17
1 Yonki am helaama, nyalakoy am timmii,saabeere na heɗii kam.
2 Sikke walaa, jalnortooɓe kam na piilii kam,
mi waalan miilaade yawaara mo ɓe kollata kam.
3 Yaa Laamɗo, kokkaa kam tannyoral mi heɓan yoofeede,
si wanaa aan walaa darantooɗo kam katin.
4 Ɓee kaa, a haɗii ɗum'en paamal,
ndelle a hokkataa ɓe jaalorgal.
5 Jammbiiɗo yigiraaɓe muuɗum faa heɓa goɗɗum,
jiile ɓiɓɓe muuɗum nde'an.*
6 A waɗii faa mi laatake jalnorteeɗo ley yimɓe,
mi laatake tuɓteteeɗo joodooli.
7 Gite am niɓɓii saabe mettorgal ɓernde,
ɓanndu am fuu huyfirii hono ɗoyki.
8 Ko hewti kam ina wemmbi dartiiɓe,
mo waɗaay fuu ko boni na ɓernana mo hulataa Laamɗo.
9 Dartiiɗo selataa laawol muuɗum,
laaɓuɗo ɓernde na yaara yeeso e hoolaare.
10 Joonin ngarton on fuu faa kaalon katin,
ammaa mi yi'ataa hakkilante fay gooto ley mooɗon.
11 Balɗe am timmii,
anniyaaji am cankitaama,
ko ɓernde am yiɗi fuu halkaama.
12 Yigiraaɓe am ina mbi'a jemma wo nyalooma,
iɓe mbi'a jayngol waɗii, jaka wo nimre.
13 Si jikke am woni saabeere laatoo wuro am,
si mi weƴƴitii leeso am ley nimre toon,
14 mi wi'ii ngayka, kam woni baaba am,
ngilngu du laatii inna am naa sakiike am debbo,
15 ndeen kaa toy jikke am oon woni?
Moy yiitanta kam jikke oon?
16 Yalla o ɗowtan kam ley saabeere de min uwidee naa?
Min njippodoto ley sollaare naa?