Haala Sofar ɗiɗaɓa: Bonɗo halkan
20
1 Ndeen Sofar Naamankeejo jaabii wi'i:2 — Si goonga ko mbi'uɗaa ɗuum umminii ɓernde am faa mi jaaboo,
sabo mettorgal nanngi kam.
3 Mi nanii no pelirɗaa kam faa koyfinɗaa kam,
ammaa hakkillo am na hokka kam paamal dow no njaabortomaami.
4 Yalla a anndaa no kujje ngorri gilla arande naa?
Gilla nde tagaaɗo wattanoo ley adunaaru ndeen,
5 ilinaali seyo bonɓe ɓooyataa,
weltaare mo hulataa Laamɗo oon wo wakkati seeɗa tan.
6 Fay si tawi o toowii faa o hewti kammu,
naa hoore makko meemii duule,
7 o nyolan o lalla faa abada hono ko yaltata e reedu makko,
yi'unooɓe mo ƴaman, «Toy o woni?»
8 O fiiran hono koyɗol, walaa fuu jiitoowo mo,
o majjiran hono koyɗol ley jemma.
9 Ndaarannooɓe mo ɓeen nji'ataa mo katin,
joonnde makko taykataako mo.
10 Ɓiɓɓe makko njeccinan ko teetunoo talkaaɓe ɗuum,
o hokkitan jawdi makko ndi o ɓoɓtunoo.
11 Ƴi'e makko ina keewi semmbe hono jokolle,
ammaa semmbe oon fuu fukkodoto e makko ley sollaare.
12 Fay si ko boni ina weli e hunnduko makko hono njuumndi,
de o suuɗii ɗum ley ɗemngal makko,
13 fay si o yiɗaa seedude e majjum,
imo wuufi ɗum ley hunnduko makko,
14 ɗum soofan ley reedu makko,
ɗum laatoo hono tooke mboddi ley teketti makko.
15 O moɗii jawdi, ammaa o tuttan ndi,
Laamɗo waɗan faa reedu makko tuuta ndi.
16 Imo musina tooke mboddi,
hunnduko foosikere waran mo.
17 O seyortaako ndaarude mbelirka maayooji katin,
gooruuji ilinooji njuumndi e kettungol ɗiin.
18 O hokkitiran ko o tampanii,
wanaa kanko nyaamata ɗum,
o heɓataa weltoraade luumtagol makko.
19 Sabo o niisii talkaaɓe, o yeebake ɗum'en,
o teetanii hoore makko suudu ndu o nyiɓaay.
20 Ko suunooji makko peewndataako mo ɗuum,
o heɓataa resude faa'e e ko o horsini fuu.
21 Imo moɗa huunde fuu, fay huunde hisataa,
saabe ɗuum jawdi makko ɓooyataa.
22 Fay ko o woodi goodal manngal,
ɓillaare nanngan mo,
mettorgal e semmbe muuɗum fuu ukkoto e makko.
23 Wakkati mo o hebbinta reedu makko oon,
Laamɗo yoofan tikkere muuɗum dow makko,
nde saama dow makko nde laatanoo mo nyaamdu.
24 Si o doggii kaɓitirgal njamndi ɓaleeri fu,
kural njamndi mboɗeeri yuwan mo.
25 Si o ɗoofii ngal e ɓanndu makko fu,
hoore maggal ɗelkoore ndeen wurtinte e kankaangel makko,
de kulol manngol nannga mo.
26 Nimre ɓaleere ina doomi halkude ko o resi.
Yiite nge fay gooto huɓɓaay nyaamata mo,
faa yottoo ko heddanii mo ley suudu makko.
27 Kammu sudditan hakkeeji makko,
leydi du wulloto mo.
28 Ndiyam wuuwan wuro makko,
ngo hooƴete nyalaande tikkere Laamɗo.
29 Ɗuum woni ngeɗu ngu Laamɗo resani bonɗo,
wo ndongu ngu Laamɗo fodani ɗum.