Ko Laamɗo holli Amos
Holleede baɓɓatti
7
1 Inan ko Laamɗo Joomiraaɗo holli kam: Imo wurtinannoo ornde baɓɓatti wakkati huɗo heso fuɗtannoo gaɗa ko kaananke wa'aantee koon. 2 Wakkati baɓɓatti ɗiin timminannoo huɗo leydi ndiin mbiimi:— Laamɗo Joomiraaɗo, miɗo ŋaare njaafoɗaa. Noy Yaakuuba waawiri heddaade na darii dow? Kanko lokkaajo oo!
3 Joomiraaɗo, mimsiti de wi'i:
— Ɗuum waɗataa.
Holleede yiite
4 Inan ko Laamɗo Joomiraaɗo holli kam: Imo gooynannoo ko o hiitorto yiite. Yiite ngeen hoortinii diyeele mawɗe de nyaami gese leydi Israa'iila. 5 Ndeen mbiimi:
— Laamɗo Joomiraaɗo, miɗo ŋaare, ndarnaa ɗum! Noy Yaakuuba waawiri heddaade na darii dow? Kanko lokkaajo oo!
6 Joomiraaɗo, mimsiti de wi'i:
— Ɗuum waɗataa.
Holleede njamndi teddundi
7 Inan ko o holli kam: Joomiraaɗo na darinoo ɗakkol kokuwol dartiingol, imo tiigii ɓoggol ponndirgol e junngo makko. 8 Ndeen o wi'i kam:
— Ɗume nji'ataa, Amos?
Njaabiimi o mbiimi:
— Ɓoggol ponndirgol.
Ndeen Joomiraaɗo wi'ii kam:
— Mi wattan ponndirgol ngool ley Israa'iila, lenyol am ngool faa mi fonndira dartaare muuɗum, sabo ley ko warata mi accataa faa'e faltoo ɓolum.
9 Nokkuuje Isiyaaka cakkirɗe kalkete.
Nokkuuje Israa'iila ceniiɗe laatoto bille.
Mi ukkorto suudu Yerobo'am e kaafaahi.
No Amos riiwiraa Baytila
10 Ndeen Amasiya almaami wuro Baytila neli Yerobo'am, kaananke Israa'iila wi'ee:
— Amos na wondi anniya umminande ma fitina hakkunde suudu Israa'iila. Yimɓe leydi ndiin mbaawaa heddaade na nana haalaaji makko ɗiin. 11 Inan ko Amos oon wi'i:
«Yerobo'am wardete kaafaahi,
Israa'iilankooɓe nanngete njaaree leydi mboɗɗundi.»
12 Ndeen Amasiya wi'i Amos:
— Aan ji'oowo oon, dillu ɗoo de njaha leydi Yahuuda. Toon aɗa waawi heɓirde nyaamdu e annabaaku maaɗa. 13 Ammaa taa hedda aɗa waɗa annabaaku ley Baytila sabo wo suudu kaananke seniindu. Wooɗi du wo nokkuure Israa'iilankooɓe seniinde.
14 Amos jaabii Amasiya wi'i:
— Miin mi wanaa annabaajo, mi wanaa ɓiyum. Miin wo mi duroowo na'i, mi demoowo leɗɗe ƴibbe. 15 Ammaa Joomiraaɗo hooƴii kam gaɗa coggal na'i de wi'ii kam: «Yahu kaaldiraa yimɓe am Israa'iilankooɓe ɓeen e annabaaku.» 16 Ndelle joonin oo, kettinoɗaa ko Joomiraaɗo wi'i, aan biiɗo:
«Taa haaldu e annabaaku ley Israa'iila,
taa mbi'aa ko boni dow suudu Isiyaaka.»
17 Saabe ɗuum de inan ko Joomiraaɗo wi'i:
«Deeka laatoto woykuuru ley galluure.
Ɓiɓɓe maaɗa worɓe e rewɓe mbardete kaafaahi.
Nokkuuje maaɗa ponndirte ɓoggol de njeɗondiree.
Aan e hoore maaɗa a maayowan ley leydi heeferɓe,
de Israa'iilankooɓe nanngee njaaree faa leydi mboɗɗundi.»