Haala Bildat ɗiɗaɓa: Golleeji bonɗo caaman dow muuɗum
18
1 Ndeen Bildat Suhankeejo jaabii wi'i:2 — Faa ndeye accataa* juunnude haala?
Hakkil tafon, de caggal ɗuum kaalden.
3 Saabe ɗume de min ndaardaa hono daabaaji?
Aɗa hiisoo min hono min fuuyɓe naa?
4 Aan kalkiroowo hoore maa tikkere,
aɗa miilii adunaaru sankitoto saabe maaɗa naa?
Saabe maaɗa tefaaje adete to ngonnoo naa?
5 Si goonga ni, hoodere bonɗo nyifete,
duɗal muuɗum du yaynataa katin.
6 Jayngol laatanto suudu makko nimre,
fitilla makko wo nyifeteeɗo.
7 Koyɗe makko joginooɗe semmbe ɗeen njaccitan,
dabare makko pay liɓata mo.
8 Koyɗe makko ngattan mo ley tuugol,
imo yaaɓa dow ngayka cuddaaka.
9 Teppol na teppa mo,
nyiiƴe tuugol nanngan mo faa teeŋa.
10 Ɓoggol jorfaangol ina fukkanii mo,
nanngirgal ina ɗuppinanii mo dow laawol ɗoon.
11 Ko hulɓinii ina wemmba mo e tatteeji fuu,
ina riiwa mo to o yaaɓata fuu.
12 Rafo na doomi faa moɗa semmbe makko,
bone na segilii faa fergina mo.
13 Nyawu mbonngu na nyaama nguru makko,
pooɗoowu maayde nguun hantan koyɗe makko e juuɗe makko.
14 Imo daasee gilla ley suudu makko ndu o hoolinoo,
o yaaree to laamiiɗo kulɓiniiɗo.
15 Walaa fuu ko heddii wuro makko katin,*
yiite gawgawtoowe ina rufee dow joonnde makko ndeen.
16 Ɗaɗi makko njooran ley,
licce makko ɗaylan dow.
17 O miccataake ley adunaaru,
lenyol makko yeggitan fay innde makko.
18 Wo o diiweteeɗo e annoora faa o naata nimre,
o burtinteeɗo e ley adunaaru.
19 O walaa ɓiɗɗo sakko taaniiwo ley lenyol makko,
walaa fuu kisuɗo ley hoɗorde makko.
20 Heeduɓe mo gorgal ina kula ko hewti mo,
lettugaaɓe makko du ina ndiwnira kulol.
21 Sikke walaa, noon woni timmoode wuro bonɗo,
ɗuum woni ngeɗu wuro mo anndaa Laamɗo.