسُوَلْ أَمَانَ جࣷومِرَاطࣷ نغَالْ لٜيْ سٜيࣷ. 26 وࣷ إٜ مبَلَّ جࣷومِرَاطࣷ لٜوِنْکࣷوٻٜ مبَاوِرِ ندࣷنّدِي کٜىٰسُوَلْ نغَالْ. سَابٜ طُومْ دٜ ٻٜ شَکِّ غَعِ جٜطِّ إٜ جَوْطِ جٜطِّ. 27 دَاوْدَ إٜ لٜوِنْکࣷوٻٜ رࣷنّدِنࣷوٻٜ کٜىٰسُوَلْ إٜ يِمࣷوٻٜ إٜ کٜنَنِيَ مَوْطࣷ رࣷنّدࣷتࣷوٻٜ هٜدِّيٻٜ ڢُو إِٻٜ ٻࣷرْنِنࣷو سَايࣷوجِ لٜݠِّ طَاتُطِ. دَاوْدَ نَ وَکِّنࣷو دُ لٜڢࣷلْ أَلْمَامِعٜنْ طَاتُنغࣷلْ. 28 يِمْٻٜ إِسْرَاعِيلَ ڢُو کَوْرِتِ نجَارِ کٜىٰسُوَلْ أَمَانَ جࣷومِرَاطࣷ نغَالْ أُرُسَلِيمَ. إِٻٜ ݠٜىٰکࣷو إِٻٜ نجِمَ، إِٻٜ ݠُوڢَ لُوٜ، إِٻٜ کࣷطَ کࣷلِّ، إِٻٜ کٜلّࣷندِرَ بٜطِ نجَمْندِ.
29 ندٜ کٜىٰسُوَلْ جࣷومِرَاطࣷ نغَالْ نَاتَنّࣷو لٜيْ غَلُّورٜ دَاوْدَ ندٜىٰنْ، مِکَلْ، ٻِي سَوُلُ دٜبّࣷ نَ يُورْنࣷرࣷو ڢٜنٜىٰتٜرٜ. أࣷ يِعِ کَانَنْکٜ دَاوْدَ نَ ڢِتَّ نَ وَمَ دٜ أࣷ هُيْڢِنِ طُمْ لٜيْ ٻٜرْندٜ مَکّࣷ.