Pilee Joomiraaɗo faa mbuuron
5
1 Kettindee jimol maayde ngol jimanammi on ngool, onon Israa'iilankooɓe.2 Israa'iila surbayel saamii,
wooɗi ummitataako katin.
Inan na waalii dow leydi muuɗum
fay gooto ummintaa ɗum.
3 Inan ko Laamɗo Joomiraaɗo wi'i:
Galluure yaarannoonde sordaasiiɓe ujunere konu ndeen,
worɓe hemre tan heddodotoo,
Israa'iila jaarannooɗo konunkooɓe hemre oon du,
worɓe sappo tan keddantoo ɗum.
4 Inan ko Joomiraaɗo wi'i dow Israa'iila:
Pilee kam faa mbuuron.
5 Ammaa taa pilowee kam ley wuro Baytila,
taa njehee sakkirde galluure Gilgal,
taa naatowee faa ley nokkuure Beerseba seniinde ndeen,
sabo Gilgal yaarete leydi njanandi
Baytila du, laatoto winnde.
6 Pilee Joomiraaɗo faa mbuuron,
onon ƴuwdi Yuusufi,
taa o laatanoo on hono yiite
de nge nyaama on,
tawa ley Baytila toon fuu walaa baawɗo nyifude nge.
7 Oɗon loomtinira dartaare e tooke,
oɗon paɗɗa sariya goonga e leydi.
8 Taguɗo Ɗaccuki e Neɗɗooje,
battitiroowo nimre tekkunde e pooyngol fajiri,
gaɗoowo nyalooma niɓɓina laatoo jemma,
noddoowo diyeele maayo de saaka ɗe dow leydi oon:
Innde muuɗum wo Joomiraaɗo.
9 Wo o caaminoowo halkere dow jom semmbe
de nde halka galluure semmbinɗinaande.
10 Oɗon mbanyi kaaloowo goonga ley sariya,
oɗon kafii kaaliroowo e laaɓal.
11 Wooɗi du, saabe oɗon njaaɓa talkaaɓe e leydi,
oɗon njaɓa lampo alkama muɓɓen,
oɗon nyiɓira cuuɗi mooɗon e kaaƴe mawɗe cehaaɗe
ammaa on njooɗataako ley majji.
On aawii gese mooɗon inabooje lobbe
ammaa on njarataa inaboojam majje.
12 Sabo miɗo anndi no lutti mooɗon ɗuuɗiri,
no hakkeeji mooɗon poti.
Oɗon torra dartiiɓe,
Oɗon njaɓa ceede oonyiiɓe
de ɗalon talkaaɓe goonga ley cuuɗi sariya.
13 Wo saabe ɗuum de wakkatiiji hono ɗii,
jom hakkillo na deƴƴinoo, sabo wakkati oo, wo bonɗo.
14 Ndelle tewtee ko wooɗi, taa pilee ko boni, faa mbuuron,
de Joomiraaɗo, Laamɗo Jom Baawɗe wonda e mooɗon
fodde no mbi'oton noon.
15 Mbanyee ko boni, njiɗon ko wooɗi,
njinganon dartaare ley cuuɗi mooɗon sariya.
Ndeen na hasii Joomiraaɗo, Laamɗo Jom Baawɗe oon
yurmoto ko heddii e lenyol Yuusufi.
16 Saabe ɗuum de inan ko Joomiraaɗo, Laamɗo Jom Baawɗe oon wi'i:
Bullaali nanete nokku fuu.
Dow laabi fuu yimɓe peekoto na mbi'aa:
«En mbonii! en mbonii!»
Remooɓe noddete ngara mbulla,
woyooɓe maayɓe du, ngara mboya.
17 Bullaali nanete ley gese inabooje fuu
nyannde pantumi hakkunde mooɗon.
Noon Joomiraaɗo wi'i.
Haala hoolaade kujje ɓole
Nyalaande nimre
18 Bone woodana on, onon heɗiiɓe nyalaande Joomiraaɗo ndeen!
Ɗume keɗoriɗon nyalaande Joomiraaɗo ndeen?
Nde laatato nyannde nimre ɓaleere, wanaa nde annoora.
19 Nde nanndan e gorko dogguɗo laddeeru
de hawri e huunde ladde ɓurnde bonde.
O hooti ɓaade makko,
o tiigii juuɗe makko e kokuwol,
de mboddi soppi o.
20 Yalla nyalaande Joomiraaɗo ndeen wo annoora naa?
Yalla nde wanaa niɓɓunde nde yaynaa naa?
Ayyo, wo nde nyalaande nimre ɓaleere.
haala iidiiji ɓoli
21 Miɗo wanyi iidiiji mooɗon ɗiin, iɗi nyiddinii kam,
Mi yiɗaa nanande kawrite mon ɗeen katin.
22 Fay si cakkanɗon kam sadakaaji buleteeɗi
e ɗi conndi fuu,
mi saloto ɗum'en.
Sadakaaji mon dewral e gorri mon payɗi ɗiin fuu,
mi taykataako ɗum'en.
23 Ndelle mboɗɗinee kam jimi mooɗon mettuɗi ɗiin.
Mi yiɗaa heddaade na nana olko kolli ɗiin katin.
24 Ammaa sariya goonga wubbira hono diyeele.
Dartaare heewira hono gooruwol iloowol ni.
25 Israa'iilankooɓe, yalla ley duuɓi 40 ɗi tawaɗon ley ladde yoornde ɗiin,
on ngaɗanii kam sadakaaji maa dokke naa?
26 Ndelle on kooƴan tooru Sikkut, kaananke mooɗon,
tawti Kiyun, natal hoodere alla mooɗon,
kujje ɗe ngaɗanɗon ko'e mooɗon ɗeen
27 de mi yaara on maccangaaku faa yeeso Damas!
Noon Joomiraaɗo wi'i. Innde makko wo Laamɗo Jom Baawɗe.