No Ayuuba jaaborii wi'i walaa jiɗɗo ɗum
16
1 Ndeen Ayuuba jaabii wi'i:2 — Mi haarii nande iri ka.
On fuu waaltingol mooɗon wo tiiɗalla tan.
3 Haala mon hennduuha kaan timman naa?
Ɗume waanni on faa keddoɗon e jaabaade?
4 Fay miin du miɗo waawi haalirde no kaalirton
si on laatake no ngonirmi joonin ni.
Mi waawan mi deka on pelooje,
mi yiilirana on hoore yawaara.
5 De si wo miin kaa haala am semmbinɗinan on,
mi wi'an ko waaltinta ɓerɗe mon
faa hoynana on.
6 Si mi haalii, naawalla am ɓuytataako,
si mi deƴƴinake du, ɗum dillataa.
7 Yaa Laamɗo, ndaar no tampinirɗaa kam,
a halkii wonduɓe e am fuu.
8 A waɗii faa mi laatake nyoofiiɗo,
ɗum laatake seedaaku dow am,
fooƴugol am ummanake kam,
ina fela kam.
9 Ley tikkere o ummanake kam,
o seekii kam,
o ŋerƴondiranii kam nyiiƴe,
laatiiɗo ganyo am oon futtinanii kam gite.
10 Yimɓe na mermertana kam,
ɓe peenyirii kam yawaara,
ɓe kawririi kam nganyaandi.
11 Laamɗo hokkitirii kam oonyiiɓe*,
o faɗɗii kam ley juuɗe bonɓe.
12 Miɗo wuurnoo e jam, de o niisi kam,
o nanngi kam daande de o fusi kam,
o waɗi faa laatiimi cappeteeɗo makko.
13 Fiɗooɓe makko na kowa kam,
kure muɓɓen ina naata ɓooƴe am, o walaa yurmeende,
faa o yuli kam kankaanngel de o rufi ndiyam maggel e leydi.
14 Imo nawna kam imo nawnitoo kam,
imo yana e am hono konoowo.
15 Bootooru laatii nguru ɓanndu am,
mi nyifii manngu am ley sollaare.
16 Yeeso am ɓuutii saabe bojji,
nimre ɓaleere uppinii gite am.
17 Ɗum fu hewtake kam fay ko mi waɗaay fuu ko nyanngi,
du'aare am du wo laaɓunde.
18 Yaa leydi, taa suddu ƴiiƴam am,
taa accu bojji am keɓa to cuuɗoo.
19 Ndaar, fay joonin seedee am ina woni dow kammu,
kokkoowo seedaaku am na toon faa dow.
20 Yigiraaɓe am ina njalnoroo kam,
gonɗi am ina ndufa yeeso Laamɗo.
21 Tawee neɗɗo heɓanno dewrintinoowo hakkunde muuɗum e Laamɗo,
hono no neɗɗo waɗiranta yigoo muuɗum nii.
22 Limgal duuɓi am ɓadake timmude,
mi ɓadake jokkude laawol ngol mi soƴƴataako.