— سِ أࣷنْ نجَرْدَکٜ، وࣷوطِ دُ، سِ وࣷ طُمْ مُويْطٜ جࣷومِرَاطࣷ، لَامْطࣷ مٜىٰطٜنْ ڢُ، إٜنْ نٜلَنَ سَکِرَاٻٜ مٜىٰطٜنْ هٜدِّيٻٜ لٜيْ لٜيْطٜ إِسْرَاعِيلَ ڢُو، تَوْتِ أَلْمَامِعٜنْ إٜ لٜوِنْکࣷوٻٜ لٜيْ غَلُّوجٜ إٜ دُرْدُطٜ طٜ نجࣷوطِي ڢُو ڢَا نغَرَ کَوْرِتَ إٜ مٜىٰطٜنْ. 3 ندٜىٰنْ نغَرْتِرٜنْ کٜىٰسُوَلْ لَامْطࣷ مٜىٰطٜنْ سَبࣷ إٜنْ نغَطَايْنࣷ أَنِّيَ مَجُّمْ وَکَّتِ لَامُ سَوُلُ.

4 جَمَارٜ ندٜىٰنْ ڢُو جَٻِ کࣷ أࣷ وِعِ طُومْ سَبࣷ نَ طُمْ ڢࣷتَنِ يِمْٻٜ ڢُو. 5 ندٜىٰنْ دَاوْدَ إٜ يِمْٻٜ إِسْرَاعِيلَ ڢُو کَوْرِتِ غِلَّ ݠࣷغࣷوࣷلْ سِعࣷرْ کٜىٰرࣷلْ لٜيْدِ مِسِرَ ڢَا هٜوْتِ لٜبࣷ-هَمَتْ ڢَا نغَدَّ کٜىٰسُوَلْ لَامْطࣷ نغَالْ لٜيْ وُرࣷ کِرِيَتْ-يَرِمْ. 6 دَاوْدَ إٜ يِمْٻٜ إِسْرَاعِيلَ ڢُو نجَادِ بَالَ لٜيْ کِرِيَتْ-يَرِمْ ندٜرْ لٜيْدِ يَهُودَ ڢَا نغَرْتِرَ کٜىٰسُوَلْ لَامْطࣷ، جࣷومِرَاطࣷ جࣷوطِيطࣷ دࣷوْ کٜرُبَعٜنْ طࣷ إِنّدٜ مُوطُمْ نࣷدّٜتٜىٰ طࣷونْ. 7 ٻٜ کࣷوڃِ نغَلْ لٜيْ سُودُ أَبِنَدَبْ، ٻٜ ندٜکِ نغَلْ دࣷوْ تࣷرْکࣷورُ هٜيْرُ. أُجَّ إٜ أَهِيࣷ نغࣷنِ دࣷرْبࣷتࣷوٻٜ تࣷرْکࣷورُ ندُونْ. 8 دَاوْدَ إٜ يِمْٻٜ إِسْرَاعِيلَ ڢُو نَ ݠٜىٰکࣷو نَ نجِمَ، نَ مبَمِرَ إٜ سٜمّبٜ مُٻّٜنْ ڢُو. إِٻٜ ݠِيَ بَوْطِ، إِٻٜ نغࣷکّࣷندِرَ بٜطِ نجَمْندِ، إِٻٜ ݠُوڢَ لُوٜ، إِٻٜ کࣷطَ کࣷلِّ. 9 ندٜ ٻٜ نجࣷتِّنࣷو ڃَرࣷرْدٜ کِدࣷنْ ندٜىٰنْ، نَعِ طِينْ نٜسِ لِٻُدٜ کٜىٰسُوَلْ نغَالْ دٜ أُجَّ ڢࣷورْتِ جُنّغࣷ مُوطُمْ تٜىٰغِي نغَلْ تَا نغَلْ سَامَ. 10 جࣷومِرَاطࣷ تِکَّنِ أُجَّ سَنّٜ دٜ ڢِيرِ طُمْ مَايْدٜ سَابٜ جُنّغࣷ مُوطُمْ مٜىٰمِي کٜىٰسُوَلْ نغَالْ. أࣷ مَايِ طࣷونْ يٜىٰسࣷ جࣷومِرَاطࣷ. 11 ٻٜرْندٜ دَاوْدَ مٜتِّ سَنّٜ سَابٜ نࣷ تِکّٜرٜ جࣷومِرَاطࣷ سَامِرِ دࣷوْ أُجَّ نࣷونْ. نࣷکُّورٜ ندٜىٰنْ إِنّدِرَا ݠٜرٜسْ أُجَّ^*. نࣷونْ ندٜ إِنّدِرْتٜىٰ ڢَا وَرْدٜ هَنّدٜنْ. 12 نيَنّدٜ ندٜىٰنْ دَاوْدَ هُلِ سَنّٜ جࣷومِرَاطࣷ دٜ وِعِ:

— نࣷيْ مبَاوِرْمِ نَنُّدٜ کٜىٰسُوَلْ لَامْطࣷ نغَالْ لٜيْ وُرࣷ أَمْ؟