Haala Elifas ɗiɗaɓa: Ayuuba na yedda Laamɗo
15
1 Ndeen Elifas Teemankeejo jaabii wi'i:2 — Gooduɗo hakkillo jaaborto e anndal hennduwal naa?
O hebbinan reedu makko henndu lettugaaru naa?
3 Yalla o wullitorto haala ka nafataa mo naa?
O golliran haalaaji ɗi mballataa naa?
4 De aan le, aɗa itta kulol Laamɗo,
aɗa haɗa yimɓe miilaade Laamɗo no wooɗiri.
5 Wo hakkeeji maa njaltinta ko boni e hunnduko maa,
a suɓake haala ƴoyre.
6 Wanaa miin sarete, wo hunnduko maa,
wo ko mbiiɗaa ɗuum nanngi ma.
7 Aɗa miilii aan woni neɗɗo artiiɗo rimeede naa?
Aɗa tawaa gilla nde baamle tagaakano naa?
8 Aan aɗa tawee ley kawrital nanooɓe sirri Laamɗo dow naa?
Aɗa miilii aan tan woodi hakkillo naa?
9 Ɗume annduɗaa ko minen min anndaa?
Ɗume paamuɗaa ko minen min paamaay?
10 Minen e nayeeɓe jom'en ndanandi ngondi,
heccuɓe fay baaba maaɗa.
11 Hinney mo Laamɗo hinnii maa oon heƴataa ma naa?
Haalaaji keesindiiɗi mbelaay ma?
12 Ɗume majjini hakkillo maa?
Saabe ɗume kulkultintaa aɗa maƴƴina gite maa,
13 faa tikkanaa Laamɗo,
de accaa iri haala mburtotooka e hunnduko maa ka?
14 Neɗɗo wo ɗume, faa wi'a wo laaɓuɗo?
Mo debbo rimi na waawi laataade dartiiɗo naa?
15 Ndaar, Laamɗo hoolaaki fay seniiɓe muuɗum,
fay kammu du laaɓaay yeeso muuɗum,
16 sakko neɗɗo nefniiɗo, keewuɗo oonyaare,
jaroowo hakke hono ndiyam!
17 Nanu! Ina woodi ko mbi'anmaami.
Wo ko njiimi ɗuum pillotoomi.
18 Miɗo yiɗi hollude ma ko jom'en hakkillo kaali,
wooɗi cuuɗaay ko maamiraaɓe muɓɓen kolli ɗum'en ɗuum.
19 Wo kamɓe ɓeen tan kokkaa leydi ndiin,
janano fay gooto naataay hakkunde maɓɓe.
20 Bonɗo yaran torra haddi balɗe muuɗum fuu,
bone na heɗii nyannguɗo haddi duuɓi muuɗum fuu.
21 Imo maata sawtu kulɓiniiɗo.
Wakkati mo o heɓi jam, ndeen fiyooɓe-teeta ukkoto e makko.
22 O ittii jikke makko e hisude nimre,
kaafaahi ina heɗii mo.
23 Imo yiiltoo imo filoo nyaamdu, de toy ndu heɓetee?
Imo anndi nyalaande nimre yottake mo.
24 Bone e ɓillaare na kulɓina mo, na kipporoo mo
hono no laamiiɗo cegilaniiɗo konu hipporto noon.
25 Sabo o sappake Laamɗo honndu,
o hollii Jom Baawɗe mawnitaare,
26 o ummanii ɗum, imo doggira yoora hooraaku,
imo tiigii wawaade mawnde tekkunde.
27 Boke makko na ɓuttiɗi,
buttuli makko ina keewi ɓellere.
28 Ammaa o jooɗoyto ley kuɓeeje laatiiɗe bille,
ley cuuɗi ɗi fay gooto walaa,
ɓadiiɗi ŋappitaade.
29 O heddodataako e jawdi makko,
jawdi makko neeɓataa,
ndi lanyataa ley leydi ndiin.
30 O hisataa nimre,
nguleefi naange yoornan licce makko,
foofaango Laamɗo fiisan mo.
31 Taa o hooloo hiila ɓola,
de o hiila hoore makko,
sabo hiila kaan tan laatotoo njobdi makko.
32 Gilla wakkati makko hewtaay, o yoɓete faa hiɓɓa,
licce makko njooran koloŋ.
33 O ɗaylan hono ɓikkoy inaboohi* koy ɓenndaay,
o solan hono pinndi jaytun.
34 Kawrital heeferɓe heɓataa danyal.
Yiite du wulan ko nyiɓiraa njeenaari fuu.
35 Iɓe caawi bone iɓe ndima bonandaaji,
deedi maɓɓe ina keewi fewre.