Ƴamol Ayuuba: Ko saabii Laamɗo haɗataa bonɓe hollude ɓural
24
1 Wooɗi, saabe ɗume de Jom Baawɗe ittataa wakkati sariya?Ko waɗi annduɓe mo nji'ataa nyalaande ndeen?
2 Woɓɓe ina cottina keerol ngesa,
iɓe mbujja kulle de ɓe ndura ɗe.
3 Iɓe ndiiwa araaji atiime'en,
iɓe teeta ngaari maayraaɗo gorum faa yoɓa ko nyalminoo.
4 Iɓe ndirbina talkaaɓe dow laawol.
Lo'uɓe ley leydi ɓeen fuu tampinaama faa cuuɗowii,
5 ina ummoo, ina njaha golleeji muɓɓen hono araaji ladde gonɗi ladde yoornde.
Iɓe pilanoo ɓiɓɓe maɓɓe ko nyaama ley ladde yoornde.
6 Iɓe taƴa gawri ley gese ɗe ɓe njeyaa,
iɓe cuɓowa inabooje to ngesa bonɗo.
7 Iɓe mbaala ɓalli ɓoli, kaddule ngalaa,
ɓe ngalaa ko ɓe cuddoo ley jaangol.
8 Ƴuwoonde na tappa ɓe dow baamle,
iɓe takkoo kaaƴe faa ɓe ɗuwoo.
9 Woɓɓe ina teeta atiimehoy musinoohoy,
iɓe nannga ɓiɓɓe talkaaɓe faa njoɓa ko nyalminoo.
10 Talkaaɓe ɓeen ina njaha ɓalli ɓoli, kaddule ngalaa,
iɓe ndafaa fay ko ɓe ndonndotoo cammeeji woɓɓe ɗuum.
11 Iɓe ngaɗana woɓɓe nebbam hakkunde ori leɗɗe jaytun,
iɓe ndampa iɓe itta ndiyam inabooje ammaa ɗomka na torra ɓe.
12 Ɓadiiɓe maayde na uuma ley ngalluure,
nawnaaɓe du na mbullitoo ballo,
ammaa Laamɗo nootaaki ɓe e oonyaare ɓillunde ɓe ndeen.
13 Ina woodi wanyuɓe annoora,
ɓe anndanaa laawol muuɗum,
ɓe ndarataako to woni.
14 Gaɗoowo war-hoore ummoto fajiri,
faa wara talkaaɓe e lo'uɓe,
hakkunde jemma du o laatoo gujjo.
15 Baaldoowo e debbo janano muuyan nimre waɗa,
sabo na miilii wo noon waɗata de yi'ataake,
de o sudda yeeso makko.
16 Jemma wuyɓe kelan cuuɗi ina naata,
nyalooma du sanaa ɓe cuuɗoo to niɓɓi.
Ɓe anndaa annoora.
17 Iri ɓeen fuu, iɓe kiisoroo nimre ɓaleere ndeen hono annoora fajiri,
ko hulɓinii ley nimre ɗuum du laatanii ɗum'en yigiiwo.
18 Iɓe nanndi hono nguufo dow ndiyam iloojam,
ngeɗu maɓɓe leydi wo kuɗaandi,
walaa fuu jahanɗo gese maɓɓe inabooje.
19 Hono no hokkere e nguli moɗirta marmalluuje,
noon du saabeere moɗirta waɗooɓe hakke.
20 Deedi dimuɗi ɓe ɗiin njeggitan ɓe,
gilɗi du nduran ɓe.
Fay gooto miccataako ɓe,
noon du bone ɗoofirtee hono lekki.
21 Bonɗo ina bonna debbo dimaro,
yurmataako mo gorum maayi du.
22 Ammaa Laamɗo na daasira jom'en semmbe e baawɗe muuɗum.
Si o ummanake ɓe fu, ɓe cikkitira yalla iɓe keddoo katin.
23 Imo hokka ɓe njooɗoo e jam, ɓerɗe maɓɓe mbaaltoo,
ammaa imo watta gite makko dow ko ɓe ngaɗata fuu.
24 Ɓe kokkaama semmbe wakkati seeɗa tan,
de ɓe lalla.
Ɓe leeƴinee, ɓe ɗayla hono huɗo,
ɓe taƴee hono cammeeji mbayeeri.
25 Si wanaa noon du, njeddon kam!
Kollon ko mbiimi ɗuum wo henndu tan!