Ayuuba na heddii e haala na wi'a nyalakoy neɗɗo wo seeɗa
14
1 Neɗɗo fuu mo debbo rimi,wo nyalakoy seeɗa tan woodi,
wo kebbinɗo torraaji.
2 Imo wurtoo hono pinndi, de o ɗayla o yoora,
imo ƴaɓɓoo hono ɗoyki, de o lalla.
3 Yaa Laamɗo, wo iri o taykotoɗaa naa?
A waddan hono o yeeso maa faa caroɗaa ɗum naa?
4 Moy wurtinta ko laaɓi e ley ko tuuni?
Ay, walaa fay gooto.
5 Nyalakoy neɗɗo fuu limaama,
limgal lebbi makko fuu wo aan taƴi,
wooɗi du a waɗanii mo keerol ngol o faltataako.
6 Ndelle accu wattude hakkillo maa dow makko,
faa o heɓa o fowta,
hono adaaɗo gollal de timmini ni.
7 Fay lekki na woodi jikke,
si ki soppaama ki wilitan,
ki waɗan licce kese.
8 Fay si ɗaɗi makki neeɓii ley leydi,
rotere makki fuɗɗi waatude,
9 si ki maatii peeweengi ndiyam fu, ki wilitan,
licce kese ɗeen du laatoo hono leggel baggel.
10 Ammaa neɗɗo le, si maayii,
ndeen kaa, timmii.
Ɓii Aadama si foofii foofaango sakitiingo,
dillii, de ɗume heddii katin?
11 No weendu ɓeeɓirta,
e no gooruwol re'irata faa yoora koloŋ,
12 noon du neɗɗo fukkortoo ummataako katin,
faa wakkati mo njaayri kammu walaa,
fintugol makko timmii.
O fintataa sakko o ummoo.
13 Yaa Laamɗo, tawee a suuɗan kam ley saabeere,
cuddaa kam faa nde tikkere maaɗa feewi,
ndesanaa kam wawtu, de sakitoo miccitoɗaa kam.
14 Si neɗɗo maayii heddodoto e yonki katin naa?
Si wo noon, mi heɗoto ley gollal am tilsinaangal,
faa nyalaande yoofeede am wari.
15 Ndeen tawete a noddan kam, miin du mi jaaboo,
a muuyan kam sanne,
miin mo juuɗe maa tagi oon.
16 Ndeen du tawan a taykoto to njaaɓammi fuu,
a wattataa hakkillo maa dow hakkeeji am.
17 A suuɗan lutti am,
a uddan hakkeeji am.
18 Ammaa baamle ina caama na tallitoo,
tefaaje na adee to pukkinoo,
19 ndiyam na niisa kaaƴe,
gooruuji na kooƴa leydi,
noon du kalkirtaa jikke neɗɗo.
20 Aɗa liɓa neɗɗo wakkati fuu, de o dilla,
aɗa waylita alhaali makko, de ndiiwaa mo.
21 Fay si ɓiɓɓe makko kokkaa manngu o faamataa,
si ɓe leeƴinaama du o maatataa kabaaru majjum.
22 Naawalla ɓanndu makko tan o maatata,
hoore makko tan o woyanta.