No Ayuuba jaaborii wi'i bonɓe na mbeltoo
21
1 Ndeen Ayuuba jaabii wi'i:2 — Kettindee! Nanee ko mbi'ammi faa wooɗa,
si on ngaɗii noon fu on peewnan ɓernde am.
3 Munyanee kam, accon mi haala.
Si mi haalii, ndeen njalnoroɗon kam no njiɗirɗon.
4 Miin, yalla saƴƴa am na woni dow neɗɗo naa?
Yalla laatiiɗo hono am munyan katin naa?
5 Ndaaree no nga'umi de ɗum wemmba on,
ɗum tan heƴii faa nanngon kunnduɗe mon e haaynde.
6 Nde miiliimi ɗum fu miɗo hula,
ɓanndu am na diwna.
7 Ko waɗi de bonɓe na mbuura faa ɓooya,
na ɓeydoroo manngu e semmbe?
8 Iɓe nji'a ɓiɓɓe maɓɓe,
faa yahude e taaniraaɓe maɓɓe na tabita.
9 Gure maɓɓe ina njooɗii e jam,
walaa ko hulɓinta ɓe,
sawru Laamɗo eeltataa ɓe.
10 Kalahali maɓɓe na ndanya baasi fuu walaa,
bijji maɓɓe na ndima ngalaa ɗalunge.
11 Iɓe acca ɓikkoy maɓɓe kooy na pijindoo hono ɓikkoy mbaaloy,
ikoy pittira seyo.
12 Ibe njima iɓe piya tummbuɗe e kolli,
iɓe puufa cereeli iɓe mbeltoo.
13 Iɓe kebbina balɗe maɓɓe fuu e weltaare,
de ɓe naata saabeere e jam.
14 Ammaa iɓe mbi'a Laamɗo, «Woɗɗa min!
Min njiɗaa anndude laabi maa.
15 Moy woni Jom Baawɗe, sakko min ɗowtanoo ɗum?
Ɗume du'oraade ɗum nafata min?»
16 Si goonga wanaa kamɓe ngaɗi faa ɓe keɓi jam oon,
miin kaa walaa ko jomi kam e dabare maɓɓe.
17 Yalla on nji'ii koode bonɓe na nyifee naa?
Yalla a meeɗii yi'ude ɓe ley bonanda naa?
Yalla Laamɗo na yeɗa ɓe naawalla ley tikkere muuɗum?
18 Yalla ɓe laatake hono huɗo yoorko ko henndu wuuwata naa?
Wo ɓe hono nyaande nde duluuru ruynata naa?
19 Oɗon mbi'a Laamɗo saroto ɓiɓɓe e dow bonandaaji saaraaɓe muɓɓen.
Miin le, miɗo wi'a accu gaɗuɗo ɗum pay yomnitee, faa faama ko waɗi ɗuum!
20 Accu o yiira gite makko sariya kaan,
accu o yara naawalla tikkere Jom Baawɗe.
21 Sabo si limgal lebbi makko fuu kiɓɓii,
ɗume wuro makko waanniri mo katin?
22 Yalla goɗɗo ekintinta Laamɗo anndal naa?
Si goonga kanko woni kiitotooɗo fay tedduɓe wonɓe dow oon.
23 Goɗɗo maayan ina heewi cellal,
na woodi ɓernde fukkiinde e jam.
24 Wo payɗo kaarɗo kosam,
mo ƴi'e keewɗe mbusam.
25 Goɗɗo du maaydan e kaaɗeefi ɓernde,
meeɗaay maatude weltaare.
26 Ɓe fuu ɓe pukkoto ley sollaare,
gilɗi du cuddan ɓe.
27 Ndaar, miɗo anndi ko miilotoɗon,
miɗo anndi dabareeji mooɗon wo faa mbonnon kam.
28 Oɗon ƴama, «Toy woni wuro mawɗo oon?
Toy woni suudu ndu bonɗo oon jooɗinoo? Ay, halkii.»
29 Wooɗi, yalla on ƴamaay yiiltotooɓe naa?
Yalla on njaɓaay seedaaku mo ɓe kokki naa?
30 Ay, nde nyalaande bone finii fu, bonɗo oon hisii baasi,
nyalaande nde tikkere rufi fu, joomum wo kisinteeɗo.
31 Moy haalata yeeso makko,
wi'a ko o waɗi ɗuum wooɗaa?
Moy yomnotoo mo e dow ko o waɗi?
32 Si o yaaraama faa o uwee fu,
saabeere makko reenete.
33 Leydi ngattaandi dow mayre ina weli mo.
Duuniya fuu na jokka na yaha mooɓugol makko,
ardiiɓe yeeso makko du mbaawaa limeede.
34 Ndelle noy haala mon ɓola ka waaltinirta kam?
Ka mbi'uɗon ka fuu wo fewre ɓaleere tan.