No Ayuuba haɓiri e yigiraaɓe muuɗum
13
1 Ndaar, ɗum fuu mi yiirii ɗum e gite am,mi nanirii ɗum e noppi am mi faamii.
2 Ko annduɗon fu, miin du miɗo anndi ɗum,
walaa ko ɓurduɗon kam.
3 Ammaa miin wo e Jom Baawɗe kaaldammi,
wo e makko njiɗumi batidinde.
4 Onon kaa, oɗon mappa kam pene!
On fuu wo on sawrooɓe ɓe mbaawaa sawrude.
5 Taweno on ndeƴƴinii tan,
noon hollata oɗon njogii hakkillo.
6 Nanee ko njaabantoomi hoore am,
kettindee wullaandu am.
7 Wo saabe Laamɗo de oɗon pena pene ɗeen naa?
Wo saabe makko kaalirton rafi goonga naa?
8 Yalla on ndaranto mo naa?
On laatake seedeeɓe makko naa?
9 Si Laamɗo hiinyii on, yalla tawran on goonga naa?
Yalla on miilii on pijiran hakkillo makko no pijirton hakkillo neɗɗo noon naa?
10 Si nii on mbi'ii ko wanaa goonga e suuraare
faa miiliɗon daranaade mo,
sikke walaa o felan on.
11 Wanaa manngu makko hulɓinta on naa?
Wanaa kulol makko nanngata on wakkati gooto?
12 Banndi mon na nanndi hono ndoondi tan,
jeddi mooɗon du hono kokuwol kelngol.
Ko Ayuuba yiɗi wi'ude Joomiraaɗo
13 Ndeƴƴinee! Kokkon kam laawol faa mi haala,
de ko hewti kam fuu accon heɓa kam.
14 Ayyo mi sakkan yonki am nii,
mi taykataako nguurndam am katin.
15 Fay si laatii Laamɗo muuyan warude kam du,
mi walaa jikke goɗɗo.*
E noon fuu, mi dardoto e makko
mi holla miɗo woodi goonga.
16 Wooɗi ɗum laatoto ko hisinta kam du,
sabo mo hulataa Laamɗo darataako yeeso muuɗum.
17 Kettindee! Nanee ko mbi'ammi faa wooɗa,
piɗɗee noppi mon faa nanon tindinoore am.
18 Ndaar, mi segilake haala saabe sariya,
miɗo anndi ɗum hollan wo miin jeyi goonga.
19 Moy yeddata goonga am oon?
Si ina woodi fu, mi deƴƴinto mi maaya.
20 Kujje ɗiɗi tan nyaagiimi, yaa Laamɗo,
hokkam ɗe, de mi sela suuɗaade ma.
21 Ittaa junngo maaɗa faa woɗɗoo kam,
taa nesi am taƴira kulol maa.
22 Noddam de mi jaabe,
naa du accu mi ƴame, de njaaboɗaa kam.
23 Hakkeeji am wo foti? Noy lutti am le poti?
Hollam lutti am e hakkeeji ɗi ngaɗumi.
24 Saabe ɗume de tottitiɗaa kam ittuɗaa hinney maa dow am?
Ko waɗi de kiisoroɗaa kam hono ganyo maa?
25 Yalla a hulɓinan haakolowol joorngol naa?
A riiwan fay nyaande ruuyoore naa?
26 A winndii kaaɗuka dow am,
a ronnii kam njobdi hakkeeji cukaaku am.
27 A haɓɓii koyɗe am,
aɗa hora to njahammi,
aɗa jokkita to njaaɓammi fuu.
28 Neɗɗo na re'a hono leggal nyolungal,
hono tekka nga mooƴu nyaami.