No Ayuuba Jaaborii wi'i ina muuyi haaldude e Laamɗo
23
1 Ndeen Ayuuba jaabii wi'i:2 — Faa hannden du bojji am wo cattuɗi,
torra am teddanii kam sanne faa miɗo uuma.
3 Taweno miɗo anndi to nji'ammi Laamɗo!
Taweno mi hewtan faa to o jooɗii.
4 Si wo noon waɗii fu mi waddan wullaango am to makko,
de hunnduko am rufan wullitagol am.
5 Miɗo muuyi faamude no o jaabortoo kam,
mi faama faa wooɗa ko o wi'ata kam.
6 Ley kalala amin, yalla o hollan kam ɓural naa?
Aa'a, o hettindoto ko mbi'ammi.
7 Toon dartiiɗo waawan haaldude e makko,
carotooɗo kam oon yoofan kam faa abada.
8 Ammaa si mi dillirii lettugal miɗo tefa mo, o walaa toon,
naa si mi doggirii gorgal faa hannden mi faamantaa mo.
9 Si imo golla soɓɓirre toon, mi yi'ataa mo,
si o ummorake horɗoore du, mi haynataako mo.
10 Ammaa imo anndi laawol ngol njokkumi.
Si o ndaartindake kam fu, mi wurtinte mi laaɓuɗo hono kaŋŋe.
11 Koyɗe am ina njokki jaaɓanɗe makko,
mi jokkii laawol makko, mi wosaaki.
12 Mi seedaay e jamirooje makko,
miɗo jogii konngol makko,
miɗo horsini ngol ley ɓernde am.
13 Kanko tan woni Laamɗo,
moy foti waylitinde ko o anniyii?
Ko o muuyi ɗuum o waɗata.
14 Ko o fodii dow am ɗuum o tabintinta,
kujje iri ɗeen ina ɗuuɗi ley anniya makko.
15 Saabe majjum, kulol makko nanngii kam,
nde miiliimi kabaaru makko fuu,
miɗo diwna kulol.
16 Laamɗo waɗii ɓernde am taƴii,
Jom Baawɗe hulɓinii kam.
17 E noon fuu, nimre halkaay kam,
fay ko nimre tekkunde suddi yeeso am ɗuum.