Ndeenaagu fewreewu
6
1 Bone woodanii on, onon jooɗiiɓe Siyona e jam,e onon wuurduɓe hoolaare dow waamnde Samariya,
onon tedduɓe ley lenyol ɓurngol keddiiɗi,
ɓe suudu Israa'iila yowi jikke muuɗum dow muɓɓen ɓeen.
2 Njehee wuro Kalne de ndaaron,
njottoɗon faa Hamat, galluure mawnde ndeen,
de njippitoɗon Gat, galluure Filistiyankooɓe ndeen.
Yalla iɗe ɓuri laamuuji mooɗon ɗiɗi ɗiin naa?
Yalla leydi maɓɓe na ɓuri ndi mooɗon manngu?
3 Oɗon piloo woɗɗinde nyalaande bonnde ndeen,
de oɗon pooɗa laamu doole.
4 Oɗon pukkii dow leese gaɗiraaɗe nyiiƴe nyiibi,
oɗon poortii dow jooɗorɗe ɗigguɗe,
oɗon nyaama jawɗi baggi
e ga'i cuɓaaɗi,
5 oɗon njima, oɗon piya kolli.
On ngaɗanii ko'e mooɗon munkaruuji kesi hono Daawda.
6 Oɗon njarira inaboojam e kaake mawɗe,
Oɗon mbujoo nebbeele ɓurɗe wooɗude,
ammaa on killaaka e masiiba kewtiiɗo lenyol Yuusufi.
7 Wo saabe ɗuum de on laatoto artotooɓe nanngee njaaree faa leydi mboɗɗundi.
Ndeen weltaareeji mon dow jooɗorɗe ɗiin timman.
Haala halkere Samariya
8 Laamɗo Joomiraaɗo hunorake innde muuɗum wi'i:
— Inan konngol am, miin Joomiraaɗo Jom Baawɗe:
Miɗo hutii mawninkinaare Yaakuuba.
Miɗo hafii laamorɗi makko.
Mi wattan galluure makko mawnde ndeen
e ko woni e muuɗum fuu ley juuɗe wayɓe makko.
9 Fay si worɓe sappo keddii ley suudu wooturu, ɓe fuu ɓe maayan.
10 Nde sakiike waraaɓe ɓeen warowi faa wurtina ɓalli muɓɓen ley suudu nduun wulowa yaasin fu, ƴaman keddiiɗo faa lohooji suudu nduun wi'a: «Yalla aɗa heddodii e goɗɗo naa?» De joomum jaaboo wi'a: «A'aa, fay gooto.» Ndeen o wi'a ɗum: «Ngaɗaa siw, sabo wanaa wakkati mo innde Joomiraaɗo noddetee.»
11 Sabo Joomiraaɗo na hokka jamirooje.
O yamiran suudu mawndu nduun halkee faa laatoo kelte kelte,
de o waɗa famardu nduun duu pecce pecce.
12 Yalla pucci na ndogga dow tunte naa?
Na'i le, na mbargoo dow tefaare naa?
Ndelle saabe ɗume de oɗon mbattitira kiite goongaajo e tooke?
Oɗon loomtina dartaare e ko haaɗi!
13 Oɗon ceyoroo teetude wuro Lo-Dabar*
Oɗon mbi'a: Yalla wanaa e semmbe meeɗen teetirɗen wuro Karnayim* ngoon naa!
14 Wo saabe ɗuum de inan konngol am, miin Joomiraaɗo, Laamɗo Jom Baawɗe:
Mi umminanan on, onon suudu Israa'iila lenyol torroowol on
gilla Lebo-Hamat faa hewta pogowol njaayri Araba.