No Ayuuba jaaborii wi'i Laamɗo ina halka mo muuyi
12
1 Ayuuba jaabii wi'i:2 — Sikke walaa, onon ngoni annduɓe huunde fuu!
Si on maayii, anndal du maaydan e mooɗon.
3 De fay miin du miɗo woodi paamal hono mooɗon,
walaa ko ɓurduɗon kam.
Moy woni anndaa haala hono kaa?
4 Mi laatake mo yigiraaɓe am njalnortoo,
miin nyaagotonooɗo Laamɗo de jaabanoo kam oon.
Wo mi laaɓuɗo, mi walaa feloore,
ammaa mi laatake jalnorteeɗo.
5 Ɓe ngalaa ley torra ɓeen na njala gonɗo ley muuɗum,
iɓe keɗii faa goɗɗo fergoo de ɓe njala ɗum.
6 Gure fiyooɓe-teeta na njooɗii e jam,
umminooɓe ɓernde Laamɗo,
ndaardooɓe baawɗe juuɗe muɓɓen hono alla ɓeen,
hakkillooji muɓɓen ina mbaaltii.*
7 Ammaa ƴamu kulle, ɗe ekintinte.
Ƴamu pooli, ɗi kollete.
8 Naa ƴamu fay leydi,
ndi ekintinte,
liƴƴi du kumpitete ɗum.
9 Yalla na woodi goɗɗum e ley kujje ɗeen fuu
ɗe anndaa yalla wo Joomiraaɗo kam waɗi ɗum naa?
10 Yonki huunde fuu e junngo makko woni,
foofaango neɗɗo fuu e maggo woni.
11 Wanaa nowru ina fonnda nanɗe,
hono no ɗemngal meeɗirta nyaamdu naa?
12 Hakkillo wo to nayeeɓe tawetee,
juutal balɗe du ina yaada e paamal.
13 Ammaa anndal e baawɗe fuu wo to makko ƴuurata,
dabare e paamal to makko ngoni.
14 Ko o heli fuu, walaa nyiɓtotooɗo ɗum,
mo o ommbi du walaa omtoowo ɗum.
15 Si o faddake ndiyam, leydi wo yooran,
si o fadditake ɗam du, leydi yooloto.
16 Semmbe e dabare hakkillo to makko tawaa,
boofinɗo e boofinaaɗo fuu wo kanko jeyi.
17 Imo dillina tindinooɓe koyɗe ɓole,
imo waɗa faa sarotooɓe laatoo fuuyɓe.
18 Imo itta kufuneeje laamiiɓe,
imo taadira ɓe disaaje.
19 Imo dillina almaami'en koyɗe ɓole,
imo liɓa neeɓuɓe dow laamu.
20 Imo haɗa hoolaaɓe haalude,
imo itta hakkillooji mawɓe.
21 Imo semtina saahiiɓe,
imo fiirta kaɓɓorɗi jom'en semmbe.
22 Imo wurtina ko suuɗii ley to ɓuri fuu niɓɓude,
imo waɗa jayngol yayna ley nimre baleere kurum.
23 Imo waɗa leyɗe mawnira semmbe, de o halka ɗe.
Imo yaajina leyɗe, de o egga ɗe.
24 Imo itta paamal ardiiɓe lenyi,
imo waɗa ɓe njiiltoo ley ladde yoornde.
25 Iɓe memmemta ley nimre to jayngol walaa,
o waɗa ɓe taytayta hono yaruɓe bagi.