Haala Elifas tataɓa: Ayuuba wo bonɗo cattuɗo
22
1 Ndeen Elifas Teemankeejo jaabii wi'i:2 — Ina woodi ko neɗɗo waawi nafirde Laamɗo naa?
Si goonga fay jom hakkillo wo hoorem tan nafata.
3 Si aɗa wooduno goonga ɗume ɗum seynirta Jom Baawɗe?
Nafaa oye o heɓata si golleeji maa wo dartiiɗi?
4 Aɗa miilii wo kulol maa Laamɗo waɗi de imo eelte?
Wo ɗuum waɗi imo hiite naa?
5 Yalla ɗum fuu ɗum yaadaay e lutti maa ɗuuɗɗi ɗiin naa?
Si goonga hakkeeji maa ngalaa haddi.
6 A doolɗii banndiraaɓe maa njoɓe ko nyalmaaki,
a teetii kolte koluɗo.
7 A hokkaay ɗomɗuɗo tampuɗo ndiyam,
dafaaɗo du, a haɗii ɗum nyaamdu.
8 Jom semmbe, wo kam jeyi leydi,
jiɗanaaɗo du, kam jooɗii ley mayri.
9 A riiwii rewɓe ɓe goriraaɓe muɓɓen maayi juuɗe ɓole,
a teetirii atiime'en mballa muɓɓen e doole.
10 Wo ɗuum waɗi tuugi pukkanii ma nokku fuu,
kulol e diwngol na ukkane.
11 Nimre suddii ma faa a yi'ataa katin,
diyeele du na njooli ma.
12 Wanaa Laamɗo faa dow kammu toon woni?
Ndaar koode ɓurɗe toowude no toowiri faa sanne.
13 De aɗa ƴama, «won ko Laamɗo anndii naa?
Imo waawi hiitaade gilla ley duule niɓɓuɗe faa hewta ɗo naa?
14 Duule uddii mo faa o yi'ataa,
imo waancoo faa dow beɗi kammu.»
15 Yalla a yoppataa laabi arandeeji,
iri ɗi bonɓe njokki naa?
16 Ɓe mbuuwaama gilla wakkati maɓɓe hewtaay,
mbubboojam wubbii gure maɓɓe.
17 Kamɓe mbi'annoo Laamɗo, «Mboɗɗoɗaa min!
Ɗume Jom Baawɗe waɗata min?»
18 Ammaa wo kam hebbinnoo gure maɓɓe kujje moƴƴuɗe.
Dabare bonɓe kaa, walaa ko jomi kam e majjum.
19 Nde fonnditiiɓe ndaari ko hewti bonɓe fu, na mbeltoo,
ɓe ngaɗaay ko boni du na njalnoroo ɓe,
20 ina mbi'a: «Sikke walaa wayɓe amin kalkaama,
ko ɓe acci du, yiite nyaamii ɗum.»
21 Joonin, faamir e Laamɗo, keɓaa jam,
ɗum waddante barke.
22 Jaɓu ekintinol ƴuurungol e makko,
ndesaa konngol makko e ley ɓernde maa.
23 Si a wartii to Jom Baawɗe a hewtan ko ngoodunoɗaa.
Si a wurtinii oonyaare e wuro maa,
24 si a ndaardii kaŋŋe maaɗa hono wo sollaare tan,
kaŋŋe maa dimo du hono kaaƴe gooruwol,
25 ndeen Jom Baawɗe laatante kaŋŋe,
laatane cardi maaɗa ndimri.
26 Kam du laatante ko ɓurɗaa weltoraade,
a tiggitoto Laamɗo.
27 A nyaagoto mo, de o jaaboo du'aare maa,
ndeen kebbinaa amaana mo kooƴunoɗaa.
28 Ko ndabuɗaa fuu tabitan,
jayngol yaynante dow laawol maa.
29 Si goɗɗo leeƴinaama,
a wi'an ɗum ummoo.*
Laamɗo du hisinan mo mawnitaaki.
30 Fay jom feloore du hisinte
saabe dartaare maaɗa.