هَالَ يَادࣷوٻٜ إٜ دَاوْدَ
12
1 إِنَنْ يَهُٻٜ تࣷ دَاوْدَ لٜيْ وُرࣷ سِکْلَغْ، وَکَّتِ تِلْسَنّࣷو طُمْ هٜدَّادٜ تࣷ وࣷطِّ إٜ سَوُلُ، ٻِي کِسْ ندٜىٰنْ. يِمْٻٜ ٻٜىٰنْ وࣷ کࣷنُنْکࣷوٻٜ سٜمّبِطِنْٻٜ وَلِّتࣷوٻٜ مࣷ. 2 إِٻٜ تِيغࣷنࣷو کُرٜ إٜ ݠِوْلِ وࣷوطِ دُ وࣷ ٻٜ وَاوْٻٜ ڢِوْلࣷرَادٜ نَنࣷ إٜ نيَامࣷ ڢُو. نࣷونْ ٻٜ مبَاوِرِ ڢِطِرْغࣷلْ کُرٜ طٜىٰنْ دُ. وࣷ ٻٜ سَکِرَاٻٜ سَوُلُ جٜيَاٻٜ إٜ لٜنيࣷلْ بٜنيَمِنْ. 3 أَهِيٜجٜرْ، مَوْطࣷ مَٻّٜ إٜ جࣷهَسْ ٻِٻّٜ سٜمَ غِبٜيَنْکٜ إٜ يٜجِيٜلْ إٜ ݠٜلٜتْ، ٻِٻّٜ أَسْمَوٜتْ إٜ بٜرَکَ إٜ يٜهُ، أَنَتࣷتِنْکٜ 4 إٜ يِسْمَيَ، غِبِيࣷنِنْکٜ، غࣷوتࣷ هَکُّندٜ ٻُرْٻٜ شُوسَلْ أࣷونْ وࣷنِ أَرْدِيطࣷ مَوْٻٜ کࣷنُنْکࣷوٻٜ 30 ٻٜىٰنْ، 5 إٜ يٜرٜمِيَ إٜ يَهَجِيٜلْ إٜ يࣷهَنَنْ إٜ يࣷجَبَدْ، غٜدٜرَيِنْکٜ 6 إٜ إٜلُجَيْ إٜ يٜرِمࣷتْ إٜ بٜيَلِيَ إٜ سٜمَرِيَ إٜ سٜڢَتِيَ، هَرُڢِيَنْکٜ 7 إٜ إٜلْکَنَ إٜ يِسِيَ إٜ أَجَرٜلْ إٜ يࣷهٜجٜرْ إٜ يَسࣷبٜعَمْ، کࣷورَنْکࣷوٻٜ 8 إٜ يࣷهٜلَ إٜ جٜبَدِيَ ٻِٻّٜ يٜرࣷهَمْ مࣷ غٜدࣷرْ. 9 وࣷرْٻٜ لٜنيࣷلْ غَدْ، کࣷنُنْکࣷوٻٜ سٜمّبِطِنْٻٜ شٜنّدِتِي تَنّيِ دَاوْدَ لٜيْ لَدّٜ يࣷورْندٜ تࣷ سُوطِي تࣷونْ. وࣷ ٻٜ وࣷرْٻٜ وَاوُٻٜ کࣷنُ سَنّٜ. إِٻٜ تِيغِي بَوَاطٜ إٜ کُرٜ. إِٻٜ نَنّدِ إٜ دَوَاطِ لَدّٜ. إِٻٜ کَرْوِ هࣷنࣷ لٜوْلِ دࣷوْ بَامْلٜ. 10 إٜجٜرْ وࣷنّࣷو مَوْطࣷ مَٻّٜ. أࣷبَدِيَ رٜوْتِ طُمْ. إٜلِيَبَ وࣷنِ تَتَٻࣷ. 