Kiite dow rewɓe Samariya
4
1 Kettindee konngol ngol,onon rewɓe tekkuɓe hono na'i Basan,
durooji dow waamnde Samariya,
onon torrooɓe lokkaaɓe,
tampinooɓe talkaaɓe,
wi'ooɓe goriraaɓe muɓɓen:
«Ngaddanon min ɗam min njara», ɓeen.
2 Laamɗo Joomiraaɗo hunorake innde muuɗum seniinde ndeen wi'ii:
Sikke walaa, nyalaaɗe ngarowan
nde nanngiroyteɗon jamɗe
de hedditiiɓe e mooɗon du nanngiree jammbuure.
3 On mburtorto jule kokuuji, mono fuu e laawol muuɗum
de ndiiwireɗon soɓɓirre faro waamnde Harmon
Noon Joomiraaɗo wi'i.
Haala sadakaaji ɓoli
4 Njehee Baytila ngaɗowon hakke;
njahon Gilgal de ɓeydon bone!
Cakkon sadakaaji mooɗon subaka fuu,
kokkon jakkaaji mooɗon nyalaande tataɓerde fuu.
5 Mbulon sadaka mooɗon jettooje mo ngaɗirton e buuru jillaaɗo rabilla oon!
Ngooynon dokke ɗe kokkirton yardamuye, ngaɗon ɗe anndee!
Sabo wo ɗuum njiɗɗon, onon Israa'iilankooɓe.
Noon Laamɗo Joomiraaɗo wi'i.
No Israa'iila yeccoraaki to Laamɗo.
6 Miin kaa, mi yoppii on deedi ɓoli ley galluuje mooɗon fuu,
Mi ɗalii on nyaamdu ley nokkuuje mooɗon,
ammaa e noon fuu on njeccaaki to am.
Noon Joomiraaɗo wi'i.
7 Miin kaa, mi salanake on ƴuwoonde,
gilla tayri na heddii lebbi tati.
Ngaɗumi ƴuwoonde toɓi dow galluure ndee,
de ɗalumi galluure ndee too toɓo,
ngesa ngaa heɓi ndiyam
de ngaa too na wondi e yooro.
8 Galluuje ɗiɗi naa tati ndaasorake galluure wonnde faa njarowa ndiyam,
ammaa ɗe keɓaay ittude ɗomka majje.
De e noon fuu, on njeccaaki to am.
Noon Joomiraaɗo wi'i.
9 Mi fiyirii on nyawu gawri e puundi,
sardiŋeeji mooɗon ɗuuɗɗi e gese mon inabooje
e ƴibbe mon e leɗɗe mon jaytun fuu
baɓɓatti nyaami ɗum'en,
ammaa e noon fuu on njeccaaki to am.
Noon Joomiraaɗo wi'i.
10 Mi neldii on nyawu ndaaɓoowu,
hono ngu neldunoomi leydi Misira.
Mi wardii jokolɓe mooɗon e kaafaahi.
Mi accii pucci mooɗon kooƴaama.
Mi waɗii luumngol maayɓe humii kine mon ley hoɗorde mooɗon.
Ammaa fay e noon fuu on njeccaaki to am.
Noon Joomiraaɗo wi'i.
11 Mi halkii woɓɓe mooɗon
hono no kalkirnoomi Sodoma e Gomoora.
Inan oɗon nga'i hono doccal cortaangal ley yiite.
Ammaa fay e noon fuu on njeccaaki to am.
Noon Joomiraaɗo wi'i.
12 Wo saabe ɗuum de mi waɗete noon, aan Israa'iila.
Ndelle saabe ko ngaɗammi ma noon ɗuum dey,
cegiloɗaa e hawrude Laamɗo maaɗa, aan Israa'iila!
13 Sabo taguɗo baamle, gaɗuɗo henndu,
kaaltanoowo ɓiɓɓe Aadama miilooji muɓɓen,
battitiroowo pooyngol fajiri e nimre tekkunde,
jaaɓoowo dow toowdiije leydi oon,
innde muuɗum wo Joomiraaɗo,
wo Laamɗo Jom Baawɗe.