No Ayuuba jaaborii wi'i darantooɗo ɗum oon ina wuuri
19
1 Ndeen Ayuuba jaabii wi'i:2 — Faa ndeye celoton torrude kam?
Faa ndeye niisirton kam e haalaaji naawɗi?
3 On mbonkake kam ko ɓuri nde sappo,
no torrirton kam nii du semtinaaki on.
4 Si mi woofii du, wo hoore am ngaɗanmi,
walaa ko jomi on e majjum.
5 On mawninii ko'e mon dow am,
oɗon mbi'a ko hewti kam de huyfinii kam ɗuum
na holla feloore am.
6 De paamee, Laamɗo e hoore muuɗum haɗi kam goonga,
fiildi kam tuugol muuɗum.
7 Miɗo wulla, miɗo wi'a, «Hey celon bonanda!»,
de walaa fuu nootiiɗo,
miɗo wullitoo ballo,
de sariya goonga fuu walaa.
8 O faddake laawol am faa taa mi faltoo,
o niɓɓinii ɗati am.
9 O ɓortii darja am,
o teetii pilkol am manngu.
10 O helii tatteeji am fuu faa mi halkii,
o ɗoofii jikke am no lekki ɗoofirtee.
11 O ƴuufinii tikkere makko dow am,
o limii kam hakkunde wayɓe mo.
12 Honooɓe makko na ngara hono neɗɗo gooto,
iɓe ngaɗa laabi faa ɓe kewta to am,
iɓe piilii suudu am.
13 Sakiraaɓe am du, o waɗii ndoggii kam,
banndiraaɓe am ngaɗi hono anndaa kam.
14 Yimɓe wuro am njoppii kam,
yigiraaɓe am njeggitii kam.
15 Weerɓe am e horɓe am fuu kooƴirii kam mo jeyaaka e wuro,
ina ndaarda kam hono janano.
16 Miɗo nodda maccuɗo am de jaabataako,
fay ko nyaagotoomi ɗum e heese.
17 Mi laatanake deekam ko nyiddinii,
mi laatanake ɓiɓɓe inna am ko nefinii.
18 Fay cukaloy ina njawi kam,
si mi ummake fu ikoy mbonkoo kam.
19 Mi laatanake fay yigiraaɓe am takkiiɓe ko nefinii,
ɓe njiɗumi du laatake wayɓe kam.
20 Mi laatake keddoriiɗo ƴi'e ɓole,
nguru tan keddodiimi.
21 Njurmee kam!
Njurmoɗon kam, onon yigiraaɓe am,
sabo junngo Laamɗo tappii kam!
22 Ko saabii de oɗon ndiiwra kam no Laamɗo riiwri kam nii?
On cawtataa nyaamude teewu am naa?
23 Tawee goɗɗo winndanno haala am,
tawee ka diidaama ley dewtere.
24 Tawee ka ŋenyiraama e binndirgal njamndi,
ka sehaama e dow hayre,
ka tabintinaa faa abada.
25 Miin le, miɗo anndi darantooɗo kam oon na wuuri,
e wakkati timmoode du daranto kam ley adunaaru.
26 Fay si terɗe am kalkaa,
mi yi'an Laamɗo e ɓanndu am ndu.*
27 Mi yi'an mo, miin e hoore am.
Gite am pay nji'ata mo, wanaa goɗɗo.
Ɗuum woni ko keppumi e ɓernde am.
28 Oɗon piloo no ngaɗoton faa ndiiwon kam
saabe ko mbiiɗon wo miin fooɗanii hoore am ko boni ɗuum.
29 Wooɗi ndelle, kulanee ko'e mon taa kaafaahi funta hakkunde mooɗon,
sabo tikkere mon wo hakke pooɗanoowo on kaafaahi.
Nii paamirton du kiitotooɗo ina woodi.