11 مِسْمَنَ وࣷنِ نَيَٻࣷ. يٜرٜمِيَ وࣷنِ نجࣷيَٻࣷ. 12 أَتَيْ، نجٜىٰغَٻࣷ. إٜلِيٜلْ، نجٜطَّٻࣷ. 13 يࣷهَنَنْ، نجٜىٰتَتَٻࣷ. إٜلْجَبَدْ، نجٜىٰنَيَٻࣷ. 14 يٜرٜمِيَ، سَݠّࣷٻࣷ إٜ مَکْبَنَيْ، سَݠّࣷ إٜ غࣷعَٻࣷ. 15 ٻٜىٰ نغࣷنِ أَرْدِيٻٜ کࣷنُنْکࣷوٻٜ لٜنيࣷلْ غَدْ. سٜمّبٜ کࣷنُنْکٜ ٻُرْطࣷ ڢُو ڢَمْطُدٜ نَ ڢࣷنّدٜىٰ إٜ وࣷرْٻٜ 100، ٻُرْطࣷ مَنّغُ دُ سٜمّبٜ مُوطُمْ نَ ڢࣷتَنَ إٜ وࣷرْٻٜ 1٬000. 16 وࣷ کَمْٻٜ ݠٜڃِّ أُرْدُنْ لٜوْرُ غࣷعَٻُرْدُ وَکَّتِ هٜىٰوُنࣷو ڢَا نَ وٜشّࣷرࣷو تَتّٜىٰجِمْ ڢُو ندٜىٰنْ. ٻٜ ندِيوِ جࣷوطِنࣷوٻٜ لٜيْ نَطِّ ڢَرࣷ لٜتُّغَلْ إٜ غࣷرْغَلْ ڢُو.
17 وࣷٻّٜ لٜيْ لٜنيࣷلْ بٜنيَمِنْ إٜ نغࣷلْ يَهُودَ نغَرِ تࣷ دَاوْدَ ڢَا لٜيْ سُوطࣷرْدٜ مُوطُمْ تࣷونْ. 18 دَاوْدَ وُرْتِي دَرِي يٜىٰسࣷ مَٻّٜ دٜ وِعِ ٻٜ:
— سِ وࣷ جَمْ وَدِّ أࣷنْ، أࣷنْ نغَرَانَا ڢَا مبَلّࣷنْ کَمْ ڢُ، مِ جَٻّࣷتࣷ أࣷنْ إٜ ٻٜرْندٜ أَمْ ڢُو. أَمَّا سِ وࣷ جَمْبَادٜ کَمْ، وَتَّ إٜ جُوطٜ وَيْٻٜ کَمْ دٜ مِ وَطَايْ ڢُو کࣷ بࣷنِ، نغَرَنْطࣷنْ دُ، لَامْطࣷ مَامِيعٜنْ هِيتࣷو هَکُّندٜ مٜىٰطٜنْ.
19 ندٜىٰنْ رُوهُ لَامْطࣷ وَرِ إٜ أَمَسَيْ، مَوْطࣷ کࣷنُنْکࣷوٻٜ 30 ٻٜىٰنْ دٜ وِعِ:
مِطٜنْ نغࣷندِ إٜ مَاطَ، دَاوْدَ ٻِي يٜسَ.
أَيّࣷ مِطٜنْ نغࣷندِ إٜ مَاطَ.
جَمْ وࣷندَ إٜ مَاطَ.
جَمْ کِٻُّطࣷ وࣷندَ إٜ مَاطَ،
عَانْ إٜ وَلِّتࣷوٻٜ مَ ڢُو
سَبࣷ لَامْطࣷ مَاطَ نَ وَلّٜ.
دَاوْدَ جَٻِّي ٻٜ دٜ وَطِ ٻٜ لَاتِي مَوْٻٜ کࣷنُنْکࣷوٻٜ مُوطُمْ.
20 وࣷٻّٜ لٜيْ لٜنيࣷلْ مَنَسَ دُ، نغَرِ وَلِّتِندٜ دَاوْدَ ندٜ وَرْدُنࣷو إٜ ڢِلِسْتِيَنْکࣷوٻٜ ڢَا هَٻْدَ إٜ سَوُلُ ندٜىٰنْ. أَمَّا ٻٜ کٜٻَايْ وَلُّدٜ ڢِلِسْتِيَنْکࣷوٻٜ ٻٜىٰنْ سَبࣷ نَ مِيلَنّࣷو دَاوْدَ نَ هَاجَا جَمْبَادٜ طُمْعٜنْ وَتَّ إٜ جُوطٜ جࣷومُمْ سَوُلُ. 21 ندٜ دَاوْدَ يٜشِّنࣷو سِکْلَغْ ندٜىٰنْ، يِمْٻٜ لٜنيࣷلْ مَنَسَ نغَرِ جِنّغَندٜ طُمْ. ٻٜىٰنْ نغࣷنِ: أَدْنَ إٜ يࣷجَبَدْ إٜ يٜدِهَيٜلْ إٜ مِکَيٜلْ إٜ يࣷجَبَدْ إٜ إٜلِهُ إٜ سِلّٜتَيْ. ٻٜ ڢُو وࣷ ٻٜ أَرْدِيٻٜ کࣷنُنْکࣷوٻٜ أُجُنٜرٜ لٜيْ لٜنيࣷلْ مَنَسَ. 22 وࣷ کَمْٻٜ مبَلِّ دَاوْدَ سَبࣷ ٻٜ ڢُو إِٻٜ لَاتِنࣷو مَوْٻٜ کࣷنُنْکࣷوٻٜ سٜمّبِطِنْٻٜ. ٻٜ لَاتِي أَرْدِيٻٜ کࣷنُنْکࣷوٻٜ.
23 نيَنّدٜ ڢُو يِمْٻٜ نَ نغَرَنّࣷو تࣷ دَاوْدَ ڢَا مبَلَّ طُمْ. کࣷنُنْکࣷوٻٜ مَکّࣷ نغَرِ لَاتِي طُوطْٻٜ سٜمّبِطِنْٻٜ هࣷنࣷ کࣷنُنْکࣷوٻٜ لَامْطࣷ نࣷونْ.
لِمࣷورٜ کࣷنُنْکࣷوٻٜ دَاوْدَ يَهُٻٜ هٜبٜرࣷنْ
24 إِنَنْ لِمࣷورٜ کࣷنُنْکࣷوٻٜ تِيغِيٻٜ کَٻِتِرْطٜ وَرُٻٜ تࣷ دَاوْدَ وُرࣷ هٜبٜرࣷنْ ڢَا کࣷکَّ طُمْ لَامُ سَوُلُ ڢࣷدّٜ نࣷ جࣷومِرَاطࣷ يَمِرْنࣷو.
25 لٜيْ لٜنيࣷلْ يَهُودَ، وࣷرْٻٜ تِيغِيٻٜ بَوَاطٜ مَوْطٜ إٜ لَبّٜ، وࣷ کࣷنُنْکࣷوٻٜ 6٬800.
26 لٜيْ لٜنيࣷلْ سِمٜيࣷنْ، وࣷ کࣷنُنْکࣷوٻٜ سٜمّبِطِنْٻٜ 7٬100.
27 لٜيْ لٜنيࣷلْ لٜوِ، وࣷ وࣷرْٻٜ 4٬600،
28 يٜهࣷيَدَ، مَوْطࣷ سُودُ هَـٰرُونَ إٜ وࣷرْٻٜ 3٬700.
29 تَوْتِ سَدࣷکْ، سࣷرْدَاسِيجࣷ جࣷکࣷلّٜ شٜمّبِطِنْطࣷ إٜ يِمْٻٜ سُودُ مُوطُمْ أَرْدِيٻٜ 22.
30 لٜيْ لٜنيࣷلْ بٜنيَمِنْ، سَکِرَاٻٜ سَوُلُ، وࣷ وࣷرْٻٜ 3٬000 سَبࣷ وَکَّتِ أࣷونْ هٜىٰوْٻٜ مَٻّٜ نَ کٜدِّنࣷو نَ نغࣷلَّ لٜيْ سُودُ سَوُلُ.
31 لٜيْ لٜنيࣷلْ إٜڢْرَيِمْ وࣷ کࣷنُنْکࣷوٻٜ سٜمّبِطِنْٻٜ 20٬800، وࣷرْٻٜ إِنّدٜ أَنّدٜىٰٻٜ ڢࣷدّٜ شُوطِ مُٻّٜنْ.
32 لٜيْ ڢٜشّٜرٜ لٜنيࣷلْ مَنَسَ وࣷ وࣷرْٻٜ 18٬000 إِنْطٜ مُٻّٜنْ مبِنّدَا ڢَا نغَرَ کࣷکَّ دَاوْدَ لَامُ.
33 لٜيْ لٜنيࣷلْ إِسَکَرْ، أَنّدُنࣷوٻٜ وَکَّتِيجِ ڢَا ݠَامَ نࣷ إِسْرَاعِيلَ هَانِ دَبِرَ، وࣷ أَرْدِيٻٜ 200 إٜ سَکِرَاٻٜ مُٻّٜنْ ٻٜ ندَوْرَنْتَ.
34 لٜيْ لٜنيࣷلْ جَبُلࣷنْ وࣷ وࣷرْٻٜ 50٬000 هَرْوُٻٜ إٜکِتَاٻٜ کࣷنُ، تِيغِيٻٜ سِيِيجِ کَٻِتِرْطٜ ڢُو، هَوْتُٻٜ ٻٜرْندٜ وࣷوتٜرٜ مبِنّدَا.
35 لٜيْ لٜنيࣷلْ نَڢْتَلِ وࣷ أَرْدِيٻٜ کࣷنُنْکࣷوٻٜ 1٬000 إٜ کࣷنُنْکࣷوٻٜ 37٬000 تِيغِيٻٜ بَوَاطٜ مَوْطٜ إٜ لَبّٜ.
36 لٜيْ لٜنيࣷلْ دَنْ وࣷ وࣷرْٻٜ 28٬600 سٜغِلَنِيٻٜ کࣷنُ.
37 لٜيْ لٜنيࣷلْ أَسٜرْ وࣷ وࣷرْٻٜ 40٬000 تِيغِيٻٜ کَٻِتِرْطٜ سٜغِلَنِيٻٜ کࣷنُ.
38 لٜيْ لٜنيِ جࣷوطِيطِ ڢَرࣷ لٜتُّغَلْ أُرْدُنْ طُمْ وࣷنِ يِمْٻٜ رُبٜنْ إٜ ٻٜ غَدْ إٜ ڢٜشّٜرٜ لٜنيࣷلْ مَنَسَ تِيغِيٻٜ سِيِيجِ کَٻِتِرْطٜ مُٻّٜنْ ڢُو وࣷ وࣷرْٻٜ 120٬000.
39 کࣷنُنْکࣷوٻٜ ٻٜىٰنْ ڢُو نغَرِ هٜبٜرࣷنْ نَ شٜغِلَنِي کࣷنُ ڢَا کࣷکَّ دَاوْدَ لَامُ دࣷوْ إِسْرَاعِيلَ ڢُو إٜ لٜيْ ٻٜرْندٜ وࣷوتٜرٜ. إِسْرَاعِيلَنْکࣷوٻٜ هٜدِّيٻٜ ڢُو نجَرْدِي دَاوْدَ لَاتࣷو کَانَنْکٜ مُٻّٜنْ. 40 ٻٜ کٜدِّي تࣷونْ ڢَا وَطِ بَلْطٜ تَتِ، إِٻٜ نيَامَ، إِٻٜ نجَرَ سَبࣷ سَکِرَاٻٜ مَٻّٜ مࣷڃِّنَنِينࣷ ٻٜ نيَامْدُ.
41 يِمْٻٜ جࣷوطِيٻٜ طَکّࣷلْ مَٻّٜ ڢَا هٜوْتِ هࣷدِّيٻٜ لٜنيࣷلْ إِسَکَرْ إٜ نغࣷلْ جَبُلࣷنْ إٜ نَڢْتَلِ ڢُو نغَدِّرِ نيَامْدُ إٜ أَرَاجِ إٜ غٜىٰلࣷوبِ إٜ أَرَاجِ بَانٜىٰجِ إٜ نَعِ. ٻٜ نغَدِّ شࣷنّدِ إٜ تَمٜ ڃِبّٜ جࣷورْطٜ إٜ إِنَبࣷوجٜ جࣷورْطٜ إٜ إِنَبࣷوجَمْ إٜ نٜبَّمْ إٜ نَعِ إٜ بَالِ إٜ بٜعِ ڢَا هٜىٰوِ، سَبࣷ إِسْرَاعِيلَ نَ وࣷندُنࣷو إٜ سٜيࣷ